Röuälä...

So wider mou ä Huufä Säubschtportrait und Posä vo mirä Schwöschter;-), bim Rouschuehfahrä... und früächer hei mer doch das so guet chöönnä...

Slow up am 25. Apriu

Öh, fauschi Reihäfoug... das isch d Erschöpfig nachem Slow up;-)

Soooo viuuuuu Lüt hets gha!!!

Üsi super Mietvelo...

Und no d Diana ir Profi usrüschtig...

No so zügs...

Mis Oschterschnäggli:-)!


Wööööhöööö:-(! Wär hets umbrocht? (auso i has gässä aber umbrocht hanis nid!)

S Piry am schnousä (2 Minutä spöter het üs dr Büru zämägschissä)

Roubtierfüetterig bi minä Euterä... schad hani nid no äs 2 Foto chlei spöter gmacht wo dr Gartä ganz grüen isch gsi u aues blüäit het!

Nachem Mami ihrem Gartä zum Verglich no mirä Schwe ihrä Gartä, hihihi...

Alter Kram!

I chas gar nid gloubä! Do hani doch öpä 3 Johr lang mis Mami verdächtiget mis Chopfchüssi und mini liebschtä Lieblings CD's vernuschets ha und tatatataaa, do machi im Chäuer 1 Chischtä uf (na ja, beschriftet mit Winterchleider?) und was chunnt fürä? Mi ganz sit i im 2007 bi go reise verschollnig Kram!
Eigentlech hani mini Chischtä im Chäuer wöuä is Outo ladä u zu mir hei charä... auerdings hani irgendwie verdrängt dases sonä riisä Huufä isch. So hani haut eifach mou aagfangä mit Chischtä uspackä ;-), i weis das isch numä chli Kontraproduktiv... aber i ha de mou mit dä Chleider aagfangä u ha spontan 2 Säck für d Autchleidersammlig gfiut! I bi mer zwar nonid ganz sicher öb d Schwizer Bärghiuf öpis mit minä autä Bikini oder dä schwarzä Stifu mit dä Tönder-Absätz cha afo, aber vom drzue passendä schwarzä Mantu (so a la Cruella isch dä gsi, wär ma sech no dra erinnerä?;-) hei si sicher öpis. Oh mein Gott wie so hei mi eigentlech mini Euterä nid drvo abghautä ä so umäzloufä? Und äs isch ächt ungloublech wie viu Chleider ig nach däm i z Brügg uszogä und uf Italiä bi, i die Chischtä gstungät ha, drbi hani doch denn scho fasch aues furtgschossä...
Auso, näbscht äm nä Huufä urautä Träger-T-Shirt woni mi frogä wieni äch jemous mi Ranzä dribrocht ha, hani ou no Lüchtgäubi Wintersockä und äs paar verloteräti Volleybausockä, mis Tommy-Hilfiger Täschli mit passendem Portemonnaie, mini urauti roti Winterjaggä jo und no ä ganzä huufä angers gfungä... ha fasch aues furtgschossä:-( und 2 Chischtä hani jetz fangs mit heigno... die packi jetz no us und när fiui mi Ipod mit Bon Jovi, Red hot Chili Peppers und Dada:-D!

Was machä, wemä s Piry nid darf bewegä? Phöteli;-)

U no dr Räscht vor Oschterä...

... tja leider hani scho wider vergässä wasi aus gmacht ha... ;-) zum Glück hani ganz ä huufä Föteli gmacht! Und leider hets jetzä so lang duuret bis aui die Föteli si dobä gsi, dasi gar nüme ma schribä und usserdäm si si dummerwiis ou aui düränang gmischlet... auso, dir dörft euch eui eigetä Gedankä drzuä machä:-D!

Karfriti mitem Mami

Am Karfriti bini mitem Mami is Solbad. Und obwou i am Donnschti jo im Usgang bi gsi, hani doch am Morgä problemlos ufmögä (das isch eher säutä) u s Mami isch mi so um die 11i cho holä! Wiu mer früäh drann si gsi hets im Solbad ou numä erstunlech weni Lüt gha u mir hei vo Sprudel zu Sprudel chönnä wanderä, ohni das mer zerscht öper hei müässä wägschüchä. U drzuä het ou no d Sunnä richtig schön gschuunä! Isch auso würklech super gsi. När si mer gad no öpis go ässä, s het ä gmischtä Salat und Gschwöuti mit Birä und Chäs überbachä gäh, mmmh jammi!
När het mi de s Mami no zum Piry brocht und i ha Früähligs-Piry-Putz gmacht. När bini bi däm schönä Wätter heigloffä... dr verkniffnig Blick isch de numä wäg dr Sunnä und nid wäg mirä schlächtä Luunä;-)!

Viva Mexico (aso Old El Paso) ;-)

Am 31. März hani mini Schwe, dr Jeje ud Andrea zum Znacht iigladä... da mini Chochkünscht nid die tollschtä si hets öpis eifachs gä... u zwar Fajitas! Mit dr Old El Paso Gwürzmischig wirds Poulet meeega fein:-)! Jo äs isch ömu acho und wius so fein isch gsi, hetsech ou niemer drüber beklagt dasi kei Ässtisch ha;-)...

Tanzbei schwingä

Pfft. Was hani do ir letschti mou verzöut? I go nie i Usgang? Waaaaas ächt! Auso letschtä Friti (auso nid geschter, letscht Wuchä) bini jo mitem Blänkli a die Autä-Schinkä-Party;-)! U d Diana isch de ou no mitcho! Und i ha auso tatsächlech kein Schwein kennt... und i ha ou tatsächlech zu dä jüngerä ghört, hihi! Aber d Musig isch super gsi! Und d Diana und i hei s Tanzbei gschwungä (auso meh oder weniger im Takt vo eim Bei ufs angerä gwagglet) und s Blänkli isch vo eim Eggä i anger düset wiu si so viu Lüt kennt het. So um die haubi 3 hei mer de mini wunderschönä nöiä violettä 12cm Absaz extrem unbequemä Tanzschue chli weh to, u de simer hei! Das heisst, Diana u i si hei u s Blänkli het äuä no äs paar Stung dürä ghautä! ;-) Auso i gloubä s nöchschtä Datum steit scho!

Und am Samschti bini de gad no mou im Usgang gsi! Wahnsinn i weiss :-D, gits jo fasch nid!!! Bi mit dr Sarah uf Bern is Bierhübeli! Dört hei mer de ou wider flissig s Tanzbei gschwungä, plöiderlet, Lüt beobachtet und über sä gläschteret und när hei mer natürlech no zur Musig mit grölet:-)! Und da das ä Ü-25 Party isch gsi, si mer ou nid die eutischtä gsi! Do gö mer de ou widr mou!

Jo und am Donnschti hei mer de Sabag Frouä Wyberusgang gha! Auso das heisst, s Mäxli und d Diana und ig... und d Corinne und d Annemarie si ou no cho! U när si no 2 angeri dr bi gsi, d Prislä und Bärblä! Die Damä si de aui vorhär scho zämä go ässä numä i ha nid chönnä wöuä mögä und bi de erscht spöter im Bluenote drzuecho! Si heis de scho rächt luschtig gha und i ha de haut fasch ä chli müässä ufholä u ha de mou mitemnä Caipi aagfangä... u när isches doch de ganz hurtig ganz luschtig wordä und mir hei wider s Tanzbei gschwungä bis zum umgheiä;-)!

Auso i wett numä erwähnä: i bi innerhaub vo eirä Wuchä 3 mou im Usgang gsi! Woooha! Füählä mi wie 15i:-)! So viu bini sicher sit öpä 10 Johr nüm im Usgang gsi:-)!

In Form!

und weniger in Form...

Usgang? Usgang!

Ooook, die überbeliechteti Nasä, das binig! Unds Ohr mit dr Wuschelfrisur isch Diana wo gad spontan usem Biud gumpet isch! Und das passiert we mir 2 zämä i Usgang gö:

mir träffä üs im Pooc, trinkä äs Bierli und läschterä über d Sabag. So ä Stung spöter (jojo so lang hei mir für nes Bier) faut d Frog öb mer no eis trinkä oder öb mer jetz witer gö, und mir trinkä no äs Bier und läschterä no chlei witer. Wider ä Stung spöter, steut sech wider die glichi Frog und mir beschliessä das mer jetz z müäd si (das si Auterserschiinigä, do chöi mir nüt drfür), trinkä aber no es Bier u gö när hei. So viu zum Usgang....

Ganz ähnlech spiut sech das ab we d Martina, d Sarah u d Celine bi mir z Bsuech si und mer i Usgang wei:

Auso das vot drmit ah, das 2/3 vom Bsuech bereits mit Ungerhautigspili im Gepäck bi mir uftouchä... när bruchts nur no äs abvereckts Fondü (i gibä do gärn persönlech Uskunft wie mä äs Fondü verheit) und niemer ma meh i Usgang go. Und ou hie steit aus Usred s fortgschrittnä Auter im Vordergrund. So viu zum Usgang...

Sooo. Und hüt hani mitem Blänkli abgmacht. Mir gö ad Abraxas Revival Party. Relativ spontan. Aber das wird sicher supi, wider mou i Usgang! Und wehe s Blänkli bringt irgend ä autersbedingti Usred;-)!

So viu zum Usgang...

Schiabentür

Uf viusitigä Wunsch vor Celä machi ä nöiä Blog Iitrag, si het sech drüber beklagt das gad aus erschts äs Foto vo Ihrä chunnt, we mä mi Blog uftuet! Drum ä nöiiä Biitrag, haha mitem nä Foto vo Ihrä! Übrigens, wär dr Titu vo däm Iitrag versteit, berchunnt... äs Müntschi, haha, ha gad nüt angers im Aagebot... Chüäuschrank isch läär, schüsch gäbs Schoggi. Auso wo bini gsi? Auso d Celä und i hei üsi Brätter und üsi nöiiä Heumä (Bewiesföteli) usgfüährt, ä Rundi uf Bärn u wider hei. Äs het gstürmt, u so si mer när is Westside u heis ganzä Programm (Badä, Shoppä u Chino) dürä gmacht...

Ir Länk...

Zfridä...

Mis Piräli glücklech und z fridä, warm iipackt i ihrem Stau:-)! Zur Ziit machä mer jo gad Winterpousä... nachdämi sä letscht Johr 3 Wuchä vernachlässiget ha, bi z Malaysia i dä Ferie gsi, het si de glahmet woni hei bi cho... Mini nättä Lüt im Stau hei natürlech guet zuerä gluegt, aber äm Tierarzt sini Ungersuechig isch leider nid ganz so usgfauä (ohni witeri Abklärig oder ä Diagnosä) wieni mir das eigentelch dänkt ha, u so het si äbä geng no glahmet woni bi vo dä Ferie heicho.
Wiu si no sonä komischä Buggu uf dr Kruppä het gha, hani eigentlech dänkt äs sig äuä öpis im Rüggä und ha mou dr Ostepath lo cho. Tierärztin wo de isch cho, het chli manipuliert, aber gmeint äs sigi eigentlech aues ok, und het ou nid gwüsst wo här s Lahmä chunt... si het äm Py de mou spazierä und Entzündigshemmer verschribä. 1 Wuchä spöter isch si de wider cho luegä, und nachdäms geng no nid viu besser isch gsi, het si üs de im Tierspitau für d Abklärigä aagmäudet.

Äs paar Täg spöter het üs auso dr Peschä uf Bärn is Tierspitau chauffiert... Tierärztin het jo scho gseit, das s Problem nid im Rüggä sig, und drum hei mer z Bern ou numä s Bei, wo si druf lahm geit aagluägt. Nach dä Beugeprobe isch de gli mou klar gsi das mä witeri Ungersuechigä mues machä u so het mi de dr Peschä mitem Piry z Bern glo. Zersch hets no ä augemeini Ungersuechig gäh (und ä rektali Ungersuechig zum luegä öbs Becki ok isch... arms Py) und nach dr Beugeprob isch ä Ringblock aagseit gsi... bim Ringblock duet mä s Bei vo unge nach Obä beteubä, Schrittwiis, u duet zwüschä dürä geng wider vortrabä zum luegä öb si geng no lahmet. Dr 2 Ringblock, bim Fessuglänk isch de scho positiv gsi u si het nüm aagäh... so hei mer dr Berrich wo das es ihrä weh tuet scho iigränzt.
Aus nöchschts hets de ä Glänkanästesie gäh (Beteubigsmittu nur is Glänk gsprüzt, bim Ringblock wird aues betöibt und nid numä s Glänk), das isch auerdings negativ gsi... när hani müässä wartä und s Piry het ä Box übercho, bis mer is Röntgä hei chönnä... i ha nid würklech viu chönnä machä, aber i bi geng schön brav hingenochä dagglet u ha gluegt das si nätt zu mim Piry si... bim röntgä isch auerdings nüt usächo, keni sichtbarä Veränderigä bi dä Chnöchä und so isches gad witergangä zum Ultraschau. Während eini vo dä Studentinnä s sediertä Piry het gha, hani ufem Ultraschau chönnä zueluegä und d Frou Tierärztin het mer aues schön erklärt. A dä Sehnä het mä auso tatsächlech äs paar chlini Veränderigä gseh, aber d Frou Doktor het gmeint, das sig vilech vorä euterä Verletzig, isch aber nid würklech usschlaggäbend.... puh... auso hei mer s Problem immer nonid gfungä.

S Piry isch de no 2 Tag lenger im Spitau gsi zum witeri Ungersuechigä z machä... si hei no witeri Glänkanästesie u de när no d Sehnä usgschautä... isch haut ewigs gangä wiu mä geng wider mues wartä bis d Würkig vor erschtä Anästesie het nochä glo, damit mä cha die nöchschti machä... aber Schlussändlech hei si de bir Fessubeugesehnäscheidä ä positivä Befund gha! Guäääät, jetz hei mer wenigschten scho mou usägfungä wo das s Problem isch... numä was Problem isch hei mer geng no nid gwüsst.
Nöchschtä Schritt wär de ä Tenoskopie (mit dr kamera d Sehnä go aaluäg und flickä, we möglech) gsi, da das aber ä türi und nid ganz Risikofreii Ungersuechig isch, und Garantie nid gäh isch, das mä d Ursach fingt und cha behänä, hani mi do vorläufig drgägä entschidä. D Sehnä isch de eifach mit Hyaluronsüri behandlät wordä, äs het wider Entzündigshemmer für mit Hei gäh und äs isch witerhin spazierä agseit gsi.

Ä Monet spöter si mer de no einisch zur Kontrouä is Spitau gfahrä... i ha scho säuber fasch nüt meh gseh und d Frou Dokter het ou gmeint äs sig scho viu viu besser, und so hets de eifach ä witeri Behandli mit Hyaluronsüri gäh und scho si mer wider hei:-)!
Bi de witerhin 2-3 Wuchä ä haub Stung am Tag go spazierä u när bini de scho wider go ritä im Schritt und ou scho chli lenger go loufä:-)! Isch super gangä! U plötzlech hets mi wider dünkt si louft nid guet... hani natürlech sofort wider äm Tierarzt aaflütä u nachärä lengerä Diskussion (auso i ha mi eher pro und kontra vor Tenoskopie lo ufzöuä) hani mi auso für die letschti Möglechkeit, äbä die Tenoskopie entschidä... ha dänkt i wöu eifach aues möglechä probierä dases wider guet chunnt. Und so isches auso no äs witers mou is Tierspitau gangä...

Bim Vortrabä im Tierspitau hani ufe erscht Blick gseh das si ganz angers lahmet aus bim letschtä mou, und d Beugeprrob isch dr absolut Horror gsi:-(, mis armä Piry het fasch nüm chönnä loufä.
Dr Döktu, sisch ungerdessä scho dr dritt wo ni ha ir Tierklinik, het de ou ganz klar gseit, das das nid s Fessuglänk isch... und somit si wider die ganz Ungersuechigä aagseit gsi... het mi natürlech riiiisig aagschissä, nomou öpis angers, Scheisse. Peschä isch wider hei und i ha dr Räscht vom Tag z Bärn verbrocht... Ringblock und Glänkanästesie, aus nomou vo vorä. S Piry het bir Glänkanästhesie do wie d Sou und mi het sä müässä sedierä... s het mer mega leid do, mis armä Rössli. Isch aber ganz süäss gsi, wie si vor sech härä gschnarchlet het:-)... und da zum Glück nid so viu gloffä isch im Tierspitau, hani mit dä glängwiletä Studentinä chönnä ungerhautä...
När isch auerdings scho wider obä gsi und i ha ohni s Py hei müässä. Am nöchschtä Tag hei si de no grönget und öpis gfungä. Diagnosä isch Spat, Arthrithis, im distalä Sprungglänk. Das isch ä veränderig vom Chnochä (ussä bim Glänk nid innä, das wär Arthrosä) und füährt früächer oder spöter drzue das s Glänk zämäwachset und unbeweglech wird... dönt ganz schlimm, isches aber gemäss em Döktu nid, wiu im Sprungglänk hets 7 einzelni Glänk drinnä, und das wo bim Py betroffä isch, würd sä nid witer ir Bewegig beiflussä. Äs duet ärä jetz eifach weh, wius entzündet isch. Jetz chani wider äs Willi lang numä go loufä und när weni Glück ha, chunnts ou gar nüm wider. Auso das isch vor 2 Wuchä gsi, und hüt, wo ni sä ha lo vortrabä, hets mi scho wider viiiu besser dünkt:-)!
Usserdäm isch schiins äs Zeichä für Spat we si bim Uschrazä s Bei wäg zieht. Das macht si jo geng ä chli, hets aber ir letschti viu meh gmacht und jetz äbä scho wider viu weniger.
Und s beschtä isch natürlech das d Verletzig am Fessuglänk wider guet isch:-).
Ah jo u dr Buggu ufem Rüggu wo si gha het bir erschtä Lahmheit, isch ä Flüssigkeitasammlig gsi, das isch uf mi Wunsch ou no mit Ultraschau ungerseucht wordä und isch o schnäu widerwäg gsi.

Jetz hets Piry auso no chli Pousä, u när hoffi doch das ändlech wider aues guet isch, aber jo, i gloubä zfridä isch si sowieso:-)!

Schneesturm

Sit äs par tag tobt dr Schneesturm im Seeland! Ok, Schneesturm isch gad chli übertribä aber äs schneit ömu scho sit am Donnschti meh oder weniger ohni Pousä... bis am Friti ir Nacht, denn hets würklech gstürmt, aber leider ou gschiffet. Und am Samschti het doch sogar d Sunnä chli gschunä:-)...