Berlin zum zwöitä: s Berlinteam;-)

Berlin zum erschtä: Sightseeing

Fernsehturm vom Alexanderplatz us...
Dr Berliner Dom...

U-Bahnstation

S nöiiä Bundeskanzleramtsgebäude...

S Brandenburger Tor... leider hanis nid ganz chönnä Fötelä wiu si ä Feschtplatz für d Liechtathletik-WM vor dran ufbouet hei.

42km Marathon vo dä Männer: Kenianer si scho vo afang ah vorab gsi!

S Bundeskanzleramt mit dr Kupplä vom Reichstag hingä drannä, vor Spree us.

Hackescher Markt... Und s Tacheles, ganz ir nöchi vo üsem Hotel...

Dr Gendarmen markt (wär jo eignetlech säubschterklärend;-) Und no dr Checkpoint Charly...

S letschtä Weekend, vom 20igscht bis am 23igscht Auguscht bini z Berlin gsi.

Üses Hotel isch ar Oranienburgerstrasse gsi und vo dört us hei mer am Donnschti z Fuäss ä Entdeckigstour gstartet. Si zum Dom glofä u när zum Fernsehturm, witer zum Alexanderplatz u när no zum Hackescher Markt.

Am Friti hei mer de ä Spreefahrt gmacht, ä 4 Stündigi... das isch doch gad echli lang gsi u mir si de früäzitig usgstigä... leider isch äbä s Wätter ou nid so toll gsi u mir hei aui chli früsch gha. Am nomi si mer de no is KaDeWe, is Kaufhaus des Westens go shoppä. Aber usser Schoggi und em nä Bier hei mer nüt kouft;-)!

Und am Samschti hei mer de no ä Bus-Sightseeing-Tour wöuä machä... mir hei auerdings nid mitem Marathon grächnet u das dr Bus wäg däm nid fahrt. Jä nu, so si mer haut de die wichtigä Sachä abgloffä und dr Marathon hei mer auso ou no gseh! Mir si d Friedrichsstrasse abägloffä zum Brandenburger Tor, när zum Reichstag, zum Potsdamer Platz zum Checkpoint Charly und zum Gendarmenplatz... när si mer no chli go shoppä;-) und nachemnä verdientä Bier si mer de no is Tacheles, is autä Kunschthuus. Und am Obä hei mer de ou no die Hackescher Höfe gfungä.. leider hei mer äbä glich nonid aues gseh... und müässä de nomou go:-)!

Cyrill Luc

Geschter bini äxtra zum Coiffeur...

wiu i ha mi für öper ganz speziells wöuä schön machä...

dr Cyrill Luc Bamal!

Open Air Gampel

Voila no äs paar Iidrück vo Gampu. Leider isch mer erscht am letscht Tag i Sinn cho dasi jo äxtra dr Föteler ha mitgno, drum gits haut nid so viu Biudli. Aber wie mäh gseht (wie mä vorauem üs aagseht;-) isches seeeehr heiss gsi. D Lüt hei auso ou gar nid mögä vor dr Bühni id Sunnä stoh und umähüpfä... drum gsehts us aus häts nid so viu Lüt gha... mir hei Silbermond, SnowPatrol, Milow und PatentOchsner gluegt u bi auem angerä hei mer natürlech ou geng chli inä glost. Farin Urlaub hei mer rächt schnäu ufgäh, äs het sooooo viu Lüt gha... Phenomden isch no kuul gsi, und The TingTings, Telaphones, The Rifles, The Loops... eh jo und Lovebugs und Wurzel5 kennt mä jo...
Nöchscht Johr isch auso ou scho planet:-)!

Ganz viu passiert...

Auso d StreetParade isch super gsi, wie geng, u das Johr sogar trotzt äm Rägä! Üses Beieli-Outfit isch auso ou ganz kuul gsi, u zur Abwächslig hei mer sogar bequemi Schueh (absatzlos für einisch) angha. Wie mä uf dä Föteli gseht hei äs paar Lüt Schweinegrippe gha (oder die brillianti Idee sech mit Maskä z stylä) und wie mäh ou gseht hei mer gluägt das mer gnuä Flüssigkeit zue üs näh. Üs ischs auso rächt guet gangä... isch ömu wider mou äs Erläbnis gsi;-)!

När si d Ferie wider dürä, s Spanisch het wider agfangä und i wirdä jetz Marketingassischtentin und darf einisch ir Wuchä id Schueu. D Melä geit scho gli, d Martina geit scho gli und i planä dr nöchscht Churzurloub... Drfür wohnt d Sarah wider chli nöcher und jetz chöi mer de wider zämä uf Männerfang (oder so;-)!

S letschtä Weekend bini mit dr Christine z Gampu gsi und morn flügi mit dr Diana, dr Corinne und dr Annemarie uf Berlin...

Street Parade 2009