13. Oktober ...

No äs par Föteli vom Geburi-Fescht vor Andrea und mirä Schwoscht...

Nomou äs paar Föteli vom Turnier

Üses 2tä Turnier...

Auso, das si s Piry und ig ir erschtä Prüäfig z Tavannes, geschter am Morgä. Mir si aus erschts am 8ti am Morgä dra cho, gad glich zitig wie d Chüäh uf d Weid hei dörfä... Wenn dr guet luäget, de gseht dir im Video gad am Afang wie mers Piry am Sprung verbi secklet... scho mou 4 Fähler... när gseht dr die 3 Sprüng wo guät si gangä;-), mini Schwe het gad im richtig Moment gfiumet! Aus nöchscht chäm de d Kombination, wo mers Piry vorem 2 Sprung stoppet, scho wider 4 Fähler. När schaffä mer die Komibnation und... s Piry entscheidet sech fürnä spontanä Richtigswächsu und ig machä ä Salto vorwärts und landä im Sang! Super, disqualifiziert! Drbi hei mers doch deheim so guät chönnä... na ja, hanä Entschuldigung s Piry het eifach nid i Richtig vo dä Chüäh wäuä ritä, mi gseht auso ou ufem Video, wie si nachem erschtä Sprung, obä uf dr Voltä umäzicklet...

Na ja, dä isch ömu vou id Hosä... die 2. Prüäfig isch dr für ganz guät gangä (d Chäh si wäg gsi;-)! Ha zwat leider äs Stangeli gha, aber wenigschtens hei mer dr Parcours ferti grittä und i bi nid abägflogä, juhui!

KV-Fescht

Soooo, und jetz wär auso ou d Sarah no i mim Blog verewiget:-)!
Wiu sech üsi nättä Koleginä eifach vorübergehend ohni üs is Usland abgsezt hei, hei mir üs zämä gschlossä und si geschter gmüätlech go Znacht ässä zämä... D Celine isch de doch nid mitcho, wie planet, si het schinbar nid nochä mögä mit Wohnig putzä!
D Sarah und ig si so uf die 7ni as KV-Fescht, go s nöiä KV-Schueuhuus aaluägä, leider het mä aber numä bis am 7ni inä dörfä, mir si auso gad z spot gsi, und so hei mer s de haut numä vo usä gseh... aber äs gseht mega kuul us. Nachem ässä bim Hafä si mer de no einisch go luägä, aber usser äs paarnä Lehrer hei mer niemer kennt, und drum si mer de när scho gli... hei go schlöfälä;-)!

Fondue ufem Böz

Am Sunnti bini wider mou ufem Bözingebärg gsi äs feins Fondue go ässä...
Das wäri no die schöni Ussicht;-)!!!

Sabag-Usflug

Nach däm mer seeeehr früäh si ufgstangä, si mer de fasch pünktlech, am 20 vor Sibni bir Sabag z Bözingä abgfahrä. Nachem Kaffe und Gipfeli hei mer de ä Rundi witer pfüselet, oder mir heis ömu probiert... aber bi däm Gschnurr het das nid so guät funktioniert.

Um die Nünä si mer de bir Gelmerbahn acho, und dört hets üs de du fasch iigfrorä, zum Glück hani no Händschä drbi gha;-)! Bim Gelmersee obä isch de ändlech d Sunnä fürä cho und äs isch chli wermer wordä!

Ufem Wäg abä. Seeeehr steil!

S feine Apero vom Schlossbeck hei mer bim Car übercho, und s Thesi het no Champis spendiert...

Äs Murmeli, bim Grimselblick, wo mer si go z Mittag ässä.

Und hie si mer no mit dr Furka Dampfbahn vo Gletsch nach Realp gfahrä... seeeeehr langsam;-)! Aber glich schön.

U do hani doch no öpis glehrt;-): dr Rohnegletscher und d Rohne...

Äs Vermögä spöter... und ä Flug richer!

Jetz isches äs auso so wit, i gangä auso würklech scho gli wider id Ferie! I ha hüt mi Flug zaut (u mis Konto isch jetz dementsprechend läär). Buechet isch jetz auso am 3. Dezember uf Dehli (Indie) härä flügä und am 12. März vo Singapur (Malaysia) retour flügä! Sehr guät, jetz bini auso scho fasch parat… jetz muäsi numä no Visas organisierä, mi über d Impfigä informierä, mini Reiseapothek nöi usstattä, die genaui Routä planä und Zwüschäflüg buächä unds erschtä Hotel reservierä;-)! Git fasch nüt z tüä! När packi s Zahnbürschtli i, und fahrä a Flughafä! Hihi, ok, vilech nimi chli meh mit aus s Zahnbürschtli… vilech no dr Reisefüährer;-)!
Ah jo, i planä auso die Reis vorussichtlech äleini z machä, aber faus sech natürlech öper wett aaschliessä, dir sit aui härzlech Wiukommä!
Das wär auso mou mini provisorischi Reiseroutä: Indie, Nepal, Tibet, Bhutan, Indie, Bangladesh, Myanmar, Thailand, Laos, Vietnam, Cambodscha, Thailand, Singapur;-)! No mit äs par Schloufä und Umwägä, säubschtverständelch, hihi!

Nei, i gloubä äbä fasch für aues aazluägä fäut mer Ziit:-(! Auso Indie machi vorussichtlech numä dr Nordä, aber das Land interessiert mi äbä fasch am meischtä, drum loni mer dört am meischtä Ziit! Ig weis säubschtverständlech ou das Asie de nid wie Amerika oder Zentrauamerika, oder öpä no wie Italie isch… natürlech weisi ou nonid so viu drüber, aber i weis ömu chli öpis über ihres Kastensystem und usserdäm hani mou sones Buech (ig weis, wäg däm weisi geng nonid viu übers Land) glässä, "Das Dach der Welt" hets gloub gheissä… ah nei, moment das wär jo Tibet… hm, google, google, google, ah jo "Das Gleichgewicht der Welt" vom Rohinton Mistry. D Nicä het das denn mit uf üsi Reis gno, mir heis beidi gläsä und heis beidi nid eso toll gfungä… aber äs isch eifach mega "interessant" gsi.
Weni mi richtig erinnerä geits umnä Giäu wo usem nä chlinä Dörfli userä Lädergerber-Familie chunnt, us dr nidrigschte Chaschte auso. Si Vater het de mit Schniderä aagfangä für besser z verdienä. Dört hei de die ganzä Problem ou scho aagfangä wiu äbä dr Schniderbruef numä sörigä us ärä höcherä Chaschtä vorbehaute isch. Dr Giäu isch de när mit sim Unglä id Stadt, und het dört ou Schnider glehrt… die 2 schaffä de när birä alleinstehendä Wittwä, wo sech mitem Verchouf vo Chleider überem Wasser hautet und geng mit ihrem Brüätsch muäss kämpfä wo sä wott verhürotä und ou mit ihrem Vermieter wo sä wott us dr Wohnig schmeissä.
Auso, bis zletscht stirbt em Giäu sini ganzi Familie, är wird kastriert, dr Unglä verlürt Bei und d Frau ihri Wohnig und Schneiderei… und meh weiter gloub gar nid wüssä. Irgendwie mani mi ah gar kei positivi Szene i däm Buech erinnerä! Vermuätlech hanis wäg däm ou nid guät gfungä… äs Happy End chöit dr uf jedä Fau ou scho grad mou vergässä!
Gseht dr, jetz muäsi mi säuber no vom Gägäteil überzügä...

Mis erschtä Turnier und Südoschtasie...

Auuuuusooo, am Sunnti hani ändleche ändleche mis Turnier gha! Läck, bini närvös gsi, u i bi mega froh isches dürä und i bi no viu glücklecher dases isch guät gangä:-)! Jo natürlech hani nid dr erscht Platz ghout, auso eigentlech gar kei Platzierig, aber immerhin hei s Piry und ig ou nid aui Stangeli abgrumt.S iiritä vor dr erschtä Prüäfig isch igentlech guät gangä, bis mer s Piri mou gstoppt het voren Oxer, und när isch gad nüme gangä... aber d Fabä het das auso ganz guät gmacht und het mer die ganz Ziit gseit was machä u de hani när ou scho gli a Start müässä. Die erschti Prüäfig hani de när so häb chläb gschafft, s Piry het fasch vor jedem Sprung wöuä ahautä und i ha sä de geng im letscht Ougäblick no drüber gjagt. Na ja, guät usgseh hets äuä nid:-(... aber immerhin hei mer dr Parcours chönnä dürä ritä:-) entgägä aunä Erwartigä! Ir erschtä Prüäfig hani eis Stangeli und eis Revue gha; ir Kombination isch si mer am 2tä Sprung verbi gallopiert.
Wie bir erschtä Prüäfig het ou bir 2. s Rämi mit mer dr Parcours aagluägt, do bini auso schono froh gsi, hätts äuä äleini nid tschegget und d Fabä het jo müässä Piro ha! Verrittä hani mi de auso ou nid! Dr 2. Parcours isch auso när ou viu besser gangä, bi nüm so närvös gsi und ha mi dasmou ou würklech uf das woni machä chönnä konzentrierä... leider het si mer när bim 5 Sprung gstoppet und när hanis haut nid mou is Stächä gschafft. Aber im Grossä und ganzä bini auso zfridä und i hoffä mou bim nöchschtä Mou bini de nüm so närvös. Und drum hani mi gad wider aagmäudet für am 6.10. Tavannes;-)!
Und i bi auso ou wahnsinnig stouz ufs Piry, si het sech nämlech wäuts guät benoh, si isch gar ni närvös gsi und het nid umäzickt wäg dä angerä Ross und i Hänger iigstigä isch si ou ganz brav.... ach sones liebs Rössli;-)!

Mit mire Reis wirds auso ou langsam Ärnscht! Auso würklech numä langsam, aber jetz geits scho gli so richtig as Planä. Bi vorletscht mou im Reisebüro gsi und ha mi über mini Wunschdestinationä lo berate... na ja, auso das isch gad chli übertribä... auso mini Ziu wärä jo gsi, entweder Südamerika oder äs Around-the-World-Ticket uf Argentinie-Singapur-Indie-Schwiz... oder so ändlech. Auso dä mitem Arround-the-World-Ticket het si mer relativ schnäu usgredt, wäri viu z tür gsi, für dasi "numä so weni Ziit" zur Verfüägig ha... När hani gfungä, jo, de entweder Südamerika oder Südoschtasie, u mini Beraterä, d Sarah het mer när so vo Asiä vorgschwärmt, dasi mi de när zimlech schnäu für die Richtig entschidä ha. S chunnt mi haut ou hli biuiger, wiu die planeti Spanischschuäu wögfaut... vom Flug här, wärs schüsch fasch glich tür. Jetz heissts auso numä no buächä... und sparä!

Südamerika oder Südostasien?

(Ou das isch wider einä vo dä nie veröffentelchtä, nie fertiggschribnä Iiträg woni nech nid wott vorenthautä 24.08.2010)

I has ändlech gschafft, i bi am Samschti am Morgä z Bieu im Globetrotter-Büro ghocket und ha mi lo beratä. Mini Idee vom Around-the-World Ticket, het mer d Sarah, mini Beraterä de zimlech schnäu usgredt... z viu zweni Ziit für so viu go aazluägä und im Verglich zu minä angerä Idee, gad öpä 3 mou so tüür! Around the world isch auso vorläufig gstorbä...

Jetz steit no die erschti Idee woni gha ha, Hi uf Buenos Aires go Spanisch lerä und hei vo Caracas... ou dört het mer d Sarah natürlech gad gseit das 3 Mönet haut definitv z weni si... wär häts erwartet!

U die 2. Routä wäri jetz äbä Singapur härä und Dehli hei! Und, jo genau, säubschtverständelch si ou dört 3-4 Mönet zweni und i müässti säubschtverständelch no Zwüschäflüg buächä... Auerdings würdi jo bi Asiä d Sprachschuäu wägfauä was mer chli meh Ziit u Gäud würdi gäh... Dr Flug chani bis ufenes Johr usäschiebe (nenei machet nech keni Sorgä machi natürlech nid), auso weni ir Ziit knapp drinnä bi u no chli Gäud übrig ha, chönnti no 1-2 Wuche lenger blibä! Säubschtverständlech muäsi das zerscht mit mim Läbenspartner (aka Piro, diversi Lüt betitlä jo mis Ross äso) besprächä... eh jo, i muäs mer das ganzä no guät überlegä!

Übrigens het mi hüt mis liebä Piry wider mou abägschmissä... säubschtverständlech het si das nid absichtlech gmacht, i ha eifach dr Sprung ä chli höcher überflogä aus si und bi när nid ganz ä so sanft glandet... naja, äs isch no aues ganz, gloubi ömu:-)!

U nomou vo Züri...

Und no s Foto vom Tag - ohni Kommentar;-)

Streetparade

CCI* Avanches

Am 4. und 5. Auguscht isch z Avenches äs internationaus Vielsitigkeits-Turnier gsi, wo d Betta ou het mitgmacht, und drum isch d Fabienne mit mer cho luägä. Mir si am Samschti go CrossCountry und am Sunnti go s Springä luägä, Dressur am Fritig hei mer verpasst.

D Fabä u i hei zimlech vor üs härä brötlet, sch huerä heiss gsi! Sisch aber no rächt interessant gsi, wiu i jo immerhin 5 Teilnähmer kennt ha;-) und mit dr Betta u dä Chundä hani ou chönnä redä und sogar d Ludi, die blödi tschinngischi Pflegerä, het chli mit üs gredt!

Auso, d Betta isch mitem City Boy 5. wordä und sr Raffaele mit dr Ardean 12. Isch doch nid schlächt:-)! Ömu besser aus ou scho...
Dr Mario, mit em Ohio, wo jo eigentlech super wär, het totau verseit! Är isch sowou im Cross wie ou im Springä z. T. im Trab uf d Sprüng zuägrittä... Wieso? Ha mi chli ufgregt!

Dr Don, het schiinbar 3 mou verweigeret im Cross und isch drum usägflogä und het gar nm as Springä müässä.... när blibt no dr Gigio, dä isch mit r Betta schiins irgendwo i dä 20ger glandet!

Fernhill Flight (Gigio)

Fernhill City Boy

Siegerehrig: die 5. vo rächts isch Betta mitem City, und dr 3. vo links isch dr Raffe mit dr Ardean Manor

Föteli vom 1. Auguscht-Brunch

Das si auso mini Eutärä und mini Schwöschter am Zmorgätisch... d Täuer si natürlech scho läär;-)! Gemäss em Papi simer auso irgendwo ufem nä Bärgli ir Nöchi vo Zwüschäflüäh, im Diemtigtau!

Das isch no dr Usblick vo oberhaub vom Restaurant.

Ha mini Schwoscht nachem Ässä s Bärgli uf, zurä Verdouigswanderig gschleppt!

Do isch si auso gad am ufächragslä...

Und do si mer de när ganz erschöpft ufem "Gipfu" aacho!

Dr Schwum im iiiiiischautä Thunersee hei mer üs auso de när wou verdient!

Gähn...

Zurzit si mer gad z Lyß ar Wiibar/Kiosk! Mir si liecht überbsetzt hie, mir si glängwillet und am schmäuzä si mer ou! Wieso das mer scho am haubi 5i hei müäßä do si, isch nonid so klar! S het fang ca 10 Lüt und d Band isch immer no am Soundcheck! Mir chönntä jetz natürlech üsi Znachtpousä iilegä aber da i hüt scho usgiebig brunchet ha... bini no gar nid so hungrig (jo, das gitz)!

Bagatello

Geschter z Obä si d Melä d Celä u ig uf Lyß as OpenAir ad Comedy-Night cho! Natürlech houptsächlech wägä Bagatello;-)! Mir hei üs zwar zimlech dr Arsch abgfrorä, aber äs isches definitiv wärt gsi! Wo dr Adi s Märli verzöut het u när gad dr Amadeus im Obächleid isch ufträttä, hei mer aui Tränä glachet!
S Föteli isch vor Britney Spears Performance, vilech gseht mes;-)...

Friti, 27.07.

Eh, jetz hanis no fasch vergäßä: das isch no üsä 'Sabag'-Usflug am Friti-Obä gsi! Dr Fanky u ig si am Friti nachem schaffä go d Diana abholä u när si mer zämä uf Sutz a See gfahrä wo mer dr Küsu troffä hei, dä isch dört mit sim Töchterli am zäutlä gsi! När si mer ganz churz is Wasser gumpet und mi muäs sägä, bis diä 2 Herrä im Wasser si gsi si mir 3 Damä bim Stäg scho wider dußä gsi;-)!
När hei mer äs paar Bierli drunkä, Fisch gäßä u plöiderlet! Irgendwenn isch de no d Ex-Sabag-Corinne cho u i würd mou sägä mir si ä ganz luschtiga Trup gsi! I sägä numä: Mittustrau;-)!