Ok, i gibes zuä, äs isch jetz gad ä huerä lengi här, sit mim letschtä Iitrag! Drbi isch so viu passiert. Ha haut i mirä Arbeitslosä-Phasä mini assoziali Sitä pflegt, u bi drum eifach Fuu deheimä desumä glägä u ha nid mou mögä Föteli ufäladä und Biiträg schribä!
Nachdäm i jetz auso Beschwärdä vo mehrärä Sitä ha bercho, das mi letscht Blog Itrag geng no vor Street Parade isch, wiu i euch mou aui ufä nöischt Stang bringä:
Nach 3 Wuchä Schrubä iipackä, äm Pommes fritierä während dr EM und 2 Mönet Omega, und nid z vergässä 3 Wuchä deheimä umä Fulänzä, het mi jetz d Sabag wider. Mir isch klar gsi, das si mi äuä wahnsinnig müässä vermissä und ha sä nid lenger wöuä lo liidä und ha drum gad sofort dä Job agno;-)! Wie lang dasi är Sabag dasmou treu blibä isch nonid klar, u die nöchschti Reis isch säubschtverständlech scho in Planig. Trotz minä Abstimmigsresultat, tändieri am meischtä zu Indonesiä… aber das steit no aus i dä Stärnä!
Im Summer bini ganz flissig am See und ir Badi umäglägä, brun bini aber natürlech scho wider nüm. Schade. Ha mit dr Martina mou äs Usflügli nach Vaduz gmacht und bi mit em Rebi im Basler Zoo gsi. Usserdäm bini natürlech geng mitem Piry umäghönteret und i bi sogar wider mou arä Dressurprüäfig gsi!
Ha natürlech no ganz viu Biudli und weni de mou us mirä assozialä Phasä usä chumä, duäni de diä no ufäladä!:-)
Geschter bini mit dr Sabag gsi go Kart fahrä, zum erschtä Mou, isch auso huerä luschtig, het mer vou passt, aber chönnä hanis jo leider nid:-(… I bi gloub meh ir Gägärichtig uf dr Fahrbahn gstangä ausi gfahrä bi (zum Glück passiert mer das bim Outofahrä amä nid;-) und mit Offroad-fahrä hani ou so mini Erfahrigä gmacht, natürlech zur Ungerhautig vo aunä angerä! Drbi ligt das numä drannä das mi au die Rüppel geng abdrängt hei! Aber egau, äs het Spass gmacht, aber da mer hüt aaaues weh tuet, aber würklech aues, machis äuä nie meh!;-)
Ok, das wärs gad öpä mou!
Faus es widermou chli lenger söt go mit minä Blog-Iiträg, chöit dr mou uf Dinälis Blog go luägä, si isch amä chli flissiger mit bloggä!
