Heeeiiiisssss....

Nei wie müähsam! Winter! I wott wider Winter! Mann mann mann. Äs isch eifach viu z heiss für mi! I bi äbä äs Chautbluet. I bi nid geignet für bi sörigä Temparaturä z schaffä! Für am Strand z ligä natürlech scho… äs isch auso Viertu ab 7ni (am Morgä!) und mir louft scho dr Schweiss abä! Willkommä im Tribhuus! Wemä bedänkt dasi scho geschter 5 Liter Wasser ha gschwitzt (s Py het mi gschafft und när hani no vom ässä schweissusbrüch gha) verwungerets mi dasi jetz scho wider schwitzä… tss… eigentelch sötti jo wou scho fasch vertröchnet si und die 5 Kilo Wasser abgno ha, nid wohr, aber nei das passiert natürlech nid. Drfür si mini Brüscht gwachsä wiu diä ploppä sit nöischtem immer usem Bikini usä (guät, das chönnt vilech ou drann ligä das mis Bikini chli usglodelet isch?)… ja hui das wär jo mou öpis ganz Nöis, dass mini Oberwiti grösser wird u dr Räscht nid!
Jä guät jetzä, zrugg zum Thema… i bi am schwitzä und äs hets tatsächlech einä gwagt vor dä haubä 8tä, bevori mis Kafi trunkä ha aazlütä und jo… i gloub dr Tag isch nüm z rettä! Auso i ha do äs sehr schöns Foto, wo zwar nid vo hüt isch, wo aber mini akutelli Luunä ser schön überä bringt!
Das isch übrigens dr Stötzu für die wohnä nonid kennä. Und für die wod Gschicht drzuä nonid kennä:
Ah däm wunderschönä sunnigä Tag hei mer ä Budäusflug nach Delemont gha…üsi Gruppä isch i sonä Forrest Jump Adventure Park! I ha das vou super gfungä! I gloub aui angerä hei das ou super gfungä, aber s Bier hei si äuä no fasch ä chli superer (super, superer, am superschte) gfungä. Äs si ömu scho rächt schnäu aui so wiit gsi, dasi si nüm hei mögä i dä Böim umä chlätterä… mit Usnahm vo mir natürlech… i ha nid so viu chönnä trinkä wiui no dr Kater vom Obä vorhär ha müässä verarbeitä!
Dr Tag isch de auso no luschtig gsi und am Obä si mer aui vöuig kabutt im Car ghocket… das heisst aui bis uf die sehr käppeletä, und bis ufä Migu und ufä Stötzu… die hei nämlech dr Car verpasst. Trottlä, chani do numä sägä! Säubschtverständlech bini do no Schuld gsi drannä, wiu i nid uf si ufpasst ha! Armi unsäubschtständigi Mannä, chani do numä sägä…

Pfingstä - Pferderennä Frouäfäud

Ferie z Menorca

Hie scho mou äs paar Föteli... schribä mani jetz aber nüm... bi äbä geng no im Feriemodus;-)

Daaaaahl...

Hüt am Obä hets mi mitem Velo ufä Ranzä gleit! Und när hani dänkt i mues mer zur Sterchig öpis feins Chochä! U i mues sägä, i bi eifach so ussergwöhnlech talentiert! Wahnsinn! I ha auso hüt widermou mis Geburi-Gschänk usbrobiert u zwar wär das äs indischs Chochset woni vo mirä Schwe ha bercho! Irgendöper het mi drzue inspiriert Linsä z kochä (nachdämi gmerkt ha das mi Chöli scho grauet isch, schüsch häts natürlech äs Süppli gäh...)! Und wie gseit, i bi eifach so talentiert! I ha auso äs totau autentischs Dahl häräzouberet! Eifach d Linsä lo chochä bis es ä Matsch git und ganz viu Gwürzli dra schmeissä... vou eifach! Auso vilech bini doch nid so talentiert? Hm? Na ja uf jedä Fau hets auso ou würklech wie Dahl gschmöckt! Leider hani i mirä ganzä Begeischterig vergässä dasi Dahl jo gar nid gärn ha:-(! Bäh! Sisch auso nid mou mit Mayonnaise z retä gsi... hm, drfür hani haut jetz s Kingfischer trunkä, woni ou bercho ha;-), isch ömu besser gsi aus d Linsä! Auso Schwöschti, bisch de mou zurä Linsäsuppä iigladä:-)!

Mi snöiiä Sofa...

Am Friti hani ääändlech mis wunderschönä nöiiä Sofa übercho, gliferet u ou gad ufgsteut vo 2 nä ganz charmantä, meh oder weniger motiviertä Sabagmitarbeiter… ha des Sofa när dr ganz Obä i mirä Wohnig umä gschobä, bisi ändlech die perfekti Position ha gfungä! Auso jetz bini z fridä;-)! U die 2 Herrä berchömä de säubschtverständelch no mou äs Bier.

Am Samschti am Morgä hani de vor luter Erschöpfig gaaaaanz lang gschlofä… bis am viertu vor 10i wo mer d Martina het aaglütä… när bis am viertu vor 11i wo mer mini Schwe het aaglütä… u när bini de erscht am haubi 1 wider ufgwacht;-)! Ha mi äbä no vo mini Ferie müässä erholä! Am Obä bini de mit dr Melä u em Robi uf Bärn. Mi nöi Rekord vo mir deheim a Bahnhof si auso 12 Minutä… u die angerä 2 hei dr Zug verpasstL, hihi! Auso nachdäm mer üs de aui (inkl. Steve wo jetz auso vo mir offiziell aus besseri Heufti vor Martina, und nüm aus ihrä imaginärä Fründ, akzeptiert isch) när z Bärn troffä hei si mer zum Bundeshuus go dr Stephan Eicher u dr Bligg losä…

Am Sunnti am Morgä bini de scho wider a Bahnhof gfreset (das mou hets kei nöiiä Rekord gäh, aber s Bähndli hani ou numä ganz knapp no verwütscht) u bi mit mirä Schwe u dr Andrea uf Ins gfahrä, dört hei mer de üsi Mietvelo überno u hei üs mitem Lukas troffä u när si mer los gradlet i richtig Murtä!
Ungerwägs hei mer de no dr Baudi, Katja und d Stephi ufgläsä u när si mer auso ganz zügig umä See umä gfahrä… entgägä aunä Erwartigä hei mer auso nid a aunä Verpflegigsstäng müässä aahautä. Dr Lüku het sech auso ou sehr tapfer ghautä, obwou är mir natürlech fasch nid het nochämögä! Und am Schluss isch er üs de no verlorä gangä…
So um die haubi 7ni, nachemnä Umwäg zum Piry, bini de deheim tot uf mis schönä nöiiä Sofa gheit und ha 3 Stung gschlofä! Scho schön sones Sofa;-)!

Swisscom sucks!

I ha auso geschter widermou äs fröidigs Erläbnis im Swisscom Shop gha… i ha dänkt die si so nätt u gäh mir äs nöis Natel, wiui doch sonä guätä Chund bi, scho sit 10 Johr. Na ja isch nüt gsi… mini Rächnigä si offäsichtlech nid höch gnue! Nachdäm s Frölein im Shop sech de nüm z häufä het gwüsst, wiui i schinbar sonä doofi Stürmitussä bi, het si mer de gseit i söu är Hotline aalütä! Hani säubschtverständelch gmacht, u dört hani de ä sehr ä charmantä Herr am Telefon gha wo sech ufänä lääängi Diskussion mit mir het iiglo (säubschtverständlech het ou die nid gfruchtet). I ha de mou mini Argument vortreit (bi scho sit ewig Chund, zahlä mini Rächnigä geng brav, has Natel äs Johr z Amerika und 3 Monet z Italiä und ou schüsch uf minä Reisä brucht was sicher nid biuig isch gsi, ha nem die besserä Abo-Agebot vo dä Konkurentä vor gha, und dr besser Kundedienscht (mis Abi het sech outomatisch verlengeret aber dasi äs Nöis Natel chönnt ha, het mer niemer gseit), usserdäm berchumi mitemnä nöiiä Aboabschluss bir Konkurrenz mis Wunschnatel gratis und bir Swisscom zahli mit 2 Johr Abiverlengerig immer no 329.--, jo und so witer und so fort) und sis einzigä Gägargument isch gsi: si hei ä 24 Stung Gratis-Hotline! Wow, het mi fasch umghouä! Und i bruchä die jo schliesslech flissig (är het mer Datä abägläsä: 2007, 2008, 2009…) scho wider Wow! I bruchä die auso geng weni ä Adrässänderig dürägibä oder mis Natel wider mou klauet wird! Super Argument, Swisscom! Das isch doch definitv ä Grund bi euch z blibä! Haha!
Jetz bini eifach ä chli gnärvt und due d Swisscom boykottierä, i weis das duet denä nid wahnsinnig weh, aber äs geit jo schliesslech numä um mini Genugtuung, und das isch haut eifach mou aues wohni cha machä (usser äs beschwärdä Mail ad Swisscom, das chunt de säubschtverständlech no).
Auso liebi Swisscom, Internet und Festnetz chöit dr gad mou vergässä und eues Agebot für Normausträblechi isch Scheisse!

Widermou Ferie:-)

Die letschtä 8 Täg bini mit minä Eutärä und dr Christine z Irland gsi. Die grüäniInslä isch auso tatsächlech sehr Grüän:-)! Mir hei super Wätter gha, bis uf 1 Tag wos bewöukt isch gsi, und äs isch aues churz vorem blüäiä gsi. D Rägäjaggä hani auso nid einisch brucht, aber sünnälä hani leider glich nid chönnä, wius haut trotzt dr SUnnä rächt chüäu isch gsi!
Mir si z letschtä Zischti z Dublin glandet u gad mitem Mietouto uf Galway gfahrä. När si mer richtig Südä zu dä Cliffs of Moher und när witer abä nach Tralee, när nach Killarney und ufä Ring of Kerry. Vo dört isches när witer gangä nach Kingscourt, Cavan as Geburifescht vom Peter und när fürä letscht Tag zrugg nach Dublin.
I ha säubschtverständelch 100i vo Föteli gmacht... auerdings si die no ufem Föteler und chömä de spöter mou ufä Blog, vilech.... jetz gits ömu fangs die 3 Biudli woni mitem Natel gmacht ha!

Mmmmh, ä Chüäuschrank vou Ben&Jerry's Icecream! Was bruchts meh um glücklech z si?


Hm... äs paar farbigi Hüsli... imnä irischä Stedtli... hm weis nüm wo! äch Kenmare?

Und no äs Guinness...

Äs Merci a mini Häufer!

So äs isch tatsächlech so wiit, i bi züglet und wohnä jetz i minä gmietätä 4 Wäng! Säubschtverständlech numä Dank minä flissigä Häufer! Leider hanis verpasst Föteli z machä, schad, wiu dr Lukas mit dr Bohrmaschinä wär definitiv äs Foto wärt gsi! Dank em Luki chani jetz auso gad direkt ar Fifth Avenue und em Broadway schlofä und übrigens, s Zebra hanget de jetz ou! D Melä het auso flissig ghulfä Ikea-Möbeli zämä schrüblä und d Celine het mi Läptop i Stand gsetzt, d Sabä het aues iigruumt wo si het chönnä und mini Schwe het öpis feins Znacht kochet! I weis, i ha jetz die einti oder angeri Tätigkeit nid ufgschribä, aber i dankä euch für aues wo dr gmacht heit! Weni de mou gnuä Stüäu und gnuä Gschirr ha, gits de mou äs Merci-Ässä!
Ah jo, Saurerli hani vergässä, dä het mer no d Lampä ufghänkt! Obwou är äuä de Blog nie wird aaluägä… aber merci glich;-)!

Donnschti-Obä mit dä Mädels...

Die rundumerneuereti Katrin!

Ok, äs frogt sech sicher niemer, aber zur Abwächslig gits ä Huufä Föteli vo MIR ufem Blog;-):

Nach däm mi d Bea frisiert het:

Nach däm dr Chef-Coiffeur si ni "Verbesserigä" abrocht het:

Het öper "i'm not there" Doku-Film überä Bob Dylan gseh? I gseh do gwüssi Ähnlechkeitä;-)

Unger Schock im BH z Bärn:

Schock überwundä, Chappä aagleit:

Und finally, hüt am Morgä im Büro, nach ärä haubstung üäbä, u das isch äuä nonid die definitivi Variante, aber die eifachschti;-)!