So, sisch widermou ziit für nä Iitrag, wiu jo bi mir geng sooo viu spannends passiert:-)!
Auso fangs no für aui zur Ufklärig: i ha im letscht Bitrag gschribä, das weni heichumä, machi zerscht mou ä Rundi Ferie! Mit "Ferie" meini natürlech äs paar Tag deheimä blibä und fulänzä, und nid 3 Wuchä All-inclusiv-Ferie ir Karibik, obwou mer das natürlech besser würd gfauä;-)! Numä so für die wos fausch Verstangä hei...
I ha jetz auso entschidä weni wott heicho, auerdings muäsis de no genauer mit dr Fabienne (mis Taxi:-)) abklärä... S chasech aso numä no um Jahre handlä! I wius de natürlech mitteilä sobaudis genau weis!
Am Sunnti am Obä hei sech d Kasia (diä Nöii vo Australiä) u ig is Füdlä gstüpft u hei üs ufä Wäg für id Bar in Lomnago gmacht! Hei auso numä öpä 1 Stung gha, geit jo no gad! I bi äbä scho mou dört gsi und kennä drum dr Bsitzer, dr Giro, wo übrigens dütsch und änglisch cha (Usnahmefau;-)). Är het de üs 2 Armä säubstverständlech gad mit Bier versorgt... Und de isches de haut scho chli luschtig wordä! Mir hei mit äs paar Italos, Dart gspiut, aber mit dr Kommunikation klappets haut glich nid so guät... Us witzigä isch, das ig, wo jo gar nid italiänisch cha, geng für d Kasia ha müässä übersetzä! Eh jo, mit chli Aukohou wird doch aues eifacher;-)...
Si de auerdings scho gli, so um die 1 umä, wider heidrohlet, zum Glück ischs numä gäg abä gangä u ir Höufti het üs de no einä vo üsnä nöiä Kumpanä ufgablet u heibrocht! Und am Mänti Morgä hei mer natürlech gaaanz lang gschloffä;-)...
Voilà, widermou äs Föteli vom Piry uf Wunsch vom Nici! Wiä mä gseht freut si sech ou druf heizcho;-)! Das wärä auso no diä Nöischtä News (für die wos nonid wüssä): i chumä auso definitiv i eim Monet hei:-)! Jo, i freuä mi ganz ehrläch mega, aber uf dr angerä Sitä bini huärä enttüscht, dasis hie nid cha düräzieh! I ha haut scho planet für lenger z blibä, schüsch hätti jo nid mi ganz Kram (u mis Ross u däm si Kram) do abägschleppt!
Eh jo guät, jetz weit dr sicher no aui ganz genau wüßä wieso;-)??? Hm, jo auso wo söui afo...
Siti hie bi, bini fang 2 mou im Usgang gsi, und einisch drvo isch sonä Grosi-Tanzalaß gsi wo mer mitem Vito, üsere 70-jährige Stauhiuf si gsi;-)! Und i ha hiä aso ou dementsprechend viu Lüt kenneglehrt: keni!
Sit mis Outo verschrottet isch hani auso ke Müglechkeit vor Scuderia wäg zcho, ußer z Fuäss, u dir wüßet jo, wie wahnsinnig sportlech i bi! U mit em Ross darfi äbä ou nid go usritä, u dr Grund wieso hani geng nonid böget! Bi natürlech glich scho ussä mit em Piry u i ha ke angeri Müglechkeit ufem Velowäg wo umä See füährt z ritä! Isch ou nid so toll...
Aber dr absolut oberhammer isch, dasi am Obä nüm darf ritä!! Äs sigi z gfährlech wenn niemer hie isch (drbi si jo mini Mitbewohner geng hie) und usserdäm sig dr Stau am Obä zuä, u de heig kes Roß meh usä z cho! I chönn auso am Morgä vorem schaffä (klar i sto jedä Tag am 5i uf für go z ritä) oder überä Mittag (isch jo gar nid heiß, und zuä hei mer jo denn eigentlech ou) ritä!
U das ganzä isch nä jo ou ersch i Sinn cho, nachdämi mis Ross übernä Monet jedä Obä ha usä gno! Blödi Tschinggä!
Jo u äbä, jetz chumi haut wider hei! Platz fürs Piry hani reserviert;-), aber schüsch weisi no gar nid wasi wott machä... Garantiert mou äs paar Tag Ferie:-)!
Das isch eini vo üsnä nöiiä Mitarbeiterä gsi! Si het nämlech numä sit eirä Wuchä hiä gschaffet und hüt isch si scho wider nüm cho!
Sisch ärä zweni Lohn und nid mou si (wo jo Italiänerä isch) hätt ä Arbeitsvertrag bercho...
I bi auerdings super mit ihrä uscho, si geschter zämä go lädälä und do ufem Foto machä mer gad ä Chirsisteiwitspuckmatch:-)! I ha säubstverständlech gwunnä! Drfür hani bim Gorbsimatch verlorä... Jojo mir hei numä Seich im Gring;-)!
Das isch auso üses supertollä Camion! Vorä hets ä mega grossä Läbensruum mit Duschi u Chuchi, 2 Bett u usfahrbahrem Ässberich, und hingä inä hei 6 Ross platz (u das isch de amä dört wo ig schlofä, a dä Turnier!)
Do si mer jetz gad wider z Casorate (das isch am Sunnti gsi), dasmou mit 12 Ross, aber drfür si mer ou z Zwöit! S het wider ä nöii gäh, d Ludi! Si isch 22gi, Italiännerä, u cha nid änglisch, drfür franz! Super, jetz hani auso äs totaus Sprachägnusch u redä jetz eifach mit aunä Dütsch;-)...
Das isch auso no äs Föteli vom Sunnti Obä, woni no ir Schwiz bi gsi... I weis i weis i ha geng chli Verspötig mit minä Iiträg!
I bi aso am Samschti nomi auso Problemlos und ohni Verspötig z Bieu acho u bi när gad witer uf Längnou mit dr Melä, a üsi Klaßäzämäkunft! Isch aso no luschtig gsi aui diä Lüt widermou z gseh u diä autä Föteli azluägä! S hei sech aui mega veränderet *grins*!
D Melä u i si auerdings as erschts wider gangä, hei schließlech no as Stedtlifescht müäßä;-)! Het mi auso gfreut widermou äs paar bekannti Gsichter z gseh! Mir si gloub öpä am 4i deheim gsi, u öpä denn si mir de ou wider, meh oder weniger verkateret(d Melä meh u ig wenige;-)) ufgstangä!
När hets äs feins Raclette bi minä Eutärä gäh und mini Adoptivschwoscht:-) (Sabä) isch ou no verbi cho! Am Obä si mer när eis go zieh uf Bieu.
Mänti Morgä bi ni mitem Nici go zmörgälä u mir si aso scho die nöchschti Reis am planä, hihi! Mittag bini nomou mit minä Eutärä go äßä, när schnäu chli go lädälä und schwups bini scho wider im Zug nach Italiä ghöcklet! Ach, sones streßigs Weekend...
Yeah, äs isch ungloublech i has doch no i Zug gschafft u bi jetz ändlech ufem Heiwäg, ha scho fasch nüm dra gloubt! I bi auso ufem Wäg a mini Klaßäzämäkunft (diä erschti sit 9 Johr, das chani jo nid verpaßä;-)) für die wos nonid wüßä...
Äääh, i dräiä dürä, jetz hets mer gad dr ganz nid gspicheret Text glöschä, wiu mer mini nätti Schwoscht het aglütä! Drbi hani gad so schön über die fählendi Intelligänz vom Tschinggischä Vouk (diä gschidä si äbä aui ir CH;-)) abgläschteret! Eh i duä nechs de verzöuä, sich numä ums organisierä vo mim Zugbillet gangä, die einti het mi ufä 22stündigi Zugfahrt (Milano-Bratislava-Wien-Biel) wöuä schickä, und mitem anger hani öpä 1 Stung telefoniert (Swißcom het Freud gha) für das er mer när het chönnä sägä i müäs a Bahnhof go! Wie bitte, we mä kes Outdo het und in the middle of nowhere läbt??
Aber jetz bini jo ungerwägs!
Das obä isch d Emilia, wo mis Outo gschrottet het, mit ihrem Häsli! Wiu si u d Mad gli hei gö hei si geschter ihri 2 Häsli wöuä befreiä. Mir hei auso diä 2 Bunnys ir nöchi vom Stau ines Fäud gsetzt und... Si si so unger Schock gstangä das si kei Mucks gmacht hei! Si hei nid mou Gras gfräßä. Mir hei när beschloßä mir lö sä eifach mou chli älei u schüsch nä mer sä när wider mit! 15 Minutä spöter si mer wider go luägä u si si beidi wäg gsi! Mir hei kei Chüngu meh gseh... Numä ä Chatz! Und... Die Chatz het doch tatsächlech dr eint Häsu killet:-(! Huärä kraß! Hätt jetz nie dänkt das ä Chatz ä Chüngu würd fräßä! Äs mega Schreck-Erläbnis:-(! Armi Häsli! I hoffä mou dr zwöit het sich grettet!
Das wär auso no äs Föteli vom letschtä Sunnti... Da s jo leider pisset het, hei mer nid so viu gmacht, numä Glacä gäßä u is Nöchschtä Ichoufszentrum go lädälä (jetz hani ändlech äs Scart-Kabu u cha DVD luägä) u am Obä simer de wider mitem Taxi id Stadt u när eis go zieh, u dasmou het dr Barkeeper nid mou dr Rum mitem Tequilla verwächslet;-)!
