Street Parade 2009

1.Ouguscht Brunch

Geschter si mer, wie jetz scho sit äs paar Johr, mit em Papi sim Cousin em Peschä und sirä Frou em Evi, is Diemtigtal id Menigwald Sennhüttä go brunchä... Dasmou isch no dr Fredu mit cho und dr jerome und d Sabä isch wäg ihrem dickä Buch deheimä blibä.

S het natürlech wider ganz viu feini Sachä gä, inkl. Röschti und zum Dessär Mertrübälichuächä! Das mou hei mer auso gad 2 Bläch reserviert! Söubschtverständlech hani innerhaub vo chützischter Ziit z viu gässä u drum si mer de scho gli zum obligatorischä Spaziergang zum 1.Ouguscht-Füür ufbrochä... s Mami hei mer ir Hüttä ufem Bänkli glo und drfür isch dr Jerome mit cho...

I ha nattürelch die 2 relativ schnäu abghänkt... u ha mi de ungerwägs chli mit Blüämli und Ameisihüfä (bi üs hets jo fach keni me) beschäftiget.

När bini de no äleini witer dr Bärg ufä gsecklet... ha eigentlech uf dr angerä Sitä wöuä abä luägä... das hani aber nid gschafft. S het aber glich glängt zum mis Zmorgä verdouä und so hani de, wider dunger, wider chönnä witer ässä:-)!

När si mer no uf Neuhuus i Thunersee go bädlä und am Obä hets öpis feins Znacht gä, bir Celine...

Chirsiböim und z ässä

Bi minä Euterä hingerem Huus...
Chrigis Boum und Katrins Boum...

Ig und mi Boum...

Mi Chirsiboum...

Und s Massaker ir Chuchi nachdämi aui Chirsi entsteint ha...

Ha mi mou mit Chochä versuecht, S Poulet isch mega guät cho:-) und s Gmüäss hets aus verbrötlet:-(...

Und s Apero (ömu ä Teil drvo) woni für är Sarah ihrem Geburi gmacht ha. Mit Liebi gmacht;-)...

Und no 2 verschwummni...

Summer...

Ach nei so öpis, scho wider ä Monet dürä... und wüsst dr wasi aus schöns gmacht ha??? Jo gad gaaaaar nüt!!! Lääängwillig...
auso do muesi doch mou chli überlegä... hm...
... i ha mirä Schwe und är Celine ghuufä züglä... (das hani seeehr guät gmacht, i ha d Mannä delegiert)...
... i ha mi uf em haubä wäg ufä Bözingäbärg verirrt... (das hani weniger guät gmacht... aber s Piry isch froh gsi het si nid witer dr Bärg uf müässä)...
... aaah i bi jo ufem Gurtä gsi!!! Am Sunnti mit mirä Schwe und em Jerome, dr Andrea, und dr Diana! Aus erschts hei mer dr Seven gluägt, dä isch huerä luschtig uf dr Büni umägumpet und d Music isch ou nid so schlächt gsi... chli z fescht JT für mi... aber i ha sogar äs par Lieder kennt. När isch Patent Ochsner cho, die si jo eh geng guet. När hei mer Travis gluägt, die hani mega kuul gfungä, und i ha erstunlecherwiis ganz viu Lieder kennt, u dr Sänger het die ganz Ziit gschnuret, dä isch mega ungerhautsam gsi;-). Numä Kings of Leon isch rächt Scheisse gsi, isch auso die erschti Rockband woni gseh ha, wo vou nid rockt:-(! Jo u när si mer är Diana nochä dr Bärg abägsecklet... u drum hani am nöchschtä Morgä nid so mögä ufstoh... (das isch aber nid so schlimm, wiu i ha jo sowieso mini Prioritätä nöi verteilet, meh i richtid self-centred;-))...
... s letschtä Wuchäändi isch de wider die legendäri Beachparty z Mörigä gsi... (die hei mer auerdings chli zur Diana verschobä, wägem schlächtä Wätter)...
... und am Samschti hei mer ufem Hundemätteli grilliert... (sisch zwar chli ungmüätlech gsi wius so gluftet het, aber d Sonja u d Andrea hei trotzdäm äs grandioses Füür häräbrocht und dank är Diana ihrer Dechi hei mer ou kes chauts Füdlä gha und, das muesi no erwähnä;-), dank mirä Alufolie hets ou öpis vom "Grill" gäh, hihi)...
...und geschter hani scho wider ä Plattä gha, u ha müässä hei loufä... (wär sabotiert eigentlech geng mini Velo???)...
Jo, i gloubä das isch öpä aues gsi vom Juli...

Viele Wege führen auf den Bözingenberg...

(Ou das isch einä vo denä no nid veröffentlechtä, nid fertiggschribnä Iiträg wo bis jetz numä aus Entwurf si gspicheret gsi woni jetz nachträglech no inä schmugglä 24.08.2010)

... numä i ha kenä gfungä! Am Samschti am Morgä hani mi auso mitem Piry z Fuäss ufä Wäg ufä Bözingäbärg gmacht. S Piry hets gloub rächt gmüätlech gfungä... i ha säubschtverständlech scho nach dä erschtä 100 m gschnufet wienes Wauross! Bi de aues richtig Bözingä gloffä, dr Bärg z düruf und ir nöchi vom Tierpark bini i Wanderwäg rächts ufä abbogä, dört isches de gli mou chli steiler wordä und i bi froh gsi hani s Piry drbi und bi ufgstigä! Nach äs paar Meter bini hani mi ungeremnä töifhangendä Tannäascht düräquetscht, ha mi säubschtverständlech äm Piry ufä Haus drückt, dr Ascht het auerdings unerwarteter Wiis nid 1 mm nochägä und isch unagnähm über mi ganz Rüggä kratzt u de hets mer de du no fasch d Hosä abzogä... aues haub so schlimm, numä si när mini Hosä vou Tannänodlä gsi. Toll. Ha de mou spontan ä Strip im Waud härägleit... het jo zum Glück wiit und breit kei Mönsch umä gha...

Heeeiiiisssss....

Nei wie müähsam! Winter! I wott wider Winter! Mann mann mann. Äs isch eifach viu z heiss für mi! I bi äbä äs Chautbluet. I bi nid geignet für bi sörigä Temparaturä z schaffä! Für am Strand z ligä natürlech scho… äs isch auso Viertu ab 7ni (am Morgä!) und mir louft scho dr Schweiss abä! Willkommä im Tribhuus! Wemä bedänkt dasi scho geschter 5 Liter Wasser ha gschwitzt (s Py het mi gschafft und när hani no vom ässä schweissusbrüch gha) verwungerets mi dasi jetz scho wider schwitzä… tss… eigentelch sötti jo wou scho fasch vertröchnet si und die 5 Kilo Wasser abgno ha, nid wohr, aber nei das passiert natürlech nid. Drfür si mini Brüscht gwachsä wiu diä ploppä sit nöischtem immer usem Bikini usä (guät, das chönnt vilech ou drann ligä das mis Bikini chli usglodelet isch?)… ja hui das wär jo mou öpis ganz Nöis, dass mini Oberwiti grösser wird u dr Räscht nid!
Jä guät jetzä, zrugg zum Thema… i bi am schwitzä und äs hets tatsächlech einä gwagt vor dä haubä 8tä, bevori mis Kafi trunkä ha aazlütä und jo… i gloub dr Tag isch nüm z rettä! Auso i ha do äs sehr schöns Foto, wo zwar nid vo hüt isch, wo aber mini akutelli Luunä ser schön überä bringt!
Das isch übrigens dr Stötzu für die wohnä nonid kennä. Und für die wod Gschicht drzuä nonid kennä:
Ah däm wunderschönä sunnigä Tag hei mer ä Budäusflug nach Delemont gha…üsi Gruppä isch i sonä Forrest Jump Adventure Park! I ha das vou super gfungä! I gloub aui angerä hei das ou super gfungä, aber s Bier hei si äuä no fasch ä chli superer (super, superer, am superschte) gfungä. Äs si ömu scho rächt schnäu aui so wiit gsi, dasi si nüm hei mögä i dä Böim umä chlätterä… mit Usnahm vo mir natürlech… i ha nid so viu chönnä trinkä wiui no dr Kater vom Obä vorhär ha müässä verarbeitä!
Dr Tag isch de auso no luschtig gsi und am Obä si mer aui vöuig kabutt im Car ghocket… das heisst aui bis uf die sehr käppeletä, und bis ufä Migu und ufä Stötzu… die hei nämlech dr Car verpasst. Trottlä, chani do numä sägä! Säubschtverständlech bini do no Schuld gsi drannä, wiu i nid uf si ufpasst ha! Armi unsäubschtständigi Mannä, chani do numä sägä…