Feritg Ferie...

So nach 2 Wuchä fulänzä, ghöri auso ab hüt ou wider zum arbeitendä Vouk: Schrübli iipackä isch agseit! Und jo, äs isch tatsächlech so hoch spannend wies tönt;-)!
Das isch auso nur ä tämporäri Lösig für 3 Wuchä, abem 7. Juni darfi de z Bieu ir UBS-Arena go Würschtli verchoufä!
Iiih dir, i sägenechs, mis Läbä isch spannend wie nä Morä! Auso für die wo wie ig lieber chli am Strand würde liggä... hie no dr witer Verlouf vo mirä Schwoscht und Andreas Reisli:
Nach däm ig sä verloh ha, si die 2 gad direkt vo Singapur nach Kuala Lumpur gfahrä u dört hei si de no gad äs Date mitem Ghaz, eim vo minä Touchgspänndli gha! När isches de witer, wider mou inä Nationau Park... Taman Negara Nationau Park! När sisi witer id Cameron Highlands, u dört hei si schiins widermou wöuä go ä Teeplantage aaluägä, aber die het säubschtverständelch zue gha... scho die womer z Darjeeling ei wöuä go aaluägä het zuä gha...
När isch de schiinbar wider mou Strand agseit gsi, Lankawi, geng no z Malaysia und i mues nech jo nid sägä wie waaahnsinnig iversüchtig dasi bi! När aus nöchschts scho wider Strand, Koh Lipe. Thailand das mou... Jo und nach neuschtä News si si auso jetzä z Krabi und Ko Samui und Ko Tao si gloubs ou no planet! Tss, und i bi am Schrübli iipackä;-(!

Ah jo, Schwoscht u i hei auso z Melbourne no ä Buess (isch mit dr Poscht cho) iigfangä und i ha mer hüt am Morgä bim Zängputzä dr Äckä verränkt... jo das isch öpä aues spannendä wo passiert isch;-)!

Natelnummerä

So nach 2 Mönet ohni Natel hani mer jetz gad sofort wider eis zuchä do, d Sim-Chartä hani scho geschter ir Poscht gha und i ha deheimä ou no äs haubwägs funktionsfähigs Handy (äs urauts Nokia) gfungä.

Bi auso ab sofort wider unger mirä autä Nummerä erreichbar... jetz isches aber natürlech ä so, dasi aui eui Nummerä nüme ha:-(! Schicket mer doch eifach schnäu äs Sms oder sändet mer euri Nummerä per E-Mail! Wäri auso schono flott;-)!
De bis baud...

Wieder zuhause...

Hie no die letschtae Foeteli vo mirä Reis:

D Känguru z Merimbula
Und d Koalas uf dr Raymond Island
Ä Monitor-Lizard (nei, keis Krokodil;-) uf dr Tioman Island
S Büsi, d Haengemattae und hingedra d Jetty und s Meer...
Soooo schoen türkisfarbig ischs Wasser gsi...

Chrigi und ig ganz zfridä...Mini nöiä Touchgspändli, vo links nach rächts: dr Chris (mi Buddy), dr Jay (Touchlehrer), ig, Yasmin, Joan, dr Ghaz u ganz ussä dr Helmi (hihi, jo dä heisst würklech so)...
Üses besceidänä Hüttli, u 5 Meter witer vorä grad z Meer...
Mir 2 mitem Nati und em Kurt vo Sursee.

No chli Ussicht. Dr Sunnäungergang hani leider jedä Tag verpasst, wiu mer geng so spot vom Touchä si hei cho... aber isch doch glich schön? Bir ganz chlinä Inslä ir Mitti simer go touchä...
Und do simer scho wider z Singapur und mir hei d Andrea scho am Flughafä abghout und hei das mou nid ä Hippotour sondern ä Ducktour gmacht, mit somnä Amphibiäfahrzüg, wie z Boston...
Jo und das isch scho mi letscht Obä... dir gseht mir hei aui Pullinä annä, aber nid wiu s z Singapur so chaut isch, nei, numä wiu si aui sehr gärn Klimaalagä hei, und schinbar darfs dinä nienä wermer aus 16 Grad si...
Und wieder zuhause... mis Piry und Teddu!

Aes paar Taeg Malaysia und scho chumi wider hei!

Vo Sydney simer uf Merimbula gfreset, das isch ae Haubinslae zwueschae Sydney und Melbourne! Ueses YHA isch chli aes Autersheim gsi, aber dr Strand isch schoen gsi u mir hei no ganz viu wiudi Kaengis gseh! Hei de no dr Tipp bercho mir seuae ufem Waeg nach Sydney no uf d Raymond Island, das hei mir natuerlech gmacht und hei doert no ganz knudligi wiudi Koalas gseh...
Naer si mer no ae Tag z Melbourne go shoppae u am Obae hei mer nomou mitem Boris abgmacht. Ha s erschtae Mou Sushi probiert... ha mi aber nid so choennae erfreuae drannae!
Am noechschtae Tag hei mer de am Flughafae s Outo abgaeh (hei no ae chlineri Krise gha... die hei ues doch tatsaechlech uesi 8500 km wo mer gmacht hei woeuae verraechnae, ob wou ues isch gseit wordae KM sigae unlimitet! Mir hei das Problem saeubschtverstaendlech besitiget) u de simer de scho witer uf Singapur gflogae!
Wiu mer Singi jo scho gseh hei si mer am noechschtae Tag gad witer uf Malaysia, uf d Tioman Island! Das isch vilech so oepis vo schoen doert, ungloublech! Steisch uf dr Jetty und luegsch ufs Reef abae, s Wasser isch so klar du chasch jedae Fisch erkennae! Do hani natuerlech umbedingt woeuae go touchae u ha mi de gad fuers PADI agmaeudet. Auerdings het dr Kurs scho am Morgae agfangae und ig, und dr Chris mi Buddy, hei aues muessae nochholae und si vom eis bis am 10i am Obae am zuelosae und lehrae gsi... am 9i am Morgae isches de gad witergangae, wider bis am 6i. Und i bi nid mou dr zue cho mis Theorie Buech zlaesae... aber wiui haut aes Naturtalaent bi;-) hani das mit links gschafft und jetz bini auso zertifiziertae Open Water Diver! Bielersee i chumae!
Jo, dr Kurs isch zwar ei huerae Stress gsi u i ha nid so viu vor Inslae gseh, aber mir heiss uhuerae luschtig gha und i ha dr Nemo gfungae:-), ae Schiudchrott gseh und Delphinae hei mer ou no gseh vom Boot us!
Mini Schwe hani ganz aelaeini gloh, aber si het auso nid lang truuret und het sech mit em Nati und em Kurt vo Sursee agfruendet... das si so 2 Spinner;-) wo waehrend 14 Moenet mitem Velo duer die haubi Waeut (20 000 km, weni mi nid tueschae!) gradlet si! Christine und i freuae ues auso scho uf d Chaesschnittae, sobaud mer aui wider ir Schwiz si!!!
Apropos, i bi auso scho gli wider ir Schwiz und zwar chumi irgendeinisch am Mittwuch am Morgae z Zueri ah... Fluegae morn am Obae ab... so jetz mueassae mer aber mou a Flughafae, d Andrea go abholae!
De bis gli...