Stay close!

322 Siitä-Ufrüäf...

2012-02-14T18:18:00.001+01:00

... pro Monet, und 0 Blogiträg sit Wuchänä.
Do isch defintiv d Nachfrog grösser aus s Aagebot. Richtig, dr Reto isch d Schuld dasi nüm schribä!
Dä zwingt mi nämlech geng zum lerä;-(...

D Narracci-Hochziit!!

2011-12-12T20:41:00.000+01:00

So de chömä mer gad mou zum wichtigschtä Ereigniss vom 2011:

Die grossi

MELROB NARRACCI WEDDING!!!

Leider hani ou nid sooo viu Föteli, i bi nämlech sehr beschäftiget gsi a däm Tag, aber zuuuum Glück hani dr Steiner-Paparazzi (mis Mami) aagsteut u si het flissig ufä Uslöser drückt!

Melä bim Coiffeur... läck, sooo viu Hoor!

Und fertig frisiert und sogar mit Schleier...

Vor dr Trauig, dr Robi mitem Mami Narracci...

Steiners ufem Bänkli...

Und do isches scho dürä...

Trouzügä...

Ufatmä nach dr Trouig. Sisi nid härzig die 2:-)!

Ehm Haaaalllooooo? Was hets ächt dört am Bodä?

Jaa, scho viuu besser! Aber Melä, wo luegsch du hi?

Uuu die ghöre aui zu mir:-)!

Jööööö.... so romantisch:-)!

Mi Schatz!

Und no mitem Chrigi... und ehm, mim Wiiglas?

Bereit fürs Gruppäfoto...

Die 2 glücklechä Mamis!

Fotoshooting...

Schätzu u ig...

Fabien und Jerome am diskuttierä! Über was äch???

Celine und Sarah farblech abgstimmt:-)!

Hihi, die si ou härzig die 2;-)!

Und nomou die farblech abgstimmtä Mädels: das mou d Celä mit dr Chäntlä u dr äxtra iigflognä Martina:-)

Und no die chlini Lucy i dä Räbä...

U das isch so härzig... hihihi

S Brutpaar macht sech bereit...

... dr Trouzügä ou...

Und ig ou...

Jö, so verliebt...

... und ändlech si aui parat!

Sogar dr Fotograf! Numä d Sarah u d Celä si noni nochä...

Und ändlech hei mer d Ballön chönnä lo flügä!

Und nomou äs Gruppäfoto, numä mit dä Mädels... aber dä mitem Flüger hei si nid chegget;-)!

U no d Iiladig!

Und no s letschtä Föteli am Obä bim Ässä! Das het d Sarah gmacht, wiu üsä Starfotograf (s Mami) isch haut bim Znacht nid drbi gsi! Dr richtig Fotograf natürlech scho, aber dä het schiinbar nonid nochämögä mit Foto bearbeitä...

Jahresrückblick?

2011-12-12T19:25:00.002+01:00

So. S Johr scho fasch wider dürä. I ha so viu gmacht. Aber fasch nüt i mi Blog gschribä. Ganz klar, dr Reto isch tschuld:-D! Aber das möget dir mi jo sicher aui gönnä.

Auso, i versuechä mou chli nochäzholä, was ir letschti aues so passiert isch:

D Melä het ghürotä:-)

I hanes Outo und wott mi Roller loswärdä (usnahmswiismou NID ir Aarä versänkä)

Mir si d Martina u dr Steve go bsuechä

Mir si das Weekend z Adubodä gsi

U mir hei ä nöii Wohnig:-D!

När gits wider ä huuufä Biudli vom Py (wär jo schüüsch nid normau!!!)

Das isch gad aues wo mer i Sinn chunnt... hm, schiinbar isch das Johr doch nid sooo spannend gsi? Na ja, zum nä richtigä Johresrückblick, würdä natürlech ou no mini Ferie uf dä Philipinä und Las Vegas ghörä, und das i dr Reto gfungä ha (oder är mi?) und die doofi Schueu natürlechou no...
Aber jo, eis nachem angerä... :-)

Wohnung zu vermieten!

2011-12-01T13:03:00.001+01:00

Wer will meine Wohnung?

3-Zimmer-Wohnung in Biel / Bözingen , im 2.OG strassenseitig, mit Estrich und Kellerabteil, ca. 45m2, Miete inkl. Nebenkosten CHF 775.00

PreWedding: Melä

2011-11-18T13:01:00.000+01:00

Aber i bi nid die einzigi wo X Chleider probiert het, d Melä isch fasch no schlimmer gsi;-)!
S erschtä Hochziitschleid, s zwöitä Hochziitschleid, s erschtä Standesamtchleid u när no bim Coiffeur am Frisurä teschtä!

PreWedding: Ig

2011-11-18T12:48:00.000+01:00

So, jetz isches auso dürä, d Melä u dr Robi hei tatsächlech ghürotä. Obwou i nid so wahnsinnig viu ha z tüä gha, bini wahnsinnig gstresst gsi! Wie mä gseht, houptsächlech mit Chleider suechä und aaprobierä;-)!

Las Vegas zum Zwöitä...

2011-10-17T22:12:00.001+02:00

Nenei, i bi nid no einisch z Las Vegas gsi, das si eifach no d Föteli woni mitem Natel gmacht ha... zum Teil chli unscharf, angeri drfür um so schärfer, haha! U säubschtverständlech mi ärä aagmässnä Azahl vo Säubschtportrait:-)

Las Vegas, Grand Canyon, irgendwo im Nirgendwo ir Wüäschti bi 100 F, Venice Beach, Santa Barbara, wider irgendwo irgend äs Valley, San Francisco, Mammoth Lakes und när no im M&M's Shop z Las Vegas und am Schluss ufem Heiwäg im Flugi... öpä so i derä Reihäfoug:-)

Bon Jovi 2011

2011-10-17T20:49:00.000+02:00

JuniJuli

2011-10-17T20:31:00.004+02:00

So, da i das Johr ussergwöhnlech Fuu bi mit mim Blog (dr Reto isch Tschuld), gits jetz eifach aui Föteli uf eim Huufä ...

Guet, das isch im Büro... bi äuä gad am Tröimä:-)!

Do hani versuecht Föteli zmachä für mis US-Visa... hm, irgendwie hani ä liecht irrä Blick druff?

Liliä us Mamis Gartä...

S Piry und ig ufem nä Usrittli... am nä schönä Blüämli-Fäud verbi.

Und s Piry i ihrem nöiiä deheimä:-)!

Ehm, s Dremteam im... ähm... ui... isch scho lang här... ah jo genau, mir si im Desperados go ässä u när no so chli i Usgang (is Papa Joes's;-)...

Do bini mit Teddely u Piru go spazierä... bi auerdings z Fuu gsi zum loufä, bi ufs Piry ghocket u ha dr Teddy nochä zogä, wie mä gseht!

Do, si mer z Mörigä am See...

MelRobs Standesamttrouig :-)

2011-10-12T22:33:00.000+02:00

Dr chic Robi, scho chli närvös aber no deheimä...

Chli unscharf aber scho am strahlä!

Und, tatatataaa, ä Stung spöter ufem Standesamt: Frou und Herr Narracci!

Mit dä Trouzügä...

Jöööööh, s Meli isch verhürotet!!! Jetz muesi de älei uf Pirsch...

Dr Robi topseriös;-)

Brutpaar mit Mama und Papa Narracci

Mitem Vito und em Ricci...

Und no mit dr Abuela Milagros!

S stahlendä Päärli früsch verhürotet!

Und gad no einisch ganz und mi gseht sogar dr Babybuch :-D!

Und mi Schätzu isch ou drbi gsi:-)

D Melä am Obä spot geng no am strahlä!

Dr Brutstruss! Vom Bluemeladä am Bahnhof grettet!

Und no dr Touzügä mitem Robi sim Brüätsch...

mi persönlech Pferdefachmann und Ponyriitexpert...

2011-10-05T13:11:00.000+02:00

Hotel Cailler

2011-09-06T15:29:00.001+02:00

Am Weekend vom 11./12. Juni si d Sarah u d Melä u ig go Wellnessä nach (ähm - Google) Charmey im Greyerzerland:-)!
Si auso am Samschti Morgä agreist mitem Taxi Melanie hei is Hotel Cailler iichegget u si natürlech gad mou aus erschts is Solbad go höcklä und hei zerscht mou ä Rundi plöiderlet... vom schnurä simer du de chli müäd gsi u de isches de gad guet gsi das Ziit isch gsi für üsi Massage. Das heisst, d Sarah het ä Gsichtsbehandlig gha und i ha är Melä ihri Enstpannigsmassage überno, si het sä nid chönnä machä, wiu si sich jo i angerä Umständ befindet!
När isch de scho gli Ziit gsi fürs feinä Znachtbüffet, mmmh, was das aues het gäh, mjami chani auso numä witerempfälä... auerdings sött mä jo amä nid so viiiiu ässä.... bim Verdouigsspaziergang het sech des Völlegefühl chli gleit u mir hei üs am nöchschtä Morgä mit gewohntem Appetit ufs Zmorgäbüffet chönnä stürzä!
Am Sunnti simer de när no nach Broc is CaillerMuseum und nächerno s Schloss Gruyère go aaluegä...

Mmmmmmmmhhhh

Mmmmmmmmmmmmmh

Mmmmmmmmmmmmmmmmmmmmmmh

So und am Schluss no die 2 erhoutä Schlossdamä:-)!

Lerä...

2011-09-06T14:15:00.001+02:00

Tja was macht mä nid aues für em lerä usem Wäg z go... de duet mä sogar ou mou die scho lang erwartätä uuurautä Föteli ufäladä...;-)!.

Das wäri auso irgendwenn mou im Mai gsi, woni em Reto ha wöuä bewisä dases im Seeland schöner isch (resp. das bi üs d Sunnä schiint)!

Und hie no mini nöii Riitbeteiligung, leider ischer geng so schnäu, dasi gar keis scharfs Foto ha chönnä machä...

Schaffä...

2011-08-27T10:25:00.001+02:00

I hockä gad totau motiviert a mim Pültli u due chli Chuchinä zeichnä… i ha so äbä ä Gschirrspüeler verchouft (wooohooo, i chumä mim Budget geng wie nöcher (gspüret dir d Ironie)) und jetz hani dänkt i ha mer doch äs Pöiseli verdient bevor dr gross Aasturm a Chundä chunnt. Die si nämlech zur Ziit no am Zmörgälä u wärdä wou erscht irä haubstung hie uftouchä ! Aber vilech hani ou Glück u si blibä deheimä (drücket mer d Duumä:-)! Sowieso, hani mer geschter ganz spontan, zum Wätterumschwung hi, ä Grippä zuchä do, u hockä jetz mitem Röueli Klopapier vor mirä Offertä… das sött jo eigentlech eh aui mini Chundä abschreckä.

SOMMERFERIEN!

2011-08-13T08:44:00.012+02:00

Am 22. Juli isches ändlech so wiit gsi: nach Wuchänä vo wahnsinnigem Stress (hm, so im nachhinein gseh isch "wahnsinnig" vilech äs Mü übertribä, aber mi hets denn no beyond normal dünkt) hani am Friti Morgä mi Arsch nid müässä is Büro trölä, sondern uf Züri a Flughafä! Genau! Scho wider Ferie, dänkä jetz aui mini tröiä Läser, und do muesi mi säubschtverständlech gad rächtfertigä: I ha letscht Johr 1 Wuchä Ferie gha und die uf Überziit. Ä usgeprägti, 2-wüchigi Shoppingtour nach Las Vegas isch auso durchus abrocht gsi:-D!

Mir si auso am Friti Morgä los und am Friti obä und 9 Stung früächer z Las Vegas aacho, im Stratosphere. Zwar chli abglägä vom Center of Action, aber immerhin am Strip und usserdäm mit Gratis Acces ufä Tower, obwou das hei mer ou erscht am Schluss gmerkt und ä Teil vo üserä Reisägruppä isch vor Höchi vom Turm eh nid so berauscht gsi. Apropos Reisegruppe, das wär auso Diana (mis All-inclusive-Gspändli) und d Celine (mi fellow USA Traveler vom 2004).

Stratosphere

Diana het chli Schattä gsuecht...
Am Strip... (Las Vegas Boulevard)
Üsä Pool, vom Tower obä abä...
Ufem Tower...
Dr Strip vo Obä...
Vorem Bellagio...
Guet, nach däm mer auso scho nach dä erschtä drü Täg ä huufä Gäud (Flipflops, churzi Hoosä, Tschäppu - aus absolutly necessairy Sachä) in LV hei lo ligä hei mer bi Dollar üsä Dodge Charger (aka Roadhamster) abghout u si i Richtig Grand Canyon gfahrä... S Navi het üs de zum Lake Mead (aber nid zum Hoover Dam) und zum Grand Canyon (Skywalk Tourischtäfauä) gfüährt. I wett do no drzue sägä: i bi Anti-Navi und eher dr klassisch Chartäläser (joooooo, i cha Chartä läsä)... numä Chartä hei mer jo leider keni gha... ohne weiteren Kommentar.

Die erschti Nacht hei mer de z Bullshit City, äh Bullhead City, verbrocht... dört hei mer auerding nüt gseh ussers Hotelzimmer vo innä und s Subway. Guet, het gloubs ou nüt z gseh gha. Am nöchschtä Tag si mer de witer i Richtig Pazifik, dür d Mojave-Desert, äs Stück über d Route 66...

Nach däms üs z Las Vegas, im Grand Canyon NP und i derä Wüäschti so zimlech brötlet het, jä nei Scheisse.... i ha jo totally dr Joshua Tree NP vergässä z erwähnä, dä isch natürlech ou seeeehr spannend gsi, Diana, Celä u i hei üs die ganz ziit gfrogt weli Equipä äch die Böimli pflanzt hei und weli das d Steinä ufnang bigä het... hm, mir heis de ömu gli mou gseh... äbä nach dä 40° ir Wüschti hets üs de bi 20° z San Diego fasch iigfrorä, und mir hei üs scho wider drzue zwungä gfüäut go z shoppä (T-Shirt, Hosä, Längermligs...).

Joshua-Tree!

San Diego

Nach 3 Täg z San Diego si mer de witer nach Venice Beach, wo sech d Celä um die autä Ziitä Willä äs nöis Tattoo het lo stächä und Diana und i hei während dessä ir nöchschtä Bar dä Iiheimischä "Chuchichäschtli" bibrocht...

Voilà, jetz isches sowiit, nachem drittä Tag woni dä Blogiitrag versuechä fertig z machä isches so wiit: I ma nüm. Und jetz gits d Churzversion... wiu i wirdä morn eh nid witerschribä. Auso:

Nach Venice Beach simer witer nach Santa Barbara (Zitat Diana: oooh, das is schön mit die Berge), vo Santa Barbara überä Highway 1 nach Santa Cruz und de ou gad witer nach San Francisco... dört hei mer 3 Täg verbrocht, usgiebig gshoppet und sogar ä Sightseeingtour gmacht, aber d Golden Gate Bridge hei mer leider numä im Näbu gföttelet. Witer gange isches de (uf mi Wunsch und zum Leid vor Celä (guet äs wär jo kes Revival gsi wemer üs nid so au paar Stung einisch gstrittä hättä (ok, das isch jetz übertribä gsi))) mit rouchendä Brämsä dürä Yosemite NP nach Mammoth Lakes u dört hets sogar ä Bitz Schnee gha (wo komischer wiis usser mir gar niemer Freud het gha?), numä die versprochänä Bärli hei mer leider nienä gseh. Nachdäm am nöchschtä Morgä dr nätt Hotel -"Innsbrooook"-Bsitzer mit Dütsch-Brasilianischä-Wurzlä (or else) d Brämsä abchegget het isches de witer gangä zrugg i Richtig Las Vegas, dürs Death Valley (das tote Tal des toten Todes)... säubschtverständlech ou das uf mi Wunsch, und usnahmswiis muesi ou sägä, zu mim beduurä. Das hätti jetz auso würklech nid brucht. Während mini zwöi Gspändli sechs mit Klimaalag im Outo hei bequem gmacht, hani mi bi öpä 50° (vou im Ärnscht) zu däm huerä Sauzsee z Badwater usäkämpft (i ha müäääässsä, i ha umbedingt mis Verlangä nach Abentür müässä stiuä und "äs Foto von die misch" (Zitat Diana) müässä go machä... äs het mi grilliert! I has numä knapp wider zrugg is Outo gschafft u ha när die räschtlächä 50 Meilä bis Pahrump nümme abäküälet und i ha mindeschtens 10 Liter Schweiss verlorä.... nid schön... gar nid schön.
Eh voilà, vo Pahrump si mer retour uf Vegas, hei no 3 Tag gshoppet und scho si mer wider deheimä gsi... und vo mim Mörder-Jetlag woni när ha gha, voni jetz gar nid erscht afo verzöuä...

Santa Barbara...
Elephant Seals ufem Hwy 1...
Tourischtä ufem Hwy 1
U no meh Hwy 1
Santa Cruz
San Franzisco (Lombard Street vo obä)

Bay Bridge
Knackis mitem Alcatraz im Hingergrund...
Tourischtä...
Golden Gate Bridge
Yosemite NP
Säubschtportrait (äs wärä keni richtigä Ferie, ohni ganz ä Huufä Säubschtportrait)
Die 2 hei ou zwüschädürä müässä härä ha... Death Valley

Fasch bini wäg gschmulzä :-(
Und am Schluss nomou Las Vegas!

6 x längwillig

2011-06-20T22:56:00.003+02:00

Liebi Lüt, wie bitte? 6 x längwillig? Drbi isch mis Läbä no nie so spannend gsi wie jetz;-)! Aber us däm schliessi jetz eifach mou, das öies Läbä offäsichtlech längwilliger isch aus mis, haha, wiu schüsch wärs nech jo wou egau... frogä mi natürlech scho, welä vo minä 3 Läser gad 6 x uf läääängwillig klickt het.
Aber i wius nech no mou erklärä:
1. äm Piry geits wider guet: (Schatzis, äs git fasch nüt wo mi meh würd fröiä, drum:) seeeeehr interessant!
2. Rouschuehfahrä mit mirä Schwe: mittu spannend (ok, Tendenz richtig längwillig)
3. Dorli und Morli: hey hallo, die si ömu mega kuul, i nimä mou a, niemer vo öich het sones Viech deheimä, auso bitte: seeeeehr spannend!
4. S Piry züglet: na das isch jo wou erscht rächt spannend, so öpis passiert jetz auso ou nid würklech jedä Tag, und gäts doch zue, dir wüsstet ou gärn wieso (ach moment, mini 3 Läser wüssäs jo).
So gseht dr, totau interessant (obwou i natürlech scho nid cha beurteilä wie gross jetz do dr Ungerhautigswärt isch für mini Umwäut;-) und wärs immer no öde fingt, kennt mi schiinbar nid so guet und weis nid wie längwillig mis Läbä schüsch aubä isch!

Ok, lö mer das, i gseh, das ou dä Iitrag eher "längwillig" wird. I bi säubschtverständlech offä für "konstruktivi" Kritik (Obä rächts isch mini Mailadrässä oder bim Kommentar chöit dr ganz eifach ä Namä iigäh, dir müässt nech nid mou aamäudä) und schüsch würdi sägä, einisch längwillig aklickä längt.

Guet, und jetz die nöischtä News us mim spannendä Läbä, i maches churz:
- i ha, nach längerä Entscheidigsschwirigkeitä äs schöns Plätzli fürs Piry gfungä.
- äm Piry geits geng no guet, het zwar schüsch geng par Bülä und Näggi, aber hinge git si nümme ah
- ah jo, i go jetz wider id Schueu
- und scho gli gits äs Ildy&Metty-Revival z Las Vegas mit Ungerstützig vor Diana, Visa-Atrag louft;-)
- Melä, Sarah u i si z Gruyére äs Weekend go Wellnessä, Sightseeä und Schoggiässä (Fotos folgen - vilech)
- und dr Reto und d Melä si chürzlech 30gi wordä ( dr Reto vor dr Melä): Happy Birthday!!!
- I bi nöierdings wider im Bsitz vom nä P.O.S.
- uuuuund... d Martina chunnt scho gli id Schwiz, juhui:-)!

Voilà!

Chrüsimüsi im Mai

2011-05-22T18:41:00.007+02:00

Mis Böhneli in vouer Aktion:-D! Ha am Friti vorärä Wuchä dr Döktu gha, und är het gseit är gsäch nüt meh vor Lahmheit:-)! Juhui. Vor luter Fröid si mer de dä Friti (ha no müässä wartä bis dr Schmid isch cho) zämä ufem Vieregg umägsecklet:-)!

Das isch am Muettertag gsi, d Schwoscht u i hei wider mou d Rouschueh fürägno... Dr Reto isch ou drbi gsi, aber dä isch so schnäu gsi, dä hani nie ufs Foto verwütscht;-)...

S Piry mit nöier Friisä... ha dänkt jetz wo si wider fit isch mues o wider ä aaständigä Hoorschnitt anä... nid das mer üs de a dä bevorstehendä CS und CD düä blamierä;-)!

Ähm, dasi isch Dora, würdi sägä. Während mini Schwesä i dä Ferie isch, darfi nämlech ihres Outo bruchä und drfür dueni Dorli und Morli (Dora und Diego), ihri und Jejes Bartagame füätterä und düschälä... auso natürlech in Zämäarbeit/Abwechslig mit minä Euterä. Auso d Würmli si kes Problem aber die huerä Heugümper si jo scho waaaahnsinnig gruslig...

D Viva ligt flach. Kei Angscht si isch numä am sünnälä...

S Piry und s Goldie... tja si t dr Teddy wäg isch, chläbä haut die 2 zämä. Dr Teddy isch wäg wiu mir hei chlineri Ghettöer im Stau gha, und s Piry züglet ou demnächscht wäg.

Voilà und das wär de no Morli. Obwou, i cha würklech nid ungerscheidä weles was do weles isch... aber i ha mou aagno dä mitem dickerä Ranzä ischs Männli!

Und no einisch s Py in Action:

Erziehig vo minä Mitarbeiter

2011-05-18T11:48:00.002+02:00

Voilà, hie s Bewiesfoto das mini Erziehig funktioniert (oder dr Bewies dasi nid die einzigi bi wo dr Gschirrspüeler usruhmt?):

Dr Herr F. aka Herr-mitem-wunderschönä-und-modischä-rosarotä-T-Shirt (nei, kei verstecktä Sarkasmus - u leider het ärs uf däm Foto nid annä) bim schaffä.
Beschtä Dank a Paparazzo Miss B.!

Paris

2011-05-05T12:02:00.012+02:00

Über d Oschterä bini mitem Reto z Paris gsi...

Dr erscht Blick ufä Eifuturm!
Und no dr Zwöit Blick;-)!
Und no einä vo Ungä...
Und no einä mit Specialeffect!
Und no dr Eifuturm mit üs druf...
Und no dr Eifuturm numä mit mir...
Und - wius ä sooooo schön isch - no einisch dr Eifuturm!!!Tja dir merket, mir hei dr Eifuturm us aunä Richtigä, mit dä verschidenschtä Belüchtigä und Liechteffektä gfötelet;-)... drfür simer nid ufä:-(! Ungloublech, scho klar, aber äs het so viu Lüt gha u mir si beidi scho mou gsi, das mer gseit hei, mir düä lieber einisch meh iichehrä und lö drfür dr Eifuturmufstig ussä!

Obligatorischs Metro-Igang-Föteli...
Bim Arc-de-Triomphe... nachdäm mir todesmuetig und unger gehupe überä Kreisu zum Triumphbogä si gsecklet, si mer leider z nöch gsi und hei nä nüm ganz druf brocht... und ou hie hei mer verseit und si nid ufä, dasmou aber wiu d Mitarbeiter gstreikt hei!

Ah, dr Retu bir erschtä Pousä (oder isches ächt scho die 2ti oder 3ti gsi?) imnä Sitägässli vor Champs-Elysée...
Obligatorischs Obelisk-Foto.
Obligatorischs Louvre-Foto. Dört si mer leider chli schnäu dürä, wiu mir nachem dürä-Park-spazierä-und-illegalerwiis-im-Rasä-umäligä äs liechts Hüngerli hei gha und dringend ä Beiz hei müässä suächä. Das mer i Rasä si glägä hätt übrigens gar niemer gmerkt, wenns üs nid aui angerä Touris hätt nochä gmacht und när die ganzi Wisä wär vou gsi...;-)

Uf dr Ile-de-la-Cité...

Notre Dame: die einzigi Sehenswürdigkeit wo mer ou vo inä gseh hei (usser d Lädä uf dr Champs-Elysée) und das numä wiu mer totau unabsichtlech die kilometerlängi Schlangä überseh hei u eifach inäspaziert si.

Do gseh mer, ou dr Retu het ä Neigig zu Säubschtportaits...
Während ig mi ungerdessä cha lo Fötelä...
Mmh Dessär:-)! Auos wie mä gseht isch Verpflegig uf üserä Reis scho sehr wichtig gsi... hie ä Tart Tatin nach Opas Rezept oder so...
Am nöchschtä Tag: La Défense

Und wider äs obligatorischs Föteli: Sacre Coeur... o dört hets üs z viu Lüt gha, und mir heis lieber vo ussä bewunderet.

Und Moulin Rouge... aber dr Retu het nid inä wöuä.
Und wius so schön isch gsi... no äs letschts Eifuturm-Föteli.
Heireis....

1/3 2011

2011-05-02T12:08:00.006+02:00

S 2011 isch scho wider zu eim Drittu dürä und jo i gibes zue, i bi nid so flissig mit minä Blogiiträg, obwou i eigentlech ganz flissig ungerwägs bi...

4. März 2011: S Piry am Sünnälä... si dänkt sech grad: söui ächt ufstoh oder darfi äch blibä ligä:-)!

5. März 2011: Mit dr Celä z Adubodä! Premierä für Heum und Briuä (woni när im Bus ha lo ligä...) 3 x abägfahrä... und Pousä!
16. März 2011: hei mer scho uf d Früähligsdechi gwächslet und luget mou wie brav Piry und Teddy ufs Läckerli wartä;-)
18. März 2011: Mit dr Sarah ar Museumsnacht, hie gad im Bellvue
3. April 2011: Mitem Retu ufem Balmberg...
5. April 2011: Mamis Gartä isch scho am blüäiä!
8. April 2011: Papi isch mit cho spazierä am Mittag... ... u s Mami u s Piry hei graset.
9. April 2011: Sonnenschein am Snowpenair uf dr chliinä Scheidegg Bachmi bi beschter Luunä! Corinne, i und d Annemarie... ... u no d Corinne, Diana u d Annemarie am sünnälä.
Dr Andy ha mit dr Diana am diskuttierä.

Voilà und no s Dreamteam dür d Sandra verstercht!

13. April 2011: Sunnäufgang am Bahnhof...

Härzli und Walhaiä

2011-03-30T17:05:00.003+02:00

So, i bruchä gad ä Moment Pousä, wiu i bi gad ä chli gnärvt (totau überraschend, gits jo fasch nie) Ir letschti bini auso ganz flissig mit dr Sarah ungerwägs! Z.B. letscht Donnschti si mer gad im Theater gsi, go Butterbrot luegä. Geit um nä Männer-WG und ihri Frouäproblem. Isch auso mega luschtig gsi:-)! Und vorletschts Weekend si mer zämä ar Museumsnacht gsi… bim Paul Klee Museum hei mer so Lüchtstäbli bercho und äs Härzli drus gmacht (und wehe irgendöper seit, das gsäch nid us wie nes Härzli!!!)…

Und hie no dr Link zum nä Bricht über d Walhaiä in Donsol, dört bini jo ou gsi: Coopzeitung Walhaie

Jetlag u die angerä Verwschörigä...

2011-03-09T22:29:00.000+01:00

Voila, sit 2ähaub Wuchä, bini wider im Lande, und dr Klimaschock hani geng no nid ganz verchraftet! Het doch das auerärnschts gschneit, wo mer z Züri si glandet. Aus erschts hani natürlech i mirä Wohnig d Heizig ufdräit und mi i mim Bett verchrochä. Sonä aagnämi ruhäigi Nacht (eigentlech isch jo Tag gsi, aber äbä, Ziitverschiebig) hani scho lang nüm verbrocht u so hani spontan 12 Stung dürä gschlofä. Drfür hani när bis am 4i am MorgäTV (Becoming Jane) gluegt... auso mim Jetlag het das natürlech üüüberhoupt nid ghuufä. Und s het mi du de ou wahnsinnig gfröit hani 2 Stung spöter müässä go schaffä! Auso ufstoh isch jo no gangä... aber i ha de du när doch ä Wuchä lang mit dr Ziitverschiebig gschleglet! U da i natürlech vergässä ha d Heizig wider abäzsteuä hani de mini Wohnig no inä tropischi Zonä verwandlet. Na ja ungerdessä isch ömu o scho wider aues bim autä... sogar die autbekannti Verwschörig vo minä Velo gägä mi, isch scho wider im Gange. Und das obwou i bi beidnä Velo no vor minä Ferie heudehaft dr Schluch usgwächslet ha. Jo u de das erscht no hinger, und jo i ha de när sogar s Rad wider chönnä montierä!!! *aufdieSchulterklopf* Aber äbä, ungerdessä hei si scho beidi wider ä Plattä (Sabotage??)... Guet anyway, was gits no für News? Ah jo, genau i bi früsch verliebt u zwar (... tatata, i wotts jo nid unnötig spannend machä, aber tatatata:) i Mando Diao! Wär chunnt mit mer uf Zermatt as Unplugged?
Guet, de wär wou no Ziit fürä Räschtä vo dä Ferie...
Auso, mir si z Palawan, genau gno z Puerto Princesa verblibä! Am nöchschtä Tag si mer imnä Haaaausbrächerischä Tämpo mitemnä vougstopftä Minivan nach El Nido kesslet. Nei ke Witz, dä Fahrer isch jetz um jedi Kurvä pfiffä, und i ha mer tatsächlech scho afo überlegä wasi i mim Läbä aues wirde besser machä weni die Fahrt überläbä (na ja, dir wüsst jo wies so isch mit dä guetä Vorsätz). Numä aus verglich, mir hei 4.5 h gha... angeri hei fürä glich Wäg 6 Stung gha. Nach lengerem, i würd scho fasch sägä stundelangem mitem Gepäck am Strand ir Sunnä umä spazierä, uf dr Suechi nacherä Bleibe, hei mer üs de ou hie wider mou i eim vo dä türerä Hotel nider glo. Am nöchschtä Tag, hei mer de sit langem eifach mou nüt gmacht (u so öpis i dä Ferie) u si chli am Strand umäghanget u im Dorf umä spaziert, go käfelä und hei fein gässä. Dr Strand isch leider zwar nid so s Highlight gsi, wiu hingerem Strand isch geng gad ä Muur oder ä Zuun u när irgend ä Hotelaalag gsi... u nid Paumästrand, wieni mir das gwünscht u eigentlech ou vo de Philippine erwartet hät... puuh, i gseh, bi mirä usfüärläch Beschriebig bruchi für die räschtlächä 1ähaub Wuchä vo dä Ferie no öpä 5 Stung zum schribä... pfff, i verschiebä das ufenes angers Mou! Guet Nacht...

Les amoureux

2011-02-08T14:39:00.010+01:00

Nenei numae kei Panik, "les Amoureux" beinhauted nid mi, sondern mini schiinbar frueschverliebtae Euterae. S gseht auso tatsaechlech so us, ds si die ganz Ziit haendlihautend duer d Gaegend loufae und unzertrennlech si, hihi! Ganz haerzig:-)! Drfuer muesi segae, ds si haut leider doch nid ganz spontan und Backpack-reisetouglech si. Z Dritt mit Gepaeck im nae Tricycle, geit zum Bispiu gar nid. Mit erae Gruppae ungerwaegs si und nid z hingerscht nochae troetschgaelae, foetaelae und blueaemae, geit gar nid! Aes Zimmer mietae wo numae 3 Frankae pro Nacht choschtet? Geit scho erscht raecht nid. Daem entsprechend faue mini Ferie chli Luxurioeser us aus eigentlech planet... aber choschtae duets jo geng no fasch nuet! Uf jedae Fau hei mer jetz (fuer mini Naerva z schonae, und zur Beruhigig vo Mup die noechschtae 2 Wuchae duerae planet: Flueg buechet Cebu-Puerto Princesa-Cebu-Siargao-Cebu-Manila! Auso im ganzae si das 5 Flueg u fuer 2 Persone choschtae die 750 Frankae. Raechnet saeuber. Drzue wetti no saegae, fuer das z buechae bini fasch 3 Stung am PC ghocket (u ha mer daenkt, ach zum Glueck hani kei PC-Job... ach moment...:-(...) u nach daemi aendlech die erschtae 3 Flueg buechet ha (u 3 x uesi Infos i gaeh ha) hets ploetzlech bim 4 Flug nuem funktioniert (hani mer daenkt jae nu, blibe mer haut de d Siargao;-), hani mer mou daenkt, hm Credit Card declined, luete mer doch mou er MasterCard ah, und siehe da dr fruendlech Herr Kuschter het gad gwuesst um wases geit und das am 5i am Morgae Schwiizerziit. Aer het de du oemu d Chartae wider entsperrt und i ha nomou woeuae buechae. Und prompt isch mi Flug waeg gsi! U do het sechs Katrin wider mou aes Mue ufgregt! Aber nume aes Mue. U jetz muessae mer de haut waegem Herr Kuschter wo d Chartae gsperrt het 9 Stung z Cebu am Flughafae umaegammlae, bis mer uf Manila choei witer fluegae (d Idee waer a Aschlussflug gsi, Siargao-Cebu-Manila). Guet, aber das intressiert jo kein Schwein.
Mir si auso vo Donsol retour nach Legazpi, u vo doert nach Cebu gflogae, 1 Tag Sightseeing gmacht u nach Palawan Puerto Princesa gflogae. Huet si er hie dr Underground River (scho wider s 8tae Waeudwunder) go aaluegae und morn geits hoffentlech aeaeaeaendelch a Strand i Norde vor Inslae nach El Nido!

S Mami ufem Schiff z Donsol, woni mit dae Butandings bi go schwuemmae:-)
Das isch dr Spotter, wo nach dae Wauhaiae usschauhautet.
Am Strand vo Donsol (jaaaa, wo isch d Sunnae?)
Dr Papi uf sim Platz ufem Tricycle, das isch z Legazpi...
U no hinge dri quetscht...;-)
Die Nuesse...
Dr Mount Mayon, vom Lignon Hill us z Legazpi
Und tatatataaaa: Les Amoureux

Butanding

2011-02-05T03:12:00.005+01:00

Letschtae Sunnti si mer jo mitem Nachtbus zrugg nach Manila gfahrae u am Morgae am Saechsi de ou gad witer nach Lucena. Lucena isch auerdings chli ae Reinfall gsi... doert hets gad gar nuet gaeh zum aaluegae u s Hotel isch ou nid gad ae Bombae gsi, drfuer si mer fuer di augemeini mueedi Stimmig aazhebae is Maec go aessae;-)! Am noechschtae Morgae si mer de wider inae Bus ghocket und 9 Stung i Suedoschtae, nach Legazpi gfahrae... si am Obae spot acho und hei dr beruehmt perfekt Vulkan Mt Mayon numae no zwueschae Wulchae duerae gseh.
Am noechschtae Morgae hei mer ues de wider z Dritt ines Tricycle quetscht, das het ues zum Lignon Hill brocht u wiu i z Fuu bi gsi zum ufaeloufae hei sech s Mami u dr Papi muessae hingae ufenes Toeffli setzae und dr Stutz uf fresae... i ha natuerlech gfungae easypeasy locker vom hocker, aber fuer die 2 isches de aeuae eher wider mou aes Nahtod-Erlaebnis gsi... armi Euterae. Aber si hei de du oemu d Ussicht gnossae ufae Vulkan, und abae si mer de naer gloffae.Am Nomi hei mer de ae Minivan gmietet, gaaaanz fuer ues aelei... Mup hei gloub chli gnue gha vo Tricycle und Chickenbusae. 2 Stung spoeter si mer de am Strand z Donsol gstangae und hei i ueses Bambushuesli iitschegget u de isches Mup o scho gad wider viu besser gangae:-)! Doert si mer de 2 Naecht blibae und hei natuerlech d Houptattraktion, schwuemmae mi Walhaiae mitgmacht.Das isch auso ae riiiisigae Fisch, gloub bis 13 m, miterae Schnurae wienae Wau und dr Schwanyflossae wienae Hai. Mir si usaegfahrae und sicher ae Stunglang umaegfaerae ohni einae z gseh:-(! Naer si mer zrugg i richtig Hafae, und i bi scho so richtig schoen apisst gsi, das mer keinae gseh hei. Naer hets ploetzlech geheissae parat machae und is Wasser, ei hektik, s Mami u Papi hei scho wider nuem nochaemoegae vor luter Stress, und da i de ou meh nach ihnae gluecgt ha aus nachem Wauhai, hani nae de ou gar nid gseh:-(. Aber mir hei naer no 6 witeri Mou is Wasser choennae und 5 mou hani nae gseh!:-D Dr Hammer! Nei wuerklech sooo geil! Bim erschtae Mou hani nume schnaeu d Schwanzflossae gseh, bim 2te mou hani nae numae churz ganz toeiff unger im Wasser gseh, bim 3tae mou hani oepae so 10 Sekunde ueber sim Gring choennae schwuemmae, bim 4tae mou bini o wider ueberem Gring gsi, aber scho chli lenger u bim letschtae Mou si mer numae z 5t gsi u hei mega lang choennae nochae schwuemmae! Das isch am beschtae gsi!:-) Dr letscht isch mega gross gsi, u de bini zersch ou wider drueber gsi aber naer ischer geng wie witer ufe cho naer bini uf d Sitae u naebae sim Chopf gschwummae, naer het er sech gaegae mi draehit u de hani naer gstoppet (ha doch fasch chli schiss bercho daser mi rammet) u naer isch er die ganzi lengi a mir verbi u de abtouchet! So geil.
Mami u Papi hei nachem erschtae Stress nuem woeuae, u si de ufem Boot blibae. Si hei sech nid so mit Schnorchu u Flossae choennae afruendae.
Am Obae si mer de no mitemnae Schiffli ufem Donsol River go Gluehwuermli aaluegae, das isch ou sehr schoen gsi, wiu aes si so ganz Naeschter, ae ganzae huufae ufaenang gsi.
Geschter si mer aebae zrugg nach Legazpi und huet fluegae mer nach Cebu!

Banaue

2011-01-30T10:12:00.002+01:00

Voila, i bi widermou am Foeteli ufaeladae... klar, sit Mama u Papa do si, het sech natuerlech d Aazauh Foeteli massiv gsteigeret und drzue hani ou no ae extrem langsamae PC. Konzentrierae chani mi ou numae schlaecht wiu rund um mi ca 20 chlini Filipino-Gofae hockae und Computerspili spilae. Aes huerae Gschrei. Hmmmm.... ok, sehr aastraengend... Hm... supi, jetz hei s Goofae ufgaeh mit spilae, drfuer hockae si jetz unger mim Tisch u spilae mit mim Taeschli, hm? Ignorierae mer das!
Auso nach dr letschtae Uebernachtig z Manila isch scho wider sooo viu passiert, aber eigentlech hei mer nuet angers gmacht aus Bus und Jeepney fahrae... mir si auso vo Manila nach Baguio, doert hei mer ei Nacht verbrocht u si naer am noechschtae Tag a Strand nach San Fernando. Doert hei Mup scho ufgaeh und hei sech aes tuers (im Verglich zu dae vo mir gwaeutae Guesthouse) Hotel usaeglaesae, direkt am Strand. Si de schoen go baedaelae und i ha ae Surf Lesson gno (die 2ti ever, ma mi no entfaernt a die erschti z Hawaii vor 5, hm 6, ae 7 Johr erinnerae;-) und naer si mer o no go San Fernando aaluegae, het auso ganz ae schoenae Maerit (auso so Gmuees Maerit) und da mer so ziemlech die einzzigae Touris si gsi, hei d Filipinos o mega freud ah ues gha, und hei umbedingt aui woeuae gfoetelet waerdae... Z San Fernando si mer auso 2 Taeg blibae u naer si mer wider zrugg nach Baguio und gad witer mitem Chickenbus nach Bontoc. Doert hei mer numae ae Nacht verbrocht und verzwiiiflet nach erae Bank gsuecht (Western Union waechlset keni Dollar und uesi Bankchaertli funzae nid)... im Jeepney nach Banaue hei mer de sit langem aendlech wider aes par Touris gfungae, Franzosae, u i bi raecht froh gsi, hei sech mini Euterae wider mou saeuber mit oeperem choennae ungerhautae:-)!
Aebae jetzae si mer z Banaue, das isch do wo die beruehmtae Riisterassae si und huet hei mer saeubschtverstaendlech scho ae Tour gmacht. Hei aes ganzes Jeepney fuer ues gha, ou hie hets nid wuerklech viu Tourischtae. Si de Stungaelang duer d Baergae gfahrae und hei schliesslech ae ganz ae tollae Spaziergang duer die Riisfaeuder gmacht (wenn mini 400 Foeteli aendlech ufem PC si, gits de Biudli). Auso die Riisterassae si 2000 Jaehrig u we mae sae anaenag wuerd reihae, giengsi um die haubi Waeut. S git verschideni Artae, entweder mit Steinae gmuuret oder eifach mit Lehm und Aerdae. Zerscht wird ae Aebaeni gmacht, naer d Muur mit Steinae ufbout u naer wirds mit Sang und Lehm wo vom Fluss ungerufae gschleipft wird und am Schluss mit Aerdae ufgfiut. Hie bi dae Ifugaos gits numae 1 Aernti im Johr, im Flachland bis zu 3, waegem Klima. Meischtens het 1 Familie a ca 6 Personae 1 Terassae und das Riis us derae Terassae langt fuer ca. 3 Monet. Si verdienae auso kei Gaeud mit daem.
uuuuh, auso i gibes uf, ha jetz fang d Foeteli ufem PC... aber jetz kriegisae nid id Picasa. Scheisse! Ah, Erluechitg... i ha jo no ae USB drbi... supi das funzt:-)!
So jetz no schnaeu aes paar Foeteli is Internet schmeissae u naer muesi mis Koefferli go packae, huet geits mitem Nachtbus zrugg nach Manilae, und de naer hoffentlech wider a Strand, sisch naemlech nid so warm hie! Mup und ig haettae auso ou gaern aes Fondue:-)!

Dae mit Foeteli "schnaeu" ufaeladae isch eifach ae Ilusion... i los lo si, sorry... due sae drfuer uf FB...

Back in Manila: Mami u Papi ufgablet

2011-01-24T10:58:00.003+01:00

I has de tatsaechlech gschafft u bi geschter, zimlech Haus ueber Chopf (ha gloub aes paar nae Luet as Bei pisst) ufbrochae, mit em Tricycle a Hafae, uf d Faehrae und i Minivan nach Kalibo. Im Minivan hani de no ae ganz ae naetti Familie kennaeglehrt, aes Filipina Mami mit ihrem Sohn u sirae Fruendin wo z Oustralie schaffet. Die hei mi de z Kalibo gad woeuae mit uf Sightseeing naeh, aber i ha mer zersch aes Hotel mueassae suechae... das isch de chli kompliziert gsi, wiu dr Driver mi nid verstangae het, het er mi eifach zum Flughafae brocht, aber i ha jo no chli Kalibo woeuae go aaluegae. Jae guet, aer het de mou Hotel tschegget u het mi eifach zu irgend emnae totau abglaegnae brocht... I ha de naer gfungae, super guenschtig do blibi. Drfuer hets nuet angers aus aes IIchoufszaentrum ir Noechi gha... vo daem haer hani vo Kalibo jetz nuet angers gseh aus Gaisano Mall. Und dr Paul, wo oepae 19i isch und ir Beitz woni gaessae ha gschaffet het, meint jetz i sig sini Fruendin. Genau.
Auso u huet bini jetz Kalibo Manila gflogae, ha mi vom Domestic zum International Airport lo chauffierae u ha naer ae Ewigkeit mit dr Airport Security diskuttiert wieso si mi nid zur Arrival Area ufae wei lo. Doert woni ha muessae wartae, bini naemlech no nie gsi, i bi oemu nid doert acho... u drum hani fasch chli schiss gha, dasi am fauschae Terminal stoh. Uuuuh do hani mi wieder ufgregt und ae huufae Fuckings i mim Chopf vo mer gaeh. Aber wichtig isch jo, i ha de Mami u Papi gfungae, das heisst si si minae SMS-Directions gfougt und hei mi gfungae, u naer wo de dr unfruendlech Security het gesh dasi wuerklech mini Euterae gsuecht ha und nid numae ae Bombae ha woeuae platzierae, het aer ues de naer o wider ufae glo id Arrival Area wiu doert si die normalae Taxi naemlech... isch chli kompliziert gsi, aber aer het de du no 50 Pesos (jo huerae viu fuer daser mi so gnaervt het) uebercho.
Jetz hani auso mini Euterae wider nach Ermita is Friendlys Guesthouse gschleipft... aber s Zimmer isch ehrlech gseit nid so toll. So de wiui sae jetz mou ufweckae und zum Znacht usfueaehrae:-)!

Bi irgendwie z Boracay blibae hangae... Ich mag das! ;-)

2011-01-22T08:04:00.002+01:00

Jetz hanis de gschafft. Ae ganzi Wuchae Boracay. Ohni o numae irgendoepis zmachae... schlimm schlimm schlimm. Aber i ha jo schliesslech Ferie:-)! Auso eigentlech het mer jo dr Phil aebae woeuae zeigae wie mae duet Kiteboardae... aber das entweder kenae oder z viu Wind het, isch das scho mou zimlech is Wasser gheit. Auso eigentlech machi dr ganz Tag nid viu meh aus aessae, a Strand ligae, dr Strand ufae und abae wanderae und am Obae wider is Hangin, mini Stammstrandbar uf dr Bolabog Sitae... u naer wird aebae eifach mou d Nacht duerae gmacht, u dr fuer dr haub Tag duerae gscloffae. Das doent jetz u schlimm... aber i due wenigschtens numae d Nacht duerae feschtae, die angerae deprimiertae Kitesurfer voe am Morgae naer o scho wider mit Bier a. Auso eigentlech hoerae die gar nid uf. Drum het gloubs dr Phil o scho aui mini Imodium brucht, wiu aer sech ufaerae Bier Diaet befindet, haha.

Auso dr letscht Bricht isch jo vo Roxas cho... am 8ti hani de aendlech mit minae noeiae Wauschae Gspaendli (woni ungerdessae leider scho wider verlorae ha) uf d Faehrae u am 9i simer de aendlech abgfahrae. Naer hani ganzi 4.5 h vor mi haerae gschwitzt, Rattae, Mues und Kakerlakae zoeut... auso mit schlofae isch jo scho mou nuet gsi. Naer choemae mer auso am haubi 2 am Morgae z Caticlan ah und muessae uf die erschti Ferry wartae, u die geit natuerlech erscht am 5i. Naer hani auso 3 Stung im Hafae ufem nae huerae Chrueppu-Baenkli gschlofae, aber wie gseit immerhin hani chli choennae schlofae... aendlech z Boracay si mer de z 6t (mitem Fahrer) u uesem Gepaeck is Centre (D' Mall) gfahrae ufemnae Trizcycle, hei doert zmoergelet ues aes Hotel gsuecht und si go pennae. Sit denn hani leider die angerae 4 Franzosae nuem gseh... wiu i ha naer oepae bis am 2 pennet u bi naer a Strand glaegae u ha spoeter mou dr Phil gsuecht. i derae Strandbar aebae im Hangin. Dr Phil hani schiinbar gad verpasst het mer doert einae verzoeut... naer hets mi fasch chli agschissae daem nochaezloufae u naer bini haut doert blibae, im Hangin, mitem Steve (das isch ae mega luschtigae Typ, teils Hippie teils Punk) und mitem Ricky (dae schaffet im Hangin, isch ae Filipino) und bi de naer mit denae 2nae i Usgang (Juice).
Am noechschtae Tag hani de oepae gad glich viu gmacht... numae dasi aebae no zum Phil zogae bi... Jo aebae, duerae Tag am Strand und am Obae i Usgang, einisch simer no ir Exitbar und Summers Place gsi (fuer die wo mou hie si gsi, die kennes sicher) und naer si mer no ir Jungle Bar arae Full Moon Party gsi. Die isch am Afang no kul gsi, wiu wuerkelch aui mega tanzet hei (i bi mer scho fasch sicher die meischtae si unger Drogae gsi)... aber nachemnaeh wiili isch d Stimmig chli abgflaut und de bini de ou gli mou hei. Doert hani no dr Sven u dr Olla, 2 Duetschi kennaeglehrt, woni jetz egentelch die meischti Ziit mit verbocht ha. Ich mag das, chani do drzue numae saegae.

Ok, i gibes zue, das doent aues chli laengwillig... isch meh chli ae Uflischtig vo woni bi gsi aus wasi gmacht ha... aber aebae, i ha jo nid wuerklech viu gmacht. ;-)
Eigentlech hani huet woeuae go touchae, ha aber naer ke funktionierende ATM gfungae und ha drum entschidae, isch jo glich, i cha de sicher no gnue go touchae. Sig z Boracay eh nid so schoen.
Auso fausi jetz no ae ATM fingae gangi mi Flug go zaehlae (dae isch numae fang reserviert) u de geits de morn uf Koliba und am Maenti, hoffentlech puenktlech nach Manila, damit i Mama u Papa cha go abholae:-)! I froeiae mi, wird oepae Ziit, dasi hie waeg chummae...

Boracay

2011-01-21T09:45:00.004+01:00

So, das mou gits nid ae laengae Text, drfuer Foeteli:-)! Ha so lang gha zum ufaeladae dasi jetz gar nuem ma schribae... aber eigentlech gits eh nid viu z saegae. I bi jetze z Boracay, aes het massaehaft Touris, d Sunnae schiint aendlech, s Wasser isch warm und aus woni hie machae isch feschtae.
Das isch d Autstadt innerhaub vor autae Stadtmuur "Intramuros" in Manila, und gloub ungefaehr die einzigi Sehenswuerdigkeit, naebscht dae Shopping-Malls.

Huups, irgendwie, isch das verchehrt... egal. Das isch s Fort Santiago innerhaub Intramuros.

Hm irgendwie hanis nid so im Griff mit schribae... Auso das isch dr Roxas Boulevard, Manila Bay.

Wiehnachts-Beluechtig a dae Paumae, Roxas Boulevard.

Uf dr Fahrae vo Batangas nach Puerto Galera
Am Strand vo Sabang...
Spaziergang im Dschungu
White Beach, Boracay. Do isches no bewoeukt, aber ohni Raegae,
Und scho chli meh Sunnae (huet hets uebrigens kei Wulchae:-)
Sunnaeungergang White Beach
Geng no White Beach... gseht chli dueschter us.
Bolabog Beach uf dr angerae Sitae vor Inslae. Das isch wie mae gseht do wo aui Kitesurfer si. Sit i hie bi, sit am Maenti, isch dr MIttwuch dr einzig Tag gsi wo si wuerklech hei choennae go, Maenti u Zischti isch dr Wind viu z Starch gsi und jetz hets kei Wind meh... die armae Touris wo numae zum Surfae do anae si cho, draeiae duerae... und was machae si, we si nid choei Kitesurfae? Genau, dr ganz Tag suufae...
Do wohni im Moment gad, bim Phil woni z Manila ha kennae glehrt. Aer mietet das fuer 3 Monet, aebae zum Kitesurfe.... Das isch so wienae chlinae "Resort" mit oepae 10 so Hueser, wo eirae vo dae urspruenglaechae Boracay Familiae ghoert. Doert hets auso houptsaechlech Filipinos und Langziittourischtae-Kitesurflehrer. Isch mega kuul, jedae kennt jedae und sgit oepae 3 Mou ir Wuchae Barbecue...
Und das ischs Centre vo Boracay, mit dae beruehmtae Tricycles.

Stuck in Mindoro

2011-01-15T09:38:00.002+01:00

Puerto Galera, oder Sabang, isch doch verglichae mit Manila chli einsam... hie hets ae Tonnae Russae und Duetschi (auti Mannae) wo am Obae vou Party machae und Filipinas abschleppae (jo ganz ehrlech, das wideret mi ah), auso definitiv nid mis Vouk... zum Glueck hani mer aes kuuls Diving Center usgwaeut mit ganz naettae Luet, mit dr Shirley u dr Bunny vo China, u mit de Filipinos vom Touchcenter bini jetz die letschtae 2 Taeg umaeghanget. S Touchae isch kuul gsi (fuer die wo mi Blog scho lang kennae, jetz fougt d Schwaermerei ueber d Ungerwasserwaeut und d Feststeuig dasi soett Meeresbiologin waerdae), d Sicht isch zwar nid so klar gsi wie zum Bispiu z Sharm el Sheik, aber aes het mega viu Korallae gha, mit so Vichli druffae woni wuerd schwoerae dases ae Pflanzae isch wenn si nid ou zwueschaeduerae saeubschtstaendig wuerdae umaeschwuemmae, i aunae Farbae u naer ganz ae huufae u luechtigi Nudibranches, die komischae Schnaeggli-Dings ohni Huesli, mou abgseh vo aunae Fischae und i bi 100% ueberzuegt das die violettae Anemone ir Nacht luechtae! Auso uf jedae Fau bini 3 mou go touchae, ha mi jetz aber drzue entschidae witer zgo, obwou s touchae schiins rund um Puerto Galera am beschtae sig. Ah jo, geschter am Nomi hani jo no ae Dschungelspaziergang gmacht... ha mi auso numae einisch verirrt... na ja, irgendeinisch het mer auerdings dr Bon Jovi Bed of Roses entgaegae gsungae u de hani daenkt muesi ufem richtigae Waeg si. Bini natuerlech nid gsi (Bon Jovi het mi vou verarscht), bi de eifach widermou bim nae Huesli glandet u die naettae (wuerklech sehr naettae u hiufsbereitae und nid hingerhaeutigae) Filipinos hei mer immer wider ghulfae. Isch auso no intressant wie die Laebae so Zmitzt im Waud, aber glich mit Strom u Wasser. Eh ja nu, 127 Muggaestichae spoeter hanis oemu de ou wider i mis Kaff gschafft:-).

Im Moment steckeni jetz gad in Roxas (uf Mindoro, wiu i gloubae uf jeder Inslae hets es Roxas) fescht und wartae uf d Faehrae... bi am Morgae mitem Jeepney (vo denae lisst mae geng u weis nid wases isch, bis mes mou gseht: sisch eifach ae verlengerete Jeep) nach Puerto Galera doert bini i noechscht Jeepney gschubst wordae und 2 Stung er Kueschtae entlang nach Calapan kesslet... dr LP seit jo, aes sig ae sehr schoeni Strecki: leider hani nid usaegseh wiu das Teil so mit Luet vougstopft isch gsi und i no mitem Rueggae zum Meer bi ghocket und Stross saeuber het mi liecht ad Outobahn im Aargau erinneret. Bi de doch froh gsi hani z Calapan i einigermasse bequem, obwou natuerlech ou wider vou gstopft Minivan ha choennae umstigae... immerhin isches so bequem gsi dasi ha choennae schlofae. Saeubschtverstaendlech hani ou oepis vo dae Doerfli, gruenae Riisfaeuder, Chiuchaenae und sehr saeutsamae Friedhoef mit bercho (jo irgendeinisch gits de o Foto). Und jetz 4 Stung spoeter bini aebae z Roxas u ha feschtgsteut, das 4i-Faehrae spontan zur 8ti-Faehrae isch wordae, wius keni Luet het... und das heisst de, dasi erscht am 12i z Caticlan achumae und fouglech aeuae erscht am noechschtae Tag uf Boracay cha. Wenigschtens hani hie aes par Franzosae gfungae wo ou fescht steckae, de hani oemu chli Ungerhautig.

Jo und was gits schuesch no? Mues jo no 3 Stung ueberbrueggae (mini noeiae Reisegenossae hei mer versprochae si choemae mi cho holae, faus es doch no ae Fahrae chli frueaecher gaeb)... Auso Tourischtae hets nid wuerklech viu, oder oemu keni wo dr Land- und Wasserwaeg waelae. I gseh natuerlech nid wuerklech was dr Sinn vom Reise isch wemae numae per Flugi reist. Mou abgseh drvo dases schneuer geit mitem Flugzueg, isches so o viu guenschtiger mit dae Local-Busae. Jo aebae u naer hets haut eifach wuerklech sehr viu wiisi Mannae hie... Frouae hets fasch keni. Z Sabang hets 2 Typae Tourischtae gha, d Toucher wo am Morgae fruaeh goe go touchae... und die angerae wo numae ir Nacht usae goe go Suufae und so. S git auso hie ou San Miquel Bier, u s Logo gseht zwar glich us, aber aes isch Philippinischs Bier. Na ja aes isch gniessbar. S Waetter isch Semi-guet, vori hets gad gschiffet. Und es isch eigentlech ou hie, wie z Manila meischtens bewoeukt, aber raegnae tuets geng numae ganz churz u saeutae. Brun wordae bini aber nonid richtig... ha aebae bis jetz ou meischtens ae laengi Wetsuit annae gha... Das waer jetz aebae de s Ziu z Boracay, mou chli brun waerdae:-)!

Jo und sowiit gfauts mer eigentlech super. Aes isch wuerkelch aues super easy, jedae cha aenglisch, die meischtae si eifach numae naett u versuechae di nid z verarschae (bis jetz) und ou s aessae isch einigermassae gniessbar;-)! I gibes zue es isch eher saeutsam, s meischtae isch eifach sueess, auso d Fleischgricht, Gmueaess aessae si fasch nuet und a dae Porkchops hets meh Fett aus Schinkae. Aber mou abgseh vo ihrnae eigetae Fastfoodchoettinae (Jollibee), hets ou huerae viu MacDonalds, Starbucks, TGI Fridays, auso quasi aues wos brucht fuer mi zum ueberlaebae:-). S Watter isch ok (immerhin besser aus deheim) und es isch immer warm. Und d Landschaft isch natuerlech ou nid z verglichae mit deheimae. Aber i bi mer sicher em Mami u em Papi gfauts hie, ou we nid aues, de sicher s eintae oder s angerae Plaetzli...

...aendlech am Strand!

2011-01-13T06:24:00.002+01:00

So nach daem i ganzi 3 Naecht z Manila umaegamlet bi, hani mi aendlech choennae losrissae u bi jetz z Sabang (zum Glueck isch do no aes N drinn), z Puerto Galera und wartae uf mi Check Up Dive.
Manila Bay isch aebae nid wuerklech zum suennaelae gsi u vorauem hets Waetter o nid so mit gmacht. Sisch zwar nie wuerklech gruusig gsi, aber eifach immer bewoeukt, numae am Morgae am 8ti (denn weni gschlofae ha oder gad is Bett bi) het d Sunnae churz gschunae. Ou schuesch hets nid wuerklech viu z gseh gha ir Houptstadt... bi am erschtae Tag duerae RizalPark und Intramuros und s Fort Santiago go aaluegae, u am Obae em Roxas Boulevard no zrugg, isch auso wider mou ae Tageswanderig gsi:-)! Am erschtae Obae bini mitem nae Duetschae nach Makati eis go zieh, aer het doaert mitem nae Filipino-Kolleg abgamcht u i ha mi eifach aghaenkt... am 2tae Obae hanis vou verpasst is Bett zgo, u am 3tae Obae hani scho wider die ganzi Nacht duera ueber Gott und d Waeut gschnuret. Das isch eifach super gsi. Irgendwie hani chli Schiss gha, dasi niemer kennaelerae und im Friendly's Guesthouse (Mues chli Reklamae machae) isches gad s puurae Gaegaeteil gsi, i gloub i ha no nie innerhaub vo so churzer Ziit so viu verschiedeni Luet kennaeglehrt :-D... und komischer Wiis faehlae mer ungerdessae scho aes paar vo dae noei entdecktae verwandtae Seelaenae (so aus Backpacker teilt mae doch die einti oder angeri Waeutasicht).
Aebae jo schlussaendlech hani de doch gfungae, i cha jetz nid die noechschtae 2 Wuchae z Manila blibae u drum bini mitem Bus geschter witer nach Batangas u naer mitem Schiff nach Sabang... das isch ganz eifach gsi und guenschtig... sehr ueberraschend nach daem mi dr erscht Taxidriver vom Flugi nach Malate scho abzocket het. Das isch so nae gnaz naettae Paepu gsi, wo mit mer ploeiderlet het u aer het mer sogar sini Nummerae gaeh fausi mou aes Taxi bruchae. U waehrend ig naer bi usgstigae u mis Gepaeck usem Kofferruhm gno ha, het aer s Taximeter abgsteut u gseit aes choschti 1250 Pesos... u i ha s no luschtig gfungae, aes waerae naemlech numae 125. Aer het aber de das steif und fescht behouptet, und bis zletscht hanim de 500 Pesos gaeh. Drbi hani jo genau gwuesst das er mi verarscht. Aber es isch haut no schwirig z beurteilae wenn ae Taxifahrt vo 20 Min ir Schwiz 20 Franke choschtet und ae 45 Min-Fahrt z Manila numae 3 Franke soeu si...
So i mues go touchae...

Fix und fertig...

2011-01-08T00:11:00.005+01:00

...bini hüt nachem schaffä gsi. Aber äbä ou numä mitem schaffä. Packt hani natürlech immer nonid. I go nämlech morn id Ferie. Uf d Philippinä:-)! Sächs Wuchä! Sächs fucking Wuchä numä Sunnä (zzz vo Monsoon wotti gar nüt ghörä)!
Jo auso, id Ferie hani jo scho lang wöuä! U letscht Wuchä hani ändlech buechet! Am Mänti hani s Visa bercho. und geschter hani dr Lonely Planet kouft. Und jetz steit äbä no packä ah... aber für die wos nonid wüssä, i ha nid numä für mi buechet... sondern für die 2 Pensîoniertä ou no gad. Si chömä aber erscht i 2 Wuchä! Und öb mers de zämä ushautä, das lö mer jetz no offä:-)...
Aber zerscht gits no d Föteli vom Siuvescheter und vor Fasnacht z Bürä :-):

Bir Melä und bim Robi hets das Johr äs Raclette gä, und mit ihrem Bsuech vo Argentinie hei mer de nachem ässä no "Bleigiessä" gmacht....
Bi mir hets ä Huufä Musegageli gäh! Was seit das über mini Zuekunft us?
Und är Celine ihres Dessär... Glückssöili fürs nöiiä Johr!
Und d Mädels ar Fasnacht! Leider gseht mä d Deko nid so guet (Ängusflügeli und ä Heiligäschiin - sehr passend - natürlech)
Hm, wär het eigentlech do geng äs Glas is Biud??? Das isch übrigens d Fabä, är Isa ihri Schwesä (nachdäm d Isa u Caro scho früähziitig verseit hei, hani haut mit ihrä witergfiiret)
Und tatata, dr Steve Urkel :-)

Wiehnachtä 2010

2011-01-02T17:13:00.003+01:00

Am 24igscht hei mer deheimä Mami's Geburi gfiiret! Während d Schwoscht dr Boum gschmückt het, hani si gschmückt, hihihi!

Das isch em Häxli sis Gschänkli gsi... aber i gloub si het Angscht gha drvor u jetz spilä haut s Tigerli und s Maueli, unds Umgheii-Büsi drmit...
S Mami het Täuerservice gmacht...
Und d Schwoscht het serviert.
U am 25igscht hei mer de bir Chrigä und bim Jérôme Wiehnacht gfiiret u Päckli uspackt. Z ässä hets Räschtä vo Claire's Geburi gä! Das dönt jetz doof, aber äs isch no sooo viu Fleisch übrig blibä, u de hei mer eifach Tischgrill gmacht... und d Schwoscht het no ganz feins Risotto drzue gmacht.

Nachem ässä hei mer de no dr Kim ihrä nöi Schlittä iigweiht! Dä isch super guet acho! I ha leider nid so lang mögä zieh, drum het när dr Papi, auso minä, müässä übernäh und am Schluss si mer no s Bördli ab gschlittlet... auso d Ching s gschlittlet! Hei mega Fröid gha :-D
U no s Sämi mit dr Chrigä ihrnä Häntschä!
U am 26igscht hei d Ladies und ig de no bir Sarah Wiehnacht gfiiret, das heisst d Sarah het üs zum Brunsch iigladä und üs ihres Böimli präsentiert! Und sogar d Martina isch äxtra cho :-D!

Tja si auso wider mou ganz tolli Wiehnachtä gsi, gstresst wie geng hani ou das Johr mini Päckli aui ir letschtä Sekundä iipackt und das Johr hani numä 1 Kilo zuegno, trotzt Dauerfressen :-D

Fotoshooting

2010-12-31T09:45:00.003+01:00

Mami u s Piry

2010-12-30T18:25:00.003+01:00

Do gseht mä mou was s Piry und mis Mami geng hiner mim Rüggä machä;-)

D Heubauä komplett usnang nä und när gaaanz unschuldig dri luegä...
U när no schmüsälä zämä...

Claire's Geburi

2010-12-29T11:51:00.002+01:00

Am 11. si mer uf Thun zur Claire go Geburi fiirä... zerscht hets aber mou gheissä, häufä ufsteuä:

Dr Papi u dr Tinu am Tischtuech zämäflickä. Mir si so beschäftiget gsi mit Bartischli mit Tischtuech iipackä, das mer dr Gschänklitisch vergässä hei u när hei mer nüm gnue Tischtuech gha:-(! Aber die 2 Herrä hei das Problem super glöst :-D

S Mami het sech um d Deko kümmeret,hihi! (Heiligäschiin?)
Und so gsäch äbä s Stockhorn vo vorä us!
Jeje u Mami mit Hulahula-Verchleidig...
Und no ig mit Hulahulaverchleidig, Heiligäschiin...

Wiehnachtsmärit Strassbourg

2010-12-29T11:18:00.005+01:00

Das Johr bini anstatt mit mirä Schwe uf Freiburg, mit em Berlin-Wien-Team uf Strassbourg a Wiehnachtsmärit. Usser gässä u trunkä hei mer eignetlech nid viu gmacht;-) u i gloubä d Biuder sprächä für sich!

Energy Stars for free

2010-12-29T09:55:00.004+01:00

Mini Schwöschter het äxtra zu mim Geburi Billet gwunnä für uf Züri as Gratis-Konzert vo Radio Energy. I ha natürlech meeega Fröid gha dasi zu denä priviligiertä 13000 Lüt ghört ha, und vorauem natürlech das dr Jeje nid het mit wöuä...;-)
Mir si de pünktlech am 5i zur Türöffnig bim Hauästadion gsi, u hei gfrungä äs heig z viu Lüt u mir mögä nid aastoh u si fangs is Holiday Inn gones Kaffi trinkä... dr Baschi het de die glichi Idee gha und isch näbä üs ghocket (i ha das natürlech erscht gmerkt woner gangä isch und mers mini Schwe gseit het... das heisst, i ha nä scho gseh, numä nid kennt...;-). So ä haubstung spöter si mer de wider zum Hauästadion überä trötschgelet u när het üs fasch dr Schlag troffä! Ungerdessä si nämlech scho dopplet so viu Lüt aagstangä:-(! Auso hei mer üs brav hinger aagsteut u innerhaub vo dä nöchschtä 15 min het sech d Schlangä gad no einisch verdopplet... Sisch aber de rächt zügig vorwärts gangä, d Security hets no rächt im Griff gha.
Jo u när wo mer de dinnä si gsi hei mer üs mit Znacht u Iistee versorgt u hei festgsteut, das mer doch eher zu dä euterä dört innä ghörä und s doch houptsächlech, mit äs paar wenigä usnahmä, numä Teenies het. Sisch äuä nid ganz äso schwär gsi a Tickets cho, wie mir dänkt hei... aber kuul isches natürlech glich gsi:-)!

Uhh Mischt irgendwie fingis Programm nienä u mis Gedächtnis isch doch sooooo schlächt!!! Auso i versueches mou: Alesha, Jason Derulo, Adrian Stern, Baschi, Bligg ( B L I Doppel G), James Blunt, One Republic, ähh Oropax, Tinkabelle aus Specialguest (u si het so Total Live gsungä, dasi si äm Jonsch sis Mikrofon brucht het zum sini Frogä beantwortä, statt das wo si ir Hang het gha, peinlich peinlich), irgend sones DJ-Duo (Remady?), ah jo Hurts:-) und dr Christopher Maé. Hani ächt öper vergässä? Ah jo dr Marc Sway isch ou no Specialguest gsi:-) u dä het sogar richtig gsungä!

Und hie no speziell für d Miss B.: dr James Blunt:-)

Und One Republic...

Apassionata

2010-12-21T21:35:00.002+01:00

Das isch s Geburigschänk woni das Johr vo MuP zum Geburi ha bercho, am 21. November si mer, nachem Geburi vor Eva z Unterendingen uf Züri go Apassionata go luegä. Die letschtä paar Johr hei mers äbä geng verpasst, wiu i geng i där Ferie bi gsi... sisch auso sehr schön gsi, Merci Mami u Papi!

Wünschä no ä schönä letschtä Wiehnachtsobä, hoffä dir heit ou aui so viu gässä u so viu Päckli zum Uspackä gha wie ig :-)!

Vinifera

2010-12-19T19:08:00.003+01:00

Voremnä Monet (scho wider genau voremnä Monet) si s Berlinteam mit Zuesatz vo mirä Schwe z Bieu im Pavion (Le Pavillon) ar Vinifera gsi go Wii deguschtierä... Beschtä Dank ad Spänderin Corinne vo dä Billet. Isch no witzig gsi und mir hei glehrt das mä würklech nid immer sött schlückä... aber wiit u breit hets niemer gha wo Wii usägspöit het. Guet auso während mini Schwe und ig Eiswein deguschtiert hei, us Mitleid wius keni Lüt am Stang gha het, was säch natürlech umgehend gänderet het, nachdäm mir Reklamä gmacht hei, hei die angerä 3 Damä flissig iikouft.
Wie sechs ghört simer när no eis go zieh... numä Bier het niemer meh mögä und so isches zu däm Ussergwöhnlechä Ereigniss cho, dass mer is Tiff si go nes Wasser trinkä... I würd sägä, das isch es noch nie dagewesenes Phenomen!

Sarahs Konzert

2010-12-05T21:01:00.002+01:00

Am 12. November si d Melä, d Celine u ig u per Zuefauhei mer ou no d Sonja aatroffä, uf Lyss id Chiuchä äs Konzert vo Sarah ihrem Popchor go losä. Äs paar Lieder si guet gsi, äs paar Lieder si weniger guet gsi, äs paar si schnulzig gsi, äs paar si vou fetzig gsi und so ganz augemein hets guet tönt u vorauem vo Sarahs Solo/Duett si mer ganz beidruckt gsi:-).

Und hie no ä Hörprob;-) Simply the Best!

U när si mer natürlech no äs Bierli go trinkä id Kreisubar, d Sarah isch zwar nid mitcho wiu si no mitem Chor isch go ässä, aber mir heis u luschtig gha u das mache mer sicher wider einisch...

Im Stall..

2010-12-05T20:11:00.002+01:00

Uf d Gfahr hi dases nech scho uf d Närvä geit:

Miiiiiis Piry mit ihrnä nöiä Staukollegä! Das heisst dr Teddy het si natürlech scho vorhär (bevor si het afo lahmä) aus Weidegspändli gha aber das si jetz z dritt si isch nöi, auso nöii drbi isch jetz no s Goldie. S gfaut nä auso super denä 3! S Piry isch imfau rächts us Füdlä ir Mitti isch äm Teddy.
Und hie no im Stau mit ihrer wunderschönä nöiiä Bucas Dechi!

Stockhorn

2010-12-03T22:11:00.012+01:00

Vor fasch em nä Monet, nei genau vor eim Monet, hani äs Tägli frei gha u ha mitem Nici ä Pensioniertä Usflug ufs Stockhorn gmacht... "pensioniertä" Usflug, wiu mini Eutärä vor äs parnä Wuchä dr glich Usflug gmacht hei und ou, wiu mir 2 uf däm Höger definitiv die jüngschtä si gsi u mit Usnahm vorä jungä Familiä, die einzigä wos Pensionsauter nonid erreicht hei. Wie dir gseht hei mer super Wätter gha u si äs Wiili lang sogar im Tiischi umäspaziert! Usser ufem Gipfu, dört isches so riiiiiichtig schweinekalt gsi! Brrrr!!! Zum Glück hei mer vorhär ä sterchendä Brunch gha, süsch hätt mers äuä nid ufä Gipfu gschafft (wärä sicher ungerwägs iigfrorä we mer üs nid vorhär chli fett aagfrässä hättä). Aber äs het sech definitiv glohnt, d Ussicht isch geniau dört obä! Päch für au die Pensioniertä wo sech nid dürä Schnee ufä Gipfu hei mögä kömpfä! När hei mer aber chli verseit u si mitem Gondeli id Mittustation zurgg gfahrä... üsä Plan wär zwar gsi, abäzloufä, aber äs het so viu Schnee uf dä wanderwägä gha, das mer üs leider leider leider hei müässä dr gägä entscheidä. Si de aber när (aus einzigi, die Pensioniertä mit dä Wanderschueh und -stöck hei ou do wider verseit) vor Mittustation uf E-bach (weis scho nüm wie das Kaff heisst) abäglofä u hei üs de dungä när no äs Gläceli, resp. äs Vermicelle gönnt. Und, läckdumir, hani am nöchschtä Tag scho Wadlimuskukater gha...

Mini Zuckerschnutte..

2010-12-03T21:44:00.004+01:00

Mini Zuckerschnuttä am Zuckerrüäbä mampfä... U dr Narym steckt sini Nasä überä und isch ganz iversüchtig.

Sones Schnuggi
...hm, isch aber leider ganz dräckig...
...uh no vor angerä Sitä...
.... Rägäbogä ...
Oh die 2 Süässä...
... schad isch dr Narym ungerdessä uf Thun züglet ...

Isch schad, aber är het jetz ou äs nöis schöns Plätzli u s Piry het drfür jetz dörfä hingerä zügle u teilet dr Stau jetz Tag und Nacht mit em Teddy u em Goldie. Usserdäm darfi s Piry jetz wider ritä, sisch zwar nonid ganz guet mit ihrem Scheichä aber scho wider so guet, dasi langsam langsam wider darf ufbouä... aber haut würklech numä langsam langsam... im moment mitem Schnee u Iis isch haut nid so gäbig, u am Mänti hets mi dünkt si lahmi wider... u hüt hani drfür wider nüt gmerkt... aber uf jedä Fau isch si munter und gfräsig und zackig ungerwägs wie geng:-). Mini Zuckerschnutte...

Wüsst dir eigentelch scho...

2010-11-30T17:39:00.001+01:00

dass ig demnächscht 2 Mönet cha verschmwindä?

Indiä, Südafrika, Philippinä, Indonesiä, Myanmar, Japan, China, Vietnam, Nepal, Bangladesh, Sri Lanka, Dubai, Brasiliä, Chile, Argentinie, Kenia, Mexico, Madagaskar, Fidji, Singapur, Bolivie, Peru, Ecuador, Kuba, Seychellä, Karibik, Tansania, Marokko, HongKong… ?

[schnee] für d Martina :-)

2010-11-28T22:44:00.003+01:00

Keine Verbindung.

2010-11-26T13:26:00.001+01:00

Mini Plän vo wägä Föteli i Blog due hei Leider nid funktioniert, wiui am Mänti am Obä Bsuech vo eim vo minä nöiiä nättä (u sehr jungä, für gad mou aui Grücht us dr Wäut z schaffä) Nachburä ha übercho, u dä het churzerhand mis Internet usser Stand gsetzt. Är het sech de ou sehr Müäh gäh und het jetz vier Täg lang probiert und knorzet… aber… leider geits immer no nid.
I bi auso vorübergehend und bis auf weiteres… Offline.

Frei...

2010-11-22T12:50:00.003+01:00

Fürs Euterwärdä so richtig z gspürä hani hüt u morn u übermorn frei gno. Traditionellerwiis gangi jo a mim Geburi geng chli furt, da i aber a) niemer ha wo mit chunnt oder b) das Johr scho gnue Städtereise gmacht ha oder c) eifach kei Gäud ha (oder d) i äbä würklech langsam chli aut wirdä u nüm so furt mah), hani beschlossä das Johr haut deheimä z blibä, aber go schaffä isch uf jedä fau äs NoGo! Drum hani frei u bi jetz gad chli deheimä am umädrolä... ha mi nid chönnä zwüschä Fänschterputzä und Chleider glettä entscheidä und ha mi drum dr zue entschlossä s Fotochaos uf mim Compi mou uf z ruhmä, d Föteli im Web abzspicherä und mi Laptop ändlech mou zum flickä z bringä, wiu mis CD-Loufwärk sicher scho sitemnä Johr nüm funzt. Tja aber bevor dr Lapi zum Döktu cha, muässi säubschtverständlech sämtlechi Blogiiträg wo no usstöh nochäholä...

Auso das isch no äs Föteli vo mirä Lieblingschwöschter ihrem 30igschtä-Geburi Feschtli, wo si mit dr Andrea zämä gmacht het, am 8.10.2010. Jo säubschtverständlech hets 2 - 3 Lüt meh gha, aus do ufem Föteli si;-)! Das isch no bim Ufsteuä gsi, u wie mä gseht hets Raclette gäh! Mir heis luschtig gha und si erscht spot ir Nacht hei und üsi Fürwehrmannä hei de ufem Heiwäg no ä brönnendi Grüäntonnä glöscht...

Heit dr eigentlech scho aui mitübercho das d Melä wider do isch??? Sit Mitti Ouguscht si si wider do, u mir hei nang scho äs paar mou gseh u i ha jedes Mou äs Föteli vorä gmacht für i Blog, aber i has när nie i Blog do:-(! Auso hie isch si: :-) (U dr Robi isch natürlech ou wider umä!)

Sommervögel

2010-11-10T12:38:00.003+01:00

Am Mänti bini mit Mama und Papa im Chino gsi. Mir si go Sommervögel luegä, und i cha dä auso numä witerempfählä, hanä auso wäutz guet gfungä. Vorauem für üsä Uslandschwizer chani nä empfählä;-). Aber i wott natürlech do jetz kei Fiumkritik abgäh, göht nä gfälligscht säuber go luegä! I finge äs lohnt sech.

Yeah, Golden fucking Circle, Baby!

2010-11-09T21:07:00.010+01:00

Yeeeaaaahhhh, i gangä nöchscht Johr dr Bon Jovi go luegä und zwar gaaaanz zvorderscht vorä, juhui! Mitemnä huufä kreischändä Wiiber und öbi dr Bon Jovi würklech vo nochem wott gseh weisi ou no nid;-), wiu gemäss dr Celine u ihrem Bürogspändli wärdä mer garantiert sini Schweisstropfä ab übercho, hihi! Na ja, ig aus Anti-Groupi ha natürlech ä Usred parad: i wott numä so wiit fürä, damit i ändlech gseh öber Fautä het oder öb er Liftingspurä unger dä Hoor versteckt, und natürlech ou öb die Hoor überhoupt no ächt si! Hihi! Oder öber vo nochem ou so geil isch wie vo wiitem :-D!

(Und bevor dr nech übers "fucking" beklaget: das isch mi Blog und i darf das. Punkt.)

Korrektur

2010-11-09T20:41:00.004+01:00

Huupsi di puupsi di mir isch do äs Fählerli ungerloufä wo mi d Miss B. fründlecher wiis het druf härä gwisä.

Und zwar isch dr Krause-Kopf hinger dr Rosmarie nid dr Andyyy sondern dr Rolf! Offäsichtlech isch das Ässä scho so lang här dasi mi scho nüm cha dra erinnerä das dr Andy spontan churz vorhär abgseit het. Huups, tschuldigung Rolf.

Vieux Manoir

2010-11-07T18:44:00.005+01:00

Im Sptember si mer mit dr Budä go ässä is Vieux Manoir z Murtä! Wiu mir so flissig Grät verchouft hei, hei mer vo eim vo üsnä Liferantä ä Guetschiin übercho für fein go z ässä! Da mir nid jedä Tag im nä 14-Gault-Millau-Punkt-Restaurant ässä, hei mir üs natürlech ou speziell schigg gmacht:-)! Da i nid würkelch viu schiggs ha, hani mini in Vietnam poschtetä Chleidli fürä gno... Hm, eis drvo, geit mer leider scho nüm:-(, nie getragenund scho passi nümä dri. Is Zwöitä passi no, siehe Föteli;-):
Ha mi aber de du glich drgägä entschidä (wägem Usschnitt natürlech). Und nei, i ha mer nid s Decollté verbrönnt, das isch brun und nid rot. Geanu, auso da hani nech nid wöu vorenthautä, wius äuä s einzigä mou isch gsi, woni das Röckli annähagha, ou wenns numä zum probierä isch gsi. Aber vermuetlech passi ou i das nüm dri, bim nöchschtä mou wonis wider probierä;-)!

Bevor mir im Juma-Saal a Tisch und uf üsi mit Samet ikleidetä Sässlä (Sässlä!!) hei chönnä höcklä hets uf dr Terrassa am See Wiisä und Apéro-Häppchen gä. Soooo schööön und soooo fein!

Ds Blänkli:-) So üsä Tisch, aber niemer passt uf...

So und jetz passä si aui uf:-): Blänkli, Benu, Rosmarie, Andi, Simu, Stötzu, Caflisch, Glauser, Renata, Herr Jordi, Pia und dr Dänu...

Dr erscht Gang: Wachtubrüschtli mit... ähm ähm öpis Grüens mitemnä Blüemli obä druffä! (Wenn mi Tisch Nachbar mir d Menüchartä wie versprochä kopiert hätt, de wüsstis no)
dr 2. Gang: Seetüüfu uf Ratatouille (und ä Härdöpfu)

Und dr Houptgang: Hasärüggä i Schinkä iigliiret und Wirsing uf irgendemnä Chüächli (ja ok i gibes zue, i cha mi nid äso gewählt usdrückä) und d Saucä weisi leider ou nüm, aber hanis scho erwähnt? äs isch seeehr seeeehr fein gsi!

Und no s Dessär: Melonen-Gelée und Melone-Sorbet. S Sorbet isch das obä druffä das isch sehr fein gsi. S Gelée isch gschmacklech ou fein gsi, mit Schoggibitzli und Pstazie drinnä, aber d Konsischtenz isch ganz gruuslig gsi. Mi hets liecht anes Silikonimplantat erinnert (nid dasi do nöcheri Erfahrigä hätt drmit), na ja i gloubä äs isch augemein nid so guet acho, oder vilech hets numä drannä glägä, das mir aui scho gstopft si gsi...

Und voila, wiui nech mis Outfit nid cha präsentierä, hie wenigschtens d Accessoire...

... und natürlech no wie gewohnt äs säutsams Föteli vo mir.

No vor längerer Ziit...

2010-10-30T11:27:00.004+02:00

Näbscht dä autä Föteli vom Py und mir, hie nomou äs uurauts Föteli. Das hani zwar vor Chäntlä vom Facebook klauet aber uf mim Blog darf das natürlech nid fählä:-)! Hm und wenimer das richtig überleagä, so aut isch jo das gar nid! Silvester 2004 in Grindelwald. Stephi, Celä, ig, Paddlä, Sarah, Sabrina, Chänty und Meli. U wär het äch s Föteli gmacht;-)?

Lila...

2010-10-27T22:29:00.002+02:00

Hiä, wie scho lang aakündet und vo euch abgstimmt die violettä Hoor:
Tja, s Ändresultat müässät dr scho säuber cho aaluegä, hihi;-)!
Hm, sit wenn tändieri eigentlech drzue so doofi Föteli vo mir is Internet z stöuä, hö?

Vor langer langer Ziit...

2010-10-04T13:11:00.014+02:00

Jaja, lang lang isches här... und so guet gseh mer ou nid us zämä bim Springä, das isch mer scho klar. Trotzdäm isch s Piry mi ganz Stouz:-)!

Hie gseht mä ganz guet, das mer üs döu mou nid so verstöh... ;-)

U das fingi auso ganz es kuuls Föteli:-)!

Teddy Piry Narym

2010-09-26T14:17:00.006+02:00

Gewandert...

2010-09-18T11:44:00.004+02:00

Vor langer langer Ziit (Afangs Juli) bini mit em Nici go wanderä! Mir si mitem Bähndli uf Magglingä gfahrä (nö, ufä loufä isch kei Option gsi) u si überä Twannbärg zur Twannbachschlucht gloffä... am Morgä hets chli nach Rägä usgseh, aber scho gli hets uf do und isch mega schön wordä. Mir hei de zwüschä dürä geng chli picnicät aber d Füürsteuä für üsi Cervalat (ghört doch drzue) hei mer leider verpasst. Am Nomitag si mer de när no z Twann a See glägä. Uh äs isch de gägä aui erwartigä no mega heiss wordä u so si mer o no chli go bädälä:-)! Isch ä super Usflug gsi!

Server Error

2010-09-16T21:36:00.005+02:00

Hellöu. Auso. Hüt am Morgä bini ufgwacht und s erschtä woni gseh isch ä Truppä Polizischtä ir Kampfusrüschtig vor mim Fänschter dürä huschä (okokok, die womini Wohnig kennä wüssä das das liecht über tribä isch). Und nei, faus nech jetz d Frog uf dä Lippä ligt öb sech dr Gsuecht i mim Chäuer versteckt: Nei. Säubschtverständlech nid. Wenn i öper i mim Chäuer versteckt, de isch das entweder dr Bon Jovi, oder dr Schoggi-Maa us dr Axe-Wärbig:-)!

Ja wat soll dat denn jetz? Willste misch verarsche oder wat? Google Server Error. Na denn gits haut keni Föteli. Zum Glück hani hüt no sooo viuuu spannendi Sachä erläbt, dasi nech no mindeschtens 15 Sekundä cha ungerhautä!

Hüt morgä hani, vermuetlech nid so zur fröid vo minä Chefä und Mitarbeiter, äs Burzutaggschänk für mini Schwe organisiert. Mini Schwe wird nämlech... tatatataaaa: 30gi!!!! Wooooohooo!!!! Morn. Und da sechs Frölein entschidä het ihrä Geburi nid mid üs sondern, uf irgend ärä sicher absolut nid schönä, nid romantischä, nid tropischä, nid blauwässrigä und nid sandstrandigä Inslä irgendwo im indischä Ozean z verbringä (isch ironisch gmeint ma dänk das mim Liblings-Schwöschti gönnä:-), hani churzerhang ihres Hotel kontaktiert und ärä äs Überraschigs-Geburtstags-Ferie-Gschänk organisiert! I hoffä das klappt!:-) Die vom Hotel si würklech sehr hiufriich gsi, numä die vor Mastercard ir Schwiz si mer huerä höllisch krass uf d Närvä gangä. Hmpf. De wirdi amä gäng ganz rot vo z'oberscht bis zungerscht... jaja das chunnt ir letschti relativ hüfig vor. Mindeschtens einisch im Tag. Jajaja... wartä no uf besseri Ziitä... u so lang blibi eifach im Bett. Guet Nacht.

Ha, und churz bevori wider vo zungerscht bis z oberscht Rot aagloffä bi, hets de glich no klappet:

S chlinä härzigä Migi...
Mit mim Mami...

Am füätterä...

Und am Kunschtstückli machä:-)!

Minä Euterä ihri Nachburä, und wes nach mir gieng wär das äm Piry ihri Weidegspändli:-)! Aber Mama u Papa si äbä no nid ganz iiverstangä u wei mer kei Stau bouä... aber i schaffä drannä;-)!

Das isch ünrigens im Juli gsi, Beibis si ungerdessä scho viuuu grösser.

Wiisä mit Holunderblüätäsirup...

2010-09-15T20:31:00.006+02:00

Gopfriedstutz nomou. Die verdammti Verschwörig!!! (Anmerkung der Redaktion: jo mir isch bewusst dasi dä Satz mit dr Verschwörig relativ hüfig verwändä.) Auso äs isch ä so, i ha ä Text gschribä und när Föteli iigfüägt. Und jetz si eifach aui Föteli vorem Text und dr Text isch am Schluss. Auso, ganz eifach: jetz zersch aui abäscrollä und läsä und wider ufä scrollä und d Föteli aaluegä. Und bevor dr nech froget: Nei. Die luschtigä Taschtäkombinationä wie Ctrl+C oder Ctrl+X oder Ctrl+V funktionierä i MIM Blogger nid. Cha si dases bi aunä angerä geit, aber bi MIM geits NID! Wuuuoooahh! Wuetusbruch. Ok gibes zue, ha mini Aggressionä ir letschti nid so im Griff... ähm, viu Spass bim läsä;-)!

So, das isch Mama und Papa in Saignelagier am Marché Concours am Weekend vor dr Streetparade (irgendwie so afangs Auguscht). I ha die wundertollä Hüet entdeckt u mini Euterä beuftreit so einä z schnappä u ha när äs Teschtföteli a mini Schwe gschickt. Isch säubschtverständlech akzeptiert wordä, wie dir jo ou scho uf dä Föteli im letschtä Biitrag heit chönnä erkennä.

Äs Jährigs bim Umzug. Vorem Umzug hei mer no chli d Show gluegt und i ha mer vo dä Verchoufsross s 8ti usgwäut. Aber s Mami het mers nid wöuä choufä:-(. Drbi wott si mer schüsch geng aus choufä? hm... na ja, s Py wär eh nid iverstangä gsi.

Burärennä mit dä Fühli: jööööööööhhhhh.....

Ohhh meeeein Gooott. Do hani jo wider mou ä riiiisssä Scheiss usgläsä zum im Fernseh z luegä. Tja i würd sägä do blibt mer nüt angers übrig aus wider mou ä Blogbiitrag z schribä! Haha. Schiint fasch so, aus hätti ir letschti nüt bessers vor aus die ganz Ziit im Internet umäzhangä. Ui, do chunnt mer gad i Sinn, mues mi gad usem Facebook usloggä, schüsch merkts no öper, dasi nüt bessers z tüä ha, meini. ... und tatatataaaa, schwupdiwup, hani ändlech mini Mail beantwortet und sogar no är Martina gschribä! Jetz müässti mi numä no äm E-Banking widmä und i hätt aui usstehendä Ämtli erlediget. Aber säubschtverständlech isch Blogiiträg für mini 3 tröiä Fäns schribä wichtiger aus Rächnigä zahlä! Tja sit dr Peschä 30 Johr lang keni Stürä zaut het hautet das d heufti vor Bieler Bevölkerig, inkl. mir sowieso nüm für nötig. Nei nei, die Ussag berüäht nid uf Faktä, ha das Drama nid so mitverfougt u ha mer das jetz us dä Finger gsogä. Soviu zum Wäutgschehä, zrugg zu mim Blog. Wo wäremer jetz? Konstanz, Gampu, Züri... ah jo Marché Concours muss es sein:

Blüüüüsecco und die pinkigen Cowgirls

2010-09-14T19:18:00.010+02:00

Wuuuuuuuääääh! I gloubes nid. Jetz isch mer das scho wider passiert! D Föteli woni i nä nöiä Post ha ufägladä si eifach verschwundä! ... verdammti ... Verschwörig!!!! Manno!! Wie weni Ziit hät für sonä Seich dopplet z machä, tssss. Geit mer fang wie ir Budä, i ha no so viu überfäuigi Biiträg z schribä, dasi gar nid weis mit was i söu witermachä.
Drfür hani jetz dussä wieni d Föteli ir richtigä Reihäfoug cha ufäladä:-).
Na denn, versuechä mers no mou.

Ufem wäg nach Züri, d Schwoscht am Zmittag und dr Jerôme isch sech no am style, isch
widermou typisch, dr Maa isch haut nid rächtziitig parat gsi;-).

Bi mer nid sicher was mini Schwe seit, aber i würd sägä, das isch äs Aaaaameeeiseeeenscheeeissseeee-Föteli. Dir müässt wüssä: "Ameisenscheisse" ischs nöiä "Cheese"!

Oh mein Gott was für nes Scheeeiss-Föteli. Finget dr nid ou i gseh us wienes Grosi?

Et voilà, und das isch jetz äs Blüüüüüsecco Föteli;-)! "Blüüüsecco" isch nämlech s nöiä "Ameisenscheisse"! Hihi:-)

Das het de när no uf "Caaaarbooon statt Condition" gwächslet fürs Calanda Lemon... und när natürlech schlussändlech no uf "Caaaaaipirinha"!:-) Mir heis nämlech das Johr gar nid eifach gha, schiinbar hei si dr richtig Aukohou vo dä Strossä verbannt. Iiiiiih hei mir gsuecht bis mer öpis angers aus Bier gfungä hei! Fündig wordä si mer de i üsärä Stammbeiz (jep, mir hei ä Stammbeiz und jep, dört gö mer numä härä we mer ar Streetparade si und jep, d Caipi choschtä 14 Stutz und jep, mir wüssä nid mou wie die Beiz heisst aber mir wüssä wo si isch und si het äs WC.)! S WC isch natürlech seeeehr wichtig: wiu bi mir isch s Caipi geng direkt id Blasä gwanderet. Bi mirä Schwe hets amä no ä Umwäg dürs Hirni gmacht, hiiiihiiihii:-D!

I üsärä namälosä Stammkneipä:

Pinkigi Cowgirls si mer das Johr gsi... d Ohräringli si nöi. und d Hüet si vom Marché Concours vom Weekend vorhär. D Bluemächöttinä si vo mirä Schwe. D Ikea-Family-Trainer-Jäggli kennet dr vilech no vor Fasnacht. Dr räschtä vom diesjährigä Outfit stammt vo dä Outfit vo dä letschtä paar Johr. I ha natürlech ou no die heissä violettä Schueh wöuä aalegä aber mini Schwe het us mir vöuig unerklärlechä Gründ nid wöuä;-). Jä nu, gemäss Celine si jo Schueh nach 3x tragä amortisiert. Und... dir wärdets nid gloubä, aber i ha sä sogar scho 3 x annä gha;-) (Sorry für die wo nid wüssä um weli Schueh dases geit, aber hani scho erwähnt das si violett- VIOLETT si?)!

Ah ja, ig... ähm... i üsem Stammlokal... ähm... jup, git nüt meh z sägä drzue.

Aaaah und doooo sisi ändlech: "Caaaaiiiipiiiiriiiiiiniiiiiiaaaaaa"!!!!

Hia u dr räscht no, bereits liecht beschwipst;-), ohni Kommentar:

Jubiläum

2010-09-06T21:33:00.003+02:00

Oh nei oh nei, fasch hanis verpasst, mitem Presslufthammer hani d 200er Margä überschrittä! (Für die wo mer nid chöi fougä, dr letscht Biitrag isch dr 200igscht gsi;-)! Ja u das muesmä natürlech fiirä: naja da s no rächt schwirig isch ä Blog z fiirä hani eifach zur Fiir vom Tag äs par Veränderigä aabrocht. Dank dr nöischtä Nöierig vo Blogger.com verfüegt d Kommentar-Funktion über ä nöiä Spam-Fiuter, drum füäri das jetz wider i. Usserdäm hani Labels iigfüärt. Wenn dr jetz auso aus übers Piry weit azeigt ha, chöit dr das am Ändi vo dä Posts eifach aklickä und de chömä aui Biiträg wo mit Piry glabelet si ufglischtet... auerdings isches chli aasträngend aui 200 Posts z kategorisierä... drum hani nur fang die erschtä par gmacht. Aber i schaffä drannä;-)!
Aus letschts hani no ä nöii Funktion entdeckt wo dr chöit aaklickä wie nech ä einzelnä Post gfaut. Na ja i gibes zue, i ha nonid ganz chegget wie das sött funktionierä, aber i bi jo so experimentierfröidig u probierä das (mit minä 3 Läser woni ha) mou:-)!

Wortfindungsstörungen

2010-09-06T09:03:00.002+02:00

Amerkig zu mim Iitrag vo geschter:

"Wie heisst do die Maschinä wo d Strossäarbeiter dr mit dr Asphalt ufrissä? Äs git äs zimlech luts monotons und närvigs Grüsch vo sech?"

--> PRESSLUFTHAMMER

;-)

Open Air Gampel 2010

2010-09-05T21:11:00.008+02:00

Wahnsinn, de plani doch mou sonä wahnsinnig gmüätlechä Obä vorem Fernseh z verbringä... Und was chunnt im Fernseh??? Nummä Schwachsinn oder Zügs woni scho gseh ha. Auso hani mi für Madagaskar entschidä und due mi näbä bi mim Blog widmä:-)! Aaauso aus erscht muesi mou Föteli ufäladä... dumdidumididum... tatata fertig. Übrigens sis jetz 230 und nüm 150;-)! Und jetz no luegä mit was afo. Ah jo vo aktuell ah retour hani gseit. Auso: Gampu:

So, das isch dr erscht Tag gsi, u dir wärdets nid gloubä aber unger däm huufä Gepäck vor mirä Schwe verbirgt sech mi Super-grossartig-eimalig-unschlagbar-guet-well-traveled-unersetzbar-Röueli-Victorinox-Rucksack. Ohni dä hätt mer sicher 2 mou müässä Geüäck schleppä:-)!
Und do hei mers bereits gschafft und üsi 3 Zäut inklusiv Sunnäsägu ufgsteut...
Dosähauter:-)!

S erschtä Konzert wo mer gseh hei... ähmähm, weis scho nüm wär das isch gsi (aiaiai mis armä autersschwachä Hrini)... ah jep genau STANFOUR

Schläppi war auch da!

Das isch "Wir sind Helden"! I bi auso ou froh hani ä huufä Föteli gmacht womä gar nüt druff cha erkennä;-)! Aber trotzdäm. Die si kuul gsi und i bi jetz auso vou ufem "Wir sind Helden" Trip. Dr Lukas het mer jo mou ganz ä huufä Lieder vo denä ufä I-pod gschmissä... schad hani das nid früächer gmerkt, wie toll die si:-)!

Hm, i gloub do hani d Bärgä gfötelet:-)!

Tja leider gits numä doofi Föteli vo mir... aber hey, so bini ;-)!

Oder söui sägä i passä mi dr Umgäbig ah? Huahuahua;-)!

Nenei si doch ganz 2 härzigi (naja dr Jeje fäut haut hie no).

Jaaaa, Ändu isch jo ou no drbi gsi:-)! Si isch äbä ersch am Friti am Obä cho, gad rächtziitig zu dä Totä Hosä!

Das isch Redwood gsi am Sa am Nomi, weni mi nid tüschä. Die si nid schlächt gsi, und eis Lied hani auso ou scho kennt vom Radio. U wimä gseht hei mer super Plätz gha hinger dr Abschrankig, zmitzt ir Sunnä! Ha zwüschä dürä auso chli Schattä müässä go suechä, sisch sooo heiss gsi.

Uhhh, wär isch ächt das scho wider gsi??? Hm, irgend so öpis wie The Ghosts, nei nid the Kooks, aber irgend öpis mit "The..." hmmm... .... ah ja, "The Sounds" (okok dönt gar nid wie The Ghosts) u die sie auso ou nid schlächt gsi:-)!
QL isch kuul gsi, ou vo so wiit hingä:-)! Vorauem d Seeländer hets gfröit... wenn d Sunnä hingerem Jura ungergeit, u när hets gjodlet.

Aha, d Reihäfoug hani auso wider mou gar nid troffä, wiu das isch am Donnschti Obä gsi, nachdäm d Schwesä u i (Jeje het scho lang nüm mögä) üs d Queens of the Stoneage inäzogä hei, hei mer üs Zwungänermassä fasch müässä d Lampä fiuä. Wie mä a dr grössi vo dä "Longdrinks" erkennt het das nid so funktioniert wiu, die si nid grösser aus äs Cüpli gsi;-). Jo und wieso hei mer üs müässä d Lampä fiuä??? Auso wenn dr Queens of the Stoneage kennet wüsst dr werum. Wie heisst do die Maschinä wo d Strossäarbeiter dr mit dr Asphalt ufrissä? Äs git äs zimlech luts monotons und närvigs Grüsch vo sech? Chunnt mer gad nid i Sinn, aber so hei die Queens öpä tönt. Genau.

Und Chäntlä und d Andrea (die 2ti Andrea) si auso ou drbi gsi. Si si ou erscht am Friti cho. Und gemäss dr Celine isch d Andrea vor 5 Johr ou scho mit üs z Gampu gsi... hm, das hani aber ersch im nachhinein usägfungä, und i ha mi auso gad gar nüm a das chönnä Erinnerä. So augemein mani mi eh nüm ah Gampu vor 5 Johr erinnerä, aber d Celine und ig si do ou entschuldiget wiu mir hei denn ganz schlimm a Jetlag glittä u hei die meitschti Ziit gschlofä;-)!

Ufem Migros Lounge Dings...

Chli müäd, am Dada Konzert, churz bevor mer hei si.

U de mues das fasch no Dada si... die hei zwar kuuli Lieder und i füärä äs par CDs (jup, denn het mä no CDs kouft) aber leif (jö das dönt so härzig) hei si mer nid soooo gfauä...

Das isch dr Greis, dä isch u kuul gsi. Und äs tuet mer so Leid = tu touches la soleil

Das lustige Trio:
Dr Gustav us Friburg: Ich bau dr ein Boot und las es regnen, hol dir ein Meer in deine Stadt (auso bis do tönts jo no poetisch) ich blas dir den Wind in deine Segel, nun hau endlich ab. Haha, dä isch so geil. Kennt das öper?

Und nomou vo Konstanz...

2010-08-31T22:27:00.006+02:00

Hia, eigentelch hani nech hüt wider mit Föteli wöuä beglückä... aber, ach du schande, mini 150 Föteli woni geschter ufä PC gladä ha si VERSCHWUNDÄ! Ha, das dönt nachärä Verschwörig! Aber vo däm loni mi nid lo beidruckä... drfür müässt (Ok, müässä müässt dr eh nid, und müässä sötti gemäss dä nöischtä Sabag-Bewegt-Wiisigä eh nid bruchä und sowieso "Wir müssen nur wollen") dir jetz haut ä Trochnä Biitrag läsä anstatt Föteli aazluegä!

Zu Konstanz (Rock am See? Wo war eigentlich der See???) gits eigentlech nid würklech viu meh z sägä... auso i bi sehr begeischteret gsi vo minä Gummistifeli.. i bi gar nid, aber gad würklech gar nid über Toitoi begeischteret gsi. Auso do verchlemmt me sech lieber s pissä bis mä wider über dr Schwizergränzä isch. Dr Zäutplatz augemein isch Scheisse gsi u het erscht no 10 Euro koschtet u 10 Euro Mülldepot het mä ou no müässä zahlä, die het mä de am Schluss gägä nä vouä Ghüdersack wider zrugg bercho, obwou äs het jo nid jedä ä Mülltüte übercho... auso wie si das hei wöuä reglä hani no nid ganz tschegget, na ja d Idee wär vilech nid schlächt aber s Konzept muess no usgarbeitet wärdä. Tja vielch de nöchscht Johr... ah hani scho erwähnt dases s 25igschtä Jubiläum isch gsi? Na ja, drfür si d Konzert super gsi. Nachem Konzert si mer de no aui zämä im Rägä gstangä wiu sis nid gschafft hei Sonderbussä z organisierä, sondern eifach mitem normale Linieverchehr gschaffet hei (jep u das nach 25 Johr). Dür das isch irgendwie spontan und unerklärlech d super Luunä womer üs aagfiiret hei bi aunä gsunkä... zum Glück isch ä nättä Polizischt vor dr Mengi gstangä und het seelä ruhig i eirä Gmüätlechkeit verzeut: "bitte bleibeeeen sie hiiiinter der Aaaabschraaankuuuung, wir haaaben geeenuuuug Buuusse für aaaalleee, wir bringen Sie aaalleee nach haaaauuuseee". Leider het är bi däm nid bedacht, das mit aui im strömendä Rägä si gstangä. Auso bi mir hei sech do gad wider gwüssi Aggressionä aagstouet. Zum Glück hani mini Stifeli anä gha u ha trochni Füäss und ruhäigi Närvä bhautä. Und i ha numä 3 mou Mönschä mit minä Agressionä (2 x hani äs par gstresstä Seelä müässä sägä si söuä doch so guet si und hinge aastoh wie aui angerä Normaustärblechä ou und einisch hani ä Jüngling müässä übers offäsichtlechä Rouchverbot im Bus müässä ufklährä) müässä beläschtigä... i fingä auso mis agressivä Brunschtverhautä (äh, Insider oder siehe Berlin 2009) het sech scho besseret.
Ufem Heiwäg im Zug bini de nacherä nid ganz gmüätlechä Nacht eher echli erschöpft gsi, und mir isch ungerwägs im Zug mindeschtens 27 x dr Chopf vorä abä kippet. Zwüschem Bahnhof und mim Zuhause hani mi de no einisch verirrt (peinlich peinlich bi i fausch Bus ghocket) u när dür die haubi Stadt spaziert, bi däheimä acho, tot ufs Sofa gheit u ha bis am 7ni dürägschlofä...

Konstanz - ROCK am See

2010-08-30T22:12:00.005+02:00

Uuuuh nei, Läck bini im Verzug. I ha no so ungefähr 150 Föteli woni gärn mit euch, minä treuä Läser;-), wett teilä!
Wiu i leider so wahnsinnig vergässlech bi, hani sämtlechi Höhepunkte vo dä vergangänä Ereigniss vergässä und drum voni jetz gad mitem aktuelschtä Event ah: Konstanz - Rock am See!

Voilà, jetz isches offiziell: Frouä chöi kes Zäut ufsteuä... oder de ömu numä mit dä hiufsbereitä dütschä Nachburä!

Na, Glück gha, äs steit!!!:-)

Diana het Schum zapft, eh nei Bier meini...

Ah ehm... hmmm... ohne Kommentar.

Tja s Pre-Concert-Bierli im "grossä" Zäut...

S Corinndli... i üsem Zäut u im Hingergrund ihres Zäut (Annemarie ischno gad am schlöfälä).

Ach ja, ich war ja auch da! Äs huerä säutsams verschwummnigs Föteli...

Und si isch de doch no ufgwacht und mit üs cho astossä:-)

U so hei mer üs auso zersch mou chli ufem Campingplatz iigläbt...

Hm, gshet d Diana do öpä scho chli Müäd us? Isch äuä gad nach üsem Nuki gsi...

Oder hets öpä a üsem Bier glägä? Si übrigens 5 Liter gsi, u mir heis nid mögä...

Aber mir hei üs Müäh gäh:-)!

U soooo viu Lüt hets gha!

Jöööö...

Corinndli und ich...

Und nomou jöööö....

Nur für Altpapier?

So das wärs mou mit dä Föteli vo Konstanz... jetzä was chani no drzue verzöuä? Hmmmm... auso, am Samschti am Morgä, nach dämi am Friti-Obä im Rägä mit em Chänty, dr Melä und em Robi ar Autstadtchiubi bi gsi, bini am 6i ufgstangä ha mi Krempel zämäpackt u mini Gummistifeli aagleit u bi los a Bahnhof zottelet (aso mitem Bus gfahrä), has Bachmi troffä und bi miterä i Zug iigstigä. Hui, das tönt jo spannend wienä Morä. Auso ungerwägs hei mer no d Corinne u d Annemarie ufgläsä u schwupdiwup simer z Konstanz gsi. Während mer ufä Bus gwartet hei, hei mer de ou scho die erschtä Rägä tröpfli gspürrt, aber ufem Campingplatz acho hets Wätter ou scho wider besser usgseh, numä dr Campingplatz isch glich scho rächt ufgweicht gsi. Unerschrockä hei mer üs de glich i Matsch gstürzt und do bini ou scho s erschtä mou froh gsi um mini qualitativ hochstehendä 29.90 Landi-Gummistifu. Si de überä ganz Campingplatz gstapft für z merkä daser Vou isch u hei üs de eifach irgendwo drzwüschä drückt. Die nättä Nachbarä zu üserä rächtä hei de nätterwiis s Rätsu vo Corinnes Zäut glöst u die blödä Nachbarä links hei sech beklagt das mer i ihrem Gartä stöh. När si mer uf zum Kaufland (oder Kaufhaus??) und hei üs mit Snacks, Bier (mit däm heimer de när gad s erfougrichä ufsteuä vo üsnä Zäut, i üsnä Zäut, siehe Biudli, gfiiret) und Zmorgä iideckt. So gäg die 2 hei mer üs de ufä Wäg gmacht zum Stadion, ungerwägs si mer sehr nätt ungerhautä wordä, zersch hätti mis Billet für nä Nacht mit irgendemnä Langhaar chönnä iituschä (hä?) und när hani mi aus Dütschi goutet da i schiinbar absolut Akzentfrei Dütsch redä oder vilech hets ou numä drann glägä das die angerä 3 Mädels s Muu nid ufgmacht hei u drum hei die Herrä äuä sGfüäu gha si chöi nid Dütsch, ah jo u när hani mi no bi Bauer sucht Frau wöuä aamäudä (i bi mer sicher mit minä Landi-Stifeli bini dr Troum vo jedem Buur). Guet, bim Stadion si mer de gad mou vor Kate Nash ihrem "Gsang" begrüässt wordä, bi mer nid sicher öb si würklech so scheisse dönt het oder öb d Akkustik numä so scheisse isch gsi, uf jedä Fau, jo i säges nomou, hets scheisse dönt. So hei mer üs fangs üsnä Mägä gwidmet u hei sä mit Asia-Nudeln mit Pute gfiut. När mit Bier. När isch Skunk Anansie cho. Het gar nid so scheisse dönt wieni erwartet ha. Aber dr Höhepunkt und s einzigä Lied woni kennt ha isch "Just becaause u feel good" gsi... när hei mer no äs Bier drunkä. Und när hei mer Crèpes gässä... döu hei Crèpe gässä angeri hei sä sech id Hoor und uf d Jaggä gschmieret;-)! När isch s Solo vom Sänger vo The Kooks cho, wiu sech dr Gittarischt dr Fingerbroche het... när isch Wizo cho... ah u när simer zum 5tä mou ufs WC... när si mer go Krautschupfnudeln ässä :-)! U nääär si die Toten Hosen cho. Die si uuuu kuul gsi u hei meeega lang gspiut. Wiu The Kooks jo usgfauä si hei d Hosen chli lenger gmacht. Und bim letschtä Lied hets afo rägnä... und danach si aui dirket usägstüret und das isch natürlech nid so schnäu gangä u mir si aui schön im Rägä gstangä. Zrugg ufem Zäutplatz bini de äs witers mou sehr froh gsi um mini Gummistifeli...

Hui i ha no ganz viu uninteressants z verzöuä drzue... i mues jetz go schlöfälä u machä de morn witer... oder übermorn... oder gar nid. Guet Nacht.

Yeeeeeeeeehaaaaa:-)

2010-08-15T21:37:00.006+02:00

HA! I has gschafft! Ungloublech, obwou i so gjammeret ha (jaja i gibes jo zue)! Aber drzue mues mä sägä, i ha fang 2 Wuchä vorhär chli afo läsä u 5 Tag vor dr Prüäfig ersch d Null-Serie glöst u gmerkt dases uhuuuuerä schwirig isch. U när hani quasi numä no glert. Und gschaffet. Macht Freude. Oder äbä ou nid. Uf jedä Fau hani när mi "Erfoug" ar StreetParade gebührend mit Caipirinha gfiiret... aber das chunnt de im nöchschtä Iiitrag! Nach Gampu und Rock am See:-)! Läck i fröiä mi!!!

Hie glich fangs es Föteli vo Züri, das hani vom Jeje ab Facebook klauet (Meeerci)!

Meine Mitbewohner (die Anderen)

2010-07-21T23:03:00.002+02:00

Auso Bitte!! I bi jo wou würklech nid heiku. I bi mi jo a relativ viu Gekrieche gwöhnt, und ha auso ou kei Angscht vo Spinnelä u angernä so Viecher (usser vilech vo Tuusigfüässler?). Aber sit mehrärä Monät wohnä sörigi Ungeziefer bi mir:Und i cha auso nüt drfür, aber die gruusä mi jo wienä Moorä. Würg. Zum Glück hani auso so Viecher ou im Stägähuus und im Chäuer entdeckt. I ha scho fasch s Gfüäu gha, die wohnä bi mir...
Auso, wär weiss, was das isch, wo die härchömä und wieni die los wirdä???

Bed of roses...

2010-07-18T21:31:00.004+02:00

Tja, auf mysteriöse Art und Weise hat es dann doch noch geklappt. Hier also nun Jon & Ich (aber achtung, nicht für schwache Nerven):

I've been sitting here wasted and wounded at this old piano...

trying hard to capture the moment this morning I don't know...

and a bottle of vodka is still lodged in my hand

some blond gave me nightmares i think that she's still in my bed...

schmelz...

Ig und dr Jon!

2010-07-18T11:42:00.006+02:00

Ok. Schade schade schade, aber i has jetz lang gnue probiert... uf Grund vo technischä Problem, müässt dir uf Bad Medicin, äs Solo vom Richie Sambora und Bed of Roses (mit mir aus Background, ähm i meinä mit mir wo aui angerä übertönt) verzichtä... schade schade schade. Aber aus chlinä troscht gits hie glich 2 churzi Video...

Superman tonight?

In these arms... mit Celine und Martina!

Übrigens hets vorärä haubä Ewigkeit, auso vor minä Bloggerziitä scho mou ä Bricht mitem Titu "Ig und dr Jon" gäh. Denn hani äs Föteli vo mir und em Jon per Mail verschickt und vo äs parnä hani d Reaktion bercho "Wow, soooo kuul, wo hesch de du dr Bon Jovi troffä?". I ha das natürlech super amüsant gfungä:-)! Und zwar hani dr Jon tatsächlech gseh, im Madame Tussauds z NY. Natürlech nid in ächt, sondern in Wachs... drum hettär ou so nätt härä gha woni s Foti gmacht ha;-)!

JBJ The Circle Tour 2010 London

2010-07-06T22:22:00.008+02:00

Wo mer d Martina uf London si go bsuechä, si mer jo am Sunnti am Obä no id O2 Arena go dr Bon Jovi luegä... D Martina hei mer igladä zu ihrem Geburi, wiu si isch jo amä chli knapp bi Kassä wiu dr London-Life-Style so tüür isch und überhoupt si isch nid ganz sonä BJ Fanatiker wie d Celine und ig u hätt sech äuä schüsch üses Gekreische nid freiwiuig ato!

Guet nachdäm mer jo scho dr ganz Nomi z Notting Hill umägwanderet si, unds de am Obä o no het afo schiffä, si mer irgendwie aui nüm so wahnsinnig motiviert si gsi... und nach däm mer de no uf ä erscht Blick rächt doofi Plätz (direkt sittlech näb dr Büni fasch z oberscht, siehe Föteli) hei gha und mer (auso ig) üs scho wider ab dr Mönschämängi im O2 hei ufgregt, isch d Stimmig chli öd gsi...

Das het de aber gar nid lang aaghautä! Sobaud dr Herr Bon Jovi mit sinä extrem wiisä Zäng (Das isch ä Insider, wiu är offäsichtlech Zäng bleicht het) vor Bühni gstrahlet het, si d Celine und ig näbscht em singä und schreiä sehr mit "oooooh" und "aaaaah" und "het dä muskulösi Oberarmä" und "oh, d Bruscht het är ou enthooret" und "dä gseht jo huerä guet us für sis höchä Auter" und "het är ächt Hoor gfärbt" und "hm isches ächt Botox oder het är sech lo liftä oder gseht dä ächt vo naturus no so guet us?" beschäftiget gsi und die gueti Luunä isch gad sofort id O2 Arena iizogä. D Martina het natürlech ou flissig mit grocket aber si isch uf dr angerä Sitä vor Celä ghocket und drum hani nid so viu mitübercho vo ihrä... und usserdäm het si jo ou dr Steve zum ahimmlä und het drum nid so gsabberet wie d Celine und ig... Und ou dr Räschtä vom Stadion, vo dä Sitzplätz z oberscht Obä wo mir si gsi, isch vou abgangä... ganz angers aus a dä Schwizerkonzert wo sechs Publikum amä numä sehr schwärmüätig loht lo mitriisä! Guet, wie chamä dr Jon Bon Jovi nid super fingä??? Wär sörigi Liebeslieder cha singä, muesmä eifach liebä, oder? Schmelz...
Auso mir hei entschidä: dr Bon Jovi isch ä geili Madä! (und no damit ärs ou versteit: Jon you're a hot maggot☺)

Und Pink hei mer ono gseh;-)

Jööööhhhh ♥ (gseht dr die strahlendä Zäng;-)??) Ooooooooohhhhh....

Aaaaaaahhhhhhh...

Meine Mitbewohner

2010-07-05T21:44:00.005+02:00

Eines schönä Tages woni vom schaffä bi heicho, isch doch tatsächlech ä Tubä vor mim Fänschter ghocket. I ha mini Pflanzä vors Fenschter gsteut gha u 1 Sitä vom Feladä zueto... ha natürlech dänkt wenns Blüämli dört steit chömä sicher keni Tubä zuchä. Aber prompt het sech sones Vieh zwüschä Muur und Pflanzä niderglo... ha sä de verschücht u dr Feladä ufdo, und was gsehni do! Het si doch scho äs Ei gleit! Manno! Na ja i ha dänkt, jetz berchunnt de s Ei haut chaut und stirbt und när duenis de Entsorgä. Aber d Hildegard Lucretia (jo wenn scho Mitbewohner, de mues si ou ä Namä ha, d Tubä meini), het sech auso gar nid lo abschreckä und isch ou bim offnä Feladä gmüetlech und z fridä ufem Näschtli ghocket... Has de nid übers Härz brocht sä z verschüchä und s Ei furtzschiessä (nei i bi nid Vegetarier und ha gärn Eier), wiu d Lucretia isch eifach sonä härzigi Tubä (siehe Foto), u de hani sä haut eifach fangs mou lo si... am nöchschtä Morgä hani natürlech ke Ziit gha und am Obä woni bi heicho was hani do vorgfungä? Äs zwöits Ei!! Na super!
När hani auso studiert u studiert u studiert wasi äch mit dr Lucretia und dä Babys söu machä... auso kabutt machä isch eifach kei Option... hm dört lo isch auso ou kei Option... ha de chrampfhaft äs Plätzli gsuecht woni sä chönnt umsidlä, isch mer aber eifach überhoupt nüt i Sinn cho. Am Morgä bevori uf London bi, hani sä de spontan vo mim Chuchi-Fänschter zum Stägähuus-Fänschter (wou zur Freud vom Abwart wo eh nie umä isch) gwächslet! Ha jo nid wöuä riskierä das weni vo London heichumä ä huufä schreiendi nackti chlini Kücken ufem Fänschterbrätt ha... na ja mi Plan isch leider hingerusä, wiu äbä s Stägähuus-Fänschter hingerusä isch, auso uf dr angerä Sitä vom Huus, und i gloubä d Lucretia het ihres Näschtli nüm gfungä...:-( äs tuet mer zwar Leid (aber i bi glich froh wohnt si nüm uf mim Fänschterbrätt) aber i gloub si isch ou nid so lang triuurig gsi über irä Verluscht und het churzerhand ufem Nachbar sim WC-Fänschter-Sims äs Näschtli iigrichtet! Ha, guet gmacht Lucretia, wiu i gloubd dr Nachbar isch ungerdessä Uszogä, und äs chunnt niemer meh dini Eier cho entfüärä!

Dr Andy H.

2010-07-05T21:32:00.003+02:00

Dr Andyyyy, auso dr Andy isch nid d Houptattraktion vo däm Foto sondern er Caro ihres Pult!
D Caro isch nämlech so fräch gsi und het mir während si Ferie het und ig am schaffä bi gsi, Föteli vo feinä Dessär und Kafi gschickt... när hani gad sofort ä Racheplan usgheckt und ha ihres Pult mit Offertä und Ausftragsdossier vou gstaplet! Huahuahua:-)! Auso das wär es böses Lachä gsi! Und i gloubä i ha Erfoug gha und d Caro isch rächt gschockt gsi, u het mer zrugg gschribä das si gad uswanderet und nüm chunnt cho schaffä:-(! Das hani natürlech nid wöuä... ha sä de ufklärt und bi froh das si de glich wider isch cho schaffä :-D!

London zum 2tä

2010-07-04T20:34:00.007+02:00

Nach minä Ferie z Ägyptä hani äs paar Tag müässä go schaffä u när ischs am Weekend wider ab uf London zur Martina, das mou mit dr Celine. Mir hei Billet gha für am Sunnti dr Bon Jovi go z luegä und när hei mer chli gschoppet u är Celä ihrä Geburi gfiiret... Wie geng hanis wider mou nid härä brocht mit dr richtigä Reihäfoug vo dä Föteli.

Das isch er Celine ihres Geburi-Ässä:-)! Gad nachem BJ si mer id Stadt u hei üs äs gmüätlechs Mäc gsuecht... Häppi Börsdei Celä!:-)

Är Martina ihres neuä Deheimä z Notting Hill;-)!

Am Shoppä... vou gueter Lunä!

Oh, das Wiedersehen!

Am Morgä früäh i üsem Hostel. Hm het äch do öper chli chaut gha? Pulli? Schlofsack?

Das si mer jo 2 ganz Kuuli! Aber wieso zeigt mer ächt d Celä dr Finger???

Notting Hill ufem Portobello Market. D Celä het ihrem Mami äs "Mom's Diner - 24 hours open" Schiudli poschtet;-)

Säubschtportrait im Hotelzimmer! Man bemerke: mini Hoor hei die glichi Farb wie d Wang!

Ir Stadt si aus so Elefantä umägstangä, wie z Züri aubä d Chüäh oder d Bärli. Dä Elefant het so truurig drigluegt das mer nä mit emnä Föteli hei wöuä ufmuntärä!

Ach, das wär jetzä no s scharfä "Wiedersehens-Föteli"

Nähmaschine gefällig? Im nä Ladä am Portobello Market

Martina mit neuem Look (si isch o bim Coiffeur gsi)

Jööö, zur Abwächslig ganz lieb und brav...

Das chlinä Bitzeli Sightseeing wo mer gmacht hei, hei mer mit Shopping verbungä:-)

Ah hm no meh Säubschtportrait...

Nachem Konzert ufem Heiwäg hei mer sogar no dr Big Be gseh!

Ah hm, vorem BJ, oder nachem BJ... oder eifach irgendwenn irgendwo z London!

Am Samschti am Obä im "Usgang", s het ä feeeeini Pizza gäh...

U das isch gloubs ou bim BJ gsi...

Und was gseh mer do? D Martina drinkt wa Guinness!

Ah am Samschti gad nachem Coiffeur!

Ach und no vorem Coiffeur! Und bi Sunnäschiiin:-)

Und nachem Jon...

... chli ufdräit...

Und üsä Reisefüährer! A little bit lost, maybe? ;-)

Sharm-el-Sheik

2010-07-04T15:39:00.004+02:00

Afangs Juni bini mit mim AIG, dr Diana, 1 Wuchä i üsnä wouverdientä Ferie z Ägyptä gsi. Föteli hani nid so viu gmacht, das Johr isch Diana drannä gsi, u si het mer ou scho ä CD brönnt woni aber leider nid cha aaluegä wiu mis Loufwärk kabutt isch... dir chöit aber d Föteli ou uf FB uf mim AIG sim Profiu go aaluegä vorusgsetzt dir kennet mis AIG, sit uf Facebook und mit ihrä befründet;-). U schüsch müässt dr nech haut mit denä paar Foto begnüägä:

So schöni Kunschtwärch gits, wemä bi dä iiheimischä Mitarbeiter so beliebt isch wie d Diana und ig! (Oder vilech eifach ou wemä gnue Drinkgäud git)

Ussicht vo üsem Baukon ufä Pool... (do simer amä am Obä no schnäu dri gumpet we mer am Obä vom Strand si heicho... wiu s Meer isch nid würklech erfrüschend gsi)

2 uuuheissi Tubänä... sogar scho chli aabrünet.

Diana mou ganz brav und stiu (am schlofä)

Das isch gad churz vor dr Abreis gsi. Dört isch eini vo dä Bars gsi wo mer am Obä üses Bierli so go schlürfä... ah jo und d super Animation het ou hie stattgfungä... aber ähnlech wie letscht Johr hei mer üs ou hie nid würklech für d Animation chönnä begeischterä.

Blick vom Restaurant ufä Pool und üse Teil vom Hotel... auso eifach gad vor angerä Sitä wie vorhär!

Do si mer am Obä mou uf Naama Bay, wiu üses Hotel isch jo z Nabq gsi. Naama Bay het eifach huerä viu Lüt und Lädeli und Beizli gha. Mir hei auso relativ schnäu glert d Araber eifach z ignorierä und üs nid ufzregä we si us 100 Meter entfärnig scho usägfungä hei das mer Schwizer si. Steit üs äuä uf d Stirnä gschribä...

Und do si mer im Hard Rock Kafi. Und i has nüt kouft. Kes T-Shirt fürs Mami u fürä Papi...:-( aber si hei schinbar ou no die glichi Kollektion wie letscht Johr, und die hei si scho vo Miami;-)!

Luget mou wie glücklech s AIG isch mit em nä Drink vor dr Nasä;-)! Auso, tatsächlech simer houptsächlech am Strand umä glägä i derä Wuchä! Aber, für aues angerä isches ou z heiss gsi... üsä Strand isch zwar schön gsi, aber s Wasser maximau Chnöitöif und bisiwarm, auso ou nid würklech erfrüschend. Öpä 100 m wiit usä häts de no äs Wrack gha zum go schnorchlä, aber am 2 Tag wo mer üsi Schnorchlä hei mitgno hets so starch gluftet u Strömig gha das mers gli wider ufgäh hei usä z schnorchlä... usserdäm isch üs ungerwägs ä Schlangä begägnet, u de hani irgendwie nüm so Fröid gha..

Da i umbedingt ha wöuä go touchä, hei mer de no ä kuulä Usflug gmacht wo ü s Schatzi verchouft het. Si mit em Schiff a 3 verschidni Ortä gangä, bim erschtä hani gschnorchlet, bim 2tä hani Check-up Dive gmacht u bim 3. hani de eifach no ä Touchgang gmacht... isch mega kuul gsi.

U am Tag druf hei mer de no ä Standart-Touri Usflug gmacht u äs het eifach huuuuerä viu Lüt gha... si zersch mit em Jeep id Wüeschti, auso is Sinaigebirge gfahrä u hei dört Teeli trunkä, när si mer zum Blue Hole go schnorchlä (das isch meeega kuul gsi, dört geisch is Wasser u schnorchlisch em Riff entlang unds Riff geit eifach huuuuerä Steil s Loch ab, het soo kuul usgseh) när hei mer ä Kameuritt gmacht (viuviuviu z heiss gsi) u am Obä si mer de no a Strand go liggä. Wär würklech ä kuulä Usflug gsi, aber äbä wifach viu z viu Lüt, würklech).

Jo u när si de haut ou die Ferie scho gli wider dürä gsi...

Stars of Sound

2010-06-23T23:11:00.003+02:00

Gad direkt nach üsem Egger-Usflügli bini nach Aarbärg as Konzert vom Polä und vo Gotthard gfreset... i ha natürlech dr Afang verpasst u has während em Konzert vom Polä nid zu mirä Family fürä gschafft. Ha de ä Crépe gfrässä, dr aagäblech bekanntischt Seeländer kennä glehrt u när hingeräm Mischpult-Zäut gmüätlech u mit viu Platz u gueter Sicht äs feins Bierli gschlürft... für Gotthard hani mi de när zu minä Eutärä fürä drängt u dört hani de när mit mirä Schwe u äm Mami mitgrocket;-) während sech dr Papi u dr Jeje äs Stüähli si go suechä...
Am nöchschtä Tag bini de no mit dr Diana go dr Seven (dä isch super gsi wie ufem Gurtä) und d Joss Stone (die isch so lala, na ja, ok gsi) go luegä u mini Eutärä si ou wider cho, wiu nä s Tüpfi ar Kassä äs Armbängeli für 2 Tag het gäh;-)!
Und am Sunnti druf bini de gad mit mim AIG id Ferie... Fortsetzung folgt;-)!

Budäusflug zum Egger

2010-06-21T17:08:00.007+02:00

Am 3. Juni, am Donnschti vor minä Ferie, si mer mit em Gschäft no ä Liferant vo üs go aaluegä uf Öschtrich.Ig bi am haubi 11i z Bieu abghout wordä, aus Einzigi, vor Ussteuig het schüsch niemer dörfä wöuä chönnä cho... i bi säubschtverständlech huerä gstresst gsi u ha liecht Verspötig gha, wie immer, und bi de froh gsi woni ändlech im Car bi ghöcklet. Erstunlecherwiis bini aber überhoupt nid müäd gsi, obwou i am Obä vorhär no z Züri ar Pam Ann Show (Hi, my name is Vaaaalerie...;-) bi gsi, und ha während dä ganzä 8 Stung keis Oug zue to. Mir hei Die Hard 4, woni nach öpä 5 Minutä ha usägfungä dasi nä scho gseh ha, und Lord of War, wo ni ou scho gseh ha aber mer wägem Jared Leto und em Ethan Hawk ha müäh gäh nomou z luegä, gluegt. När hets no äs Bierli gähund schwup di wups si mer scho z Kitzbühel gsi. Drzue mues mä no sägä, Daneli isch super gfahrä und niemer het i Car kötzlet!
När hei mir, auso ig mit mim AIG (All-inclusive-Gspändli) üses Zimmer bezogä hei üs ufgfrüscht und si ad Hotel-Bar go äs Bierli drinkä wo üs de üsä Egger-Verträtter begrüesst het... när hets natürlech öpis feins Znacht gäh und ä riiisä Apfelstrudel zum Dessär:-) wo leider aber fasch niemer mögä het:-(! Nachem ässä si mer do no ufenes Bierli i Usgang, würklech viu isch haut z Kitzbühel nid gloffä und die Beitz het äuä mit üs dr Umsatz vom Summer gmacht;-). Mir (siehe Foto;-) heis de ca. bis am 3 usghautä, döu si scho früächer hei wiu si Chopfweh oder so hei gha und angeri si de schins no witer gangä, das heisst gar nid go schlofä.
Am Morgä, nachdäm de ou die letschtä vom Usgang si hei cho und öpis Zmorgä verwütscht hei, ischs wider ab i Car und uf zum Egger gangä.
Das isch sehr intressant gsi, mir hei gseh wie sis Papier mit Melamin düe behandlä, d Spanplattä düe belegä u wie si d Spanplattä machä und s Biomassächraftwärch wo dr ganz (riisägross) Betrieb sowie S Hauäbad, äs Hotel u schüsch no so öffentlechi Gebäude duett mit Energie versorgä hei si üs ou zeigt. Trotzdäm si mer aui froh gsi wo mer nachem ässä wider heichönnä i Car hockä und aus erschts mou äs Nüki näh, wiu irgendwie si mer aui chli müäd gsi...