Kambodscha - Singapur - Australien

Huuuhuuuu! okey, das isch jetz aes bitzeli Schiesse, wiu d Foeteli si wuerklech aui chruez und quer, has widermou nid so im Griff gha... und dummerwiis hei mer ungerdessae scho wider sooo viu gseh, i weis aeuae vor heufti vo dae Biuder gar nuem wases gsi isch! Eh ja nu, i probieres jetz mou...

Ah, das isch z Singapur gsi, Chinatown...
Und no gad d Skyline, aebaefaus vo Singapur!
Ja, das isch dr Pool vo uesem tuerae Hotel, em Reef Resort, z Sihanoukville z Kambodscha!
Uesae letscht Obae z Cambodia, mitem Dave vo Victoria, Canada und dr Rolae usem Seeland...
Ah isch die nid schnuselig, Priscilla im Cleland Wildlife Park i dae Adelaide Hills z Australie...
Ein Baby-Roo:-)

Das isch dr Merlion, s Wahrzeichae vo Singapur...
Aes paar Laedae, uf ueserae Sigtseeingtour z Singpur....
S War Memorial z Singapur... 1 Pfiler fuer d Malay, 1 fuer d Inder, 1 fuer d Thay und einae fuer d Minderheite...
Uesae pinkig Hippo-Sightseeing-Tour-Bus...
Uhh, jetz wirds schwirig... hmm, das isch ufem waeg vo Adelaide nach Melburn gsi... aecht im Grampian National Park? Weis nuem mues de im LP go nochae laesae...

Das isch Kasia woni miterae z Italiae zaemaegschaffet ha... si het ae chlinae Stadtrundgang gmacht mit ues, aber houprsaechlech hei mer ae Beizaetourgmacht;-)!
Das isch ufem Mount Lofty, nachdaemmer im Cleland Park si gsi. Mi gsehts leider nid so guet, sisch chlei chli, aber ufem Foto gsaech maeh Adelaide...
Das isch es, ehm, Enchidna...?
Chrigi am Kangaroo fueetterae... u die hei sech sogar lo kraulae... im Park natuerlech;-)!

Das isch a uesem 2 Tag z Adelaide gsi, do hei mer ae Usflug is Barossa Valley gmacht u si es paar Vineyards go aaluaegae und hei saeubschtverstaendlech ou Wii probiert (hei auerdings keinae poschtet...)
Das numae so das dr nid vergaesset wie mer usgseh;-)...
Oehm, das weisi nuem wasi gfoetelet ha, und wieso idas ufaegladae ha... aeuae eifach waeg dr Landschaft... auso d Foetlei wo jetz choemae si vor Great Ocean Road!

Auso das isch no vom Botanic Garden z Singapur...

Ah, 12 Apostels...

Auso jetz wuesset dr jo ou scho gad was mer ir letschtae so gmacht hei... si vo Cambodia nach Singapur gflogae u hei doert 2 Taeg verbrocht. U das isch auso scho gad ae raechtae ungerschid gsi... z Singapur hets ploetzlech mega viu Luet gha und Hochhueser und sueberer isches natuerlech ou gsi, aber vorauem tuerer! Dae autae Ziitae Waegae si mer de is indischae Viertu ines Hostel, u doert hets aecht gwimmlet vo Inder, und gschmoeckt hets ou nach Curry, aber schuesch isches gar nid z verglichae gsi... naer isches de witergangae mitem Flugi nach Melbourne, doert si mer am Morgae frueah acho u si fasch iigfrorae, hei auso gad uesi gfaktae NorthFace-Jaggaenae uspackt! Hei am Flughafae aes Outogmietet u si gad losgfahrae i Richtig Adelaide, s Kash go bsuechae!

Saeubschtverstaendlech si mer aer Great Ocean Road nochae gfahrae, hei uesi erschti Begaegnig mitemnae laebigae (hei vorher scho ganz viu toti am Strossaerand gseh) Kaengi gha, hei de ungerwaegs i irgendemnae Kaff uebernachtet (am 9i am Obae isch scho aues zueh gsi, u mir hei mit Mueh und Not no oepis z Aessae gfungae) u di de am noechschtae Tag am Obae z Adelaide acho...

Z Adelaide si mer 3 Tag (1. Tag hei mer City-Sightseeing gmacht, am 2. si mer is Barossa Valley und am 3. si mer nach Glenelg ad Beach und naer id Adelaide Hills) blibae und vorgeschter, am Samschti si mer de quer duers Land vo Adelaide nach Melbourne kesslet... Geschter hei mer ues de mitem Boris troffae, das isch sonae richtigae Melbournian wo mer z Vietnam uf dr Ha Long Bay-Tour kennaeglert hei, und dae het ues de dr ganz Tag Melbourne zeigt. Isch auso super gsi, hei im nae mega feinae Veggie-Restaurant z St.Kilda gaessae und hei im Hafae Mini-Pinguinae gseh und am Obae hei ues aunae Bei weh to;-)!

Jo und jetz si mer aebae huet nach Canberra gfahrae, morn machae mer wider ae Walkingtour und am Nomi fahrae mer witer nach Sidney...

Angkor Wat, Beatocello, Chinder und dr Chochkurs...

S Schattaetheater...

...und d Apsara-Taenzarae a uesem erschtae Obae z Siem Reap!

Angkor Wat...
U wius so schoen isch no gad no einisch...
Apsara-Taenzaerae Wandbiuder...
Dr Bayon ir Angkor Thom Aalag, mit dae Gsichter uf dae Tuerm.

Eis vo minae tuusigae vo Saeubschtportrait...
Und deumou simer sogar zaeamae uf dae Foeteli;-)!
Si si jo wurklech mega suess, die Ching!
Uesaes Tuctuc voremnae Taempu...
Mein Schwsterli in der Ruine...
Dr. Beat Richner...
Ueses Straendli Sihanoukville, Serendipity Beach...
Ufem Waeg zur Sokha Beach...

Das isch uesi Chochlehreris vo huet mit dr Banana Flower...

Und s Chrigi am Banane fritierae!

Nach Phnom Penh si mer de fuer 3 Taeg uf Siem Reap... doert hei mer saeubschtverstandlech s Standart-Tourischtae Programm duerae gmacht u si am erschtae Tag gad go dr Ankor Wat aaluegae, s Wahrzeichae vo Kambodscha, wo auso ou uf dr Flaggae abbiudet isch.
I wott nech nid mit dae Naemae vo dae einzaelnae Taemplae laengwilae, aber aes si viu gsi, si waehrend 3 ganzae Tag vo eim zum angerae gfreset und aes isch vilech huuuuerae heiss gsi! Heit dr Mitleid?
Am erschtae Obae z Siem Reap simer auso gad aes Schattaetheater und ae Apsara-Tanz, beides vo Ching ufgfuehrt go luaegae... mir si auso ganz flissig so Sachae am ungerstuetzae und hei ues ou scho ae Childsafe-Taeschae kouft, vo Eutarae gmacht, damit d Ching id Schueu cheu (http://www.childsafe-international.org/)
D Apsara-Taenzerae si die Figurae wo hie ueberau uf dae Taemplae abbiudet si, und bim tanzae tue si so ganz komisch ihri Finger verbiege, gaegae hingerae dehnae..

Apropos Childsafe, fuer die wos nonid wuessae... i mues mi doch immer wider ab dae Tourischtae naervae wos eifach nid tscheggae, obwous i jedem Reisefuehrer seit, und d Tourguides saegaes eim ou no geng... aes doent zwar boes, aber faus dr mou goet go Reisae: gaet dae Ching kei Gaeud, und choufet nae nuet ab! Das duet sae numae drzue motivierae go z baettlae, isch jo lukrativer aus id Schueu zgo! Usserdaem verdienae si de ufzmou meh aus ihri Eutaerae und die schickae sae de erscht raecht nuem id Schueu! Auso gschider Taefaeli oder so verteilae...

Oehm, Abschwaenker, wo bini gsi... ahm Samschti Obae z Siem Reap si mer de no anes Konzert vom Beat Richner, dank em Tip vor Monika (Merci;-). Dae Dokter het auso z Kambodscha 5 Chinder-Spitau, Behandlig isch fuer aui Ching gratis, und wird houptsaechlech vo spaendae (vo ues liebae Schwizer) finanziert. http://www.beatocello.ch/ faus oeper wet Spaende ;-)!
Aer het de Cello gspiut und zwueschaeduerae geng chli verzeut und Video zeigt, isch auso sehr interessant und beidruckend was aer uf Bei gsteut het... isch uebrigens Schweizer des Jahres gsi im 2002!

Am Sunnti si mer de vo Siem Reap quer duers Land nach Sihanoukville ad Kueschtae gfahrae... hie isches zum Glueck wider chli chuehler, und mi cha ganz gaebig dr ganz Tag a eim vo dae verschidaenae Straend ligae, hihi! Ungerdessae si mer auso ou scho viu bruener aus uf dae Foto!;-)
Zum Abschluss vo uesem Ufenthaut in Indochina hei mer ues jetz no chli oepis gleischtet und wohnae jetz 3 Tag im nae super Hotel fuer 40$, mit Pool... okey sisch huerae tuer im Verglich was mer bis jetz geng zaut hei... aber sones geils Hotel finge mer gloubs niene meh uf ueserae witerae Reis, fuer dae Pris!

Huet si mer auso widermou flissig gsi, mir hei ae Khmer-Chochkurs gmacht. Mir si die einzigae Teilnaehmer gsi und hei drum doerfae usaelaesae was mer wei chochae. Aus erschts hets Fruehligsrouae gaeh, naer Bananaebluetaesalat mit daempftem Poulet, naer Fisch-Amok (Traditionells Khmergricht, Khmer si uebrigens d Ihwohner vo Kambodscha), u naer no fritierti Bananae zum Dessert! Aes mega Menue, und fuer d Chrigae hets ueberau die Vegetarischi Variantae gaeh! Sisch auso superfein gsi und dir sit saeubschtverstaendlech de gad aui zm aessae iigladae, wemer wider deheim si:-)...

Roller, Campari und Killing Fields...

Huh, wie dir gseht hani huet chli Problem mit minae Foeteli, drum gibis jetz gad uf! Muesst sae de haut aaluaegae weni zrugg bi, hehe! Apropos, ha mer auso huet gad ae neuae Foeteler kouft, das hani jo eh woeuae, und schuesch hani jo nuet woni mer cha lo staehlae;-)!

Das waeri auso dr Vercher z Saigon... wenn dr auso gmeint heit Rom sigi schlimm, was d Roller betrifft, vergaesset das, Vietnam isch nid z uebertraeffae! Im Hingergrund uebrigens no dr Independence Palace...Chli Scheisse waeg dr Farb, aber dr Titu zu daem Biud waer: I nimae no ae Campari-Soda... D Schwoscht und ig, bim Mittagsstop im Mekong-Delta... mir hei auso saemtlechi Namaelosae-Fruecht probiert! S eintae isch oepis Litschi-artigs unds zwoeitae oepis Oepfu-artigs... beides saeuberpflueckt.

Das isch dr Floating Market z Chau Doc... am Morgae am 6i uebrigens!
U das isch dr Sunnaeufgang ueberem Mekong...
Mir hei auso sonae Tour gmacht vo Ho Chi Minh is Mekong Delta, naer si mer mitemnae chlinae Bootli ueber d Graenzae nach Kambodscha und naer witer mitemnae Schiff dr Mekong dueruf, si duer d Nacht gfahrae und naer am Morgae no aes paar Sachae go aaluagae, ae Floating City und aes Cham-Dorf (ae Moslem-Stamm) und si naer mitem Bus nach Phnom Penh chauffiert wordae...
Hei sogar no aes Floating Hochziit gseh:-). Wasserbuefflae...
Dr Verchehr z Phnom Penh... so soerigi Transportae gits ganz huefig, oder de hockae si z viert ufem Toef!
Das isch dr Sunnaeungergang vo uesem Restaurant us...
Widermou aes Saeubschtporttrait...
Das isch dr Wat Phnom... duer dae Taempu het auso Phnom Penh dr Namae uebercho. Phnom heisst Huegu (u dae Taempu steit tatsaechlech ufemnae Huegu;-) und Penh isch dr Namae vorae Frou wo vore eirae Ewigkeit 5 Buddha Statue het gfunge und fuer die ae Taempu het bouet... ufem nae Hueguu! Interesssaaant...

Auso wie gseit, mir si ungerdessae s Phnom Penh, morn geits witer nach Siem Reap, Angkor go aaluaegae...

Geschter hei mer auso ae City Tour gmacht mitem Tuctuc, isch auso sehr interessant gsi! Mir si Killing Fields unds Prison go aaluaegae... Khmer Rouge, ae kommunistischi Partei hei ae Revolution aagfuert, und hei do eifach mou aui besitiget wo nid uf ihrer Site si gsi, oder wo si gfungae hei aes sigae Verraeter, u die si saeubschtverstaendelech gad mit dr ganzae Familie besitiget wordae! Chunnt ues das nid bekannt vor?

Scho, nume isches no viu Schlimmer, mi het a Munition woeuae sparae und het drum... jo, i wott nech nid mit daem belaschtae! Aes isch eifach oepis wo zu Kambodscha ghoert und mi sett das wuerklech go aaluaegae we mae hie isch... aber aes isch eifach sehr sehr bedrueckend.

Und das isch uebrigens nachem WWII gsi!!!

Ues geits auso super, mir gniesses mega, aber aes isch huuuuerae heiss! Morn geits wider chli i Nordae und i hoffae de wirds de wider chueler...

Widereinisch...

Auso, gad mou vorae waeg, damit drs aui wuesst: mir isch widermou mis Natel abhande cho! Eh jo, isch jo nid eso tragisch. Heit jo mirae Schwe ihri Nr. faus irgendoepis wichtigs soetti si... und faus dr mi waaaaahnsinnig vermisset, de cheut dr mir jo aes E-Mail schribae;-)!

Aber schuesch isch aues beschtens, mir si jetzae sit 3 Tag z Saigon, auso z Ho Chi Minh City... hei am erschtae Tag flissig Sightseeing gmacht (hm, z Fuess, u das i eirae Hitz) und geschter si mer d Cu Chi Tunnlae go aaluaegae. Das ischsones ungerirdisches Tunnu-Syschtem wo d Suedvietnamesae waehrend em Chrieg buddlet hei... aes isch ueber 200km laeng und geit mehreri Stoeck i Bodae abae... isch auso ganz intressant gsi... hei ou i sonae Tunnu abaechoennae, aes isch mega aeng (chasch auso nid ufrecht stoh) und heiss gsi, und waehrend d Chrige umdrait het bini vorwaerts gsecklet zum noechschtae Notusgang... mir hei aeuso schinbar beidi chli ae Phobie.
Huet si mer de no im botanischae Gartae gsi und im Zoo... aes isch aeuae widermou aes National Holiday (usnahmswiis mit Positivae Naebaeeffektae fuer ues;-) gsi und mir hei gratis inaedoerfae! Ehm jo, schuesch waerae mer aeuae gar nid inae, wiu d Chaefige und Gehege si hie, z Asia, eifach nid aeso Tierfruendlech...
Am Nomi si mer de naer aes Wiili lang deheimae umaeglaegae, si aer Nomitagshitz entflohae... und uesi Klima-Alag het mi de no mit Iis bespuckt... weis zwar ou nid genau wie das isch gangae:-)!
Ah jo, vorhaer, zwueschae Hoi An und Saigon si mer jo no z NaTrang gsi... doert si mer aber numae duerae Tag gsi und si am Obae gad wider i Nachtbus gumpet! Mir si haut chli gstresst, aber Na Trang waer eigentlech no schoen gsi, direkt am Meer! Jo natuerlech, mir si go badae!:-) Aber erscht nachdaem mer 1 Stung lang zumnae wiisae Buddha tschirget si... mir tuee auso brav immer aui Tourischtaeattraktionae besichtigae!
Na Trang isch auso usnahmswiis mou keis World Heritage Monument und das het mae ou gmerkt... ah jedem Eggae si si aes noeis Hotel am haeraesteuae, das isch aechli schad!

Morn geits de scho witer nach Kambodscha, mir hei wider ae 2 taegigi Bootsfahrt buechet, de goe mer zerscht s Mekong-Delta go aaluaegae u naer fahremer dr Mekong ufae nach Phnom Penh...

Aaaach, das hani jo fascht vergaessae: mini Schwe het jetz ihrae Flug nomou umnae Monet verschobae und d Andrea fluegt afangs Mai nach Singapur u naer goe die 2 no chli dr Suedae vo Thailand go aaluagae und ig arms muaes gaaaanz aeleini heifluegae:-(!
Auerdings isches aeh so (i weis jo, aes goe do scho diversi Gruecht umae;-), dasi de eventuell ou no 1-2 Wuche lenger blibae, numae damit i no irgendwo cha go a Strand ligae und mi vo dae Reisestrapazae erholae:-)! Aber kei Angscht, lenger aus 2 Wuchae dueni sicher nid verlengere, mues schliesslech de wider mou hei zu mim Piry... und zu euch angerae wo mi aui waaahnsinnig fescht vermisset!
(I vermissae euch natuerlech ou ganz fescht...)

Regen, Regen, Regen...

Auso mit mim Blog wots momentan gad nideso funktionierae... cha nae gar nid go aaluaegae:-(... Hm, mou luaegae oebs aecht trotzdaem klappet! Ha jetz gad usaegfungae dasi jedes Foto einzu cha "compressae" u de chanis naer sogar ufaeladae... und au die Arbeit numae fuer euch...;-) Auso, au die vougaendae Biudli wuerdi haut jetz no zu dae autae Iitraeg ghoerae, und leider hanis haut wider mou nid gschafft, sae ir Richtigae Reihaefoug inaeztuae...

Im Moment si mer jetz auso z Hoi An, Vietnam. Mir si vo Vientiane mitem Nachtbus (das isch widermou aes wunderbars unbequems Erlaebnis gsi... am Morgae am 3 hei mer irgendwo aaghautae fuer 3 Stung, und aes isch Arschkalt gsi, naer simer witer ad Graenzae und doert hei mer ou no mou oepae 4 Stung gha...) nach Hanoi, d Houptstadt vo Vietnam gfahrae! Da mer erscht si am Obae acho hei mer ues is noechschtbeschtae Guest House begaeh und si go Znacht aessae... und da hie eifach aues spoetischtens am 9i zuaetuaet si mer de ou scho gli wider im Hotel am schloefaelae gsi! Am noechschtae Tag hei mer des obligatorischae Hanoi-Sightseeing gmacht und naer si mer ufene 2-taegigi Ha Long Bay Tour...

Hei ae witeri Nacht z Hanoi verbrocht u si naer wider witer mitem Nachtbus (dasmou isches ae vou geilae mit BETT gsi) uf Hue! Hue het mi jetz nid so wahnsinnig beidruckt, si numae d Kaiserstadt go aaluaegae und die isch zimlech aem aerdbodae gleichgemacht gsi... nuem viu drvo uebrig! Und drzue chunnt no dases die ganzi Ziit gschifffet het:-(...

Geschter si mer de vo Hue uf Hoi An gfahrae. Leider hets ou hie die ganzi Ziit gschiffet, aber aes isch drfuer aes ganz haerzigs Stedtli, het viu auti Hueser und Tamplae und mega viu haerzigi Kafi und meeega viu Laedae! D Schwoscht und ig hei zuegschlagae, hei ues je aes paar Schueh und je 2 Roeckli kouft... hm, jetz muesse mer schowider aes Paeckli heischickae! Sisch aber aues Custom-Made und gar nid tuer;-)! Na ja, wemer de heichoemae mani de aeuae eh scho wider nuem dri... aber aebae, isch jo nid tuer gsi!

Huet geits jetz wider witer nach NaTrang... ui, dr Bus chunnt... mues go!

Vientiane

Auso vo Phonsavan si mer mitem Nachtbus witer nach Vientiane, id Houptstadt vo Laos gfahrae! isch auso sehr ae laengi unbequemi Nacht gsi! Si de ou am Morgae am 5i hie acho, und aes het natuerlech wit und breit keis offnigs GuestHouse gha... hei ues de am Mekong, mit Sicht uf Thailand, niderglo... d Muggae hei ues auerdings kei Ruaeh glo und am 6i het de zum Glueck scho s erschtae Kafi uf do, wo mer hei choennae inaefluechtae und Zmorgae aessae!
Z Vientiane hei mer de wider die obligatorischae Taemplae und Buddhas besichtiget und hei dr Raescht vor Ziit wider i Restaurants verbrocht! S het viu europaeischi Beizae hie, houptsaechlech franzoesischi, aber s europaeischae Aessae isch haut glich nid hervorragend und mir haute ues jetz doch lieber wider as iiheimischae aessae, Noodlaesuppae und so. D Baquette, wo mer jetz geng aus Proviant bi dae Busfahrtae hei drbi gha, hangae ues ou scho langsam zum Haus usae;-)!
Mir si auso vou zackig ungerwaegs, huet am Obae geits scho witer nach Hanoi, z Vietnam... si scho gspannt oeb Vietnam ou so schoen isch wie Laos und oeb d Luet ou so fruendlech si!
Mit dae Foto wots im Moment gad nid so klappae, die choemae de aes angersmou...

Ebene der Steinkruege und Shutterbombs

Auso vo Luang Prabang simer witer nach Phonsavan d "Plain des Jarres" go bsueche... das si so risigi usghoeleti Steitoepf, wo ueber nes grosses Gebiet z Laos verstreut si. Mi weis aebae nid wuerklech fuer was die Dinger si brucht wordae, aes git mehreri Theorie: aus Urne, zur Ufbewahrig vo Nahrig... na ja, i bi drfuer das si vo Aliens doert deponiert si wordae:-)!
Mir hei ues arae Tourischtaegruppae aagschlossae, mir si zwar natuerlech die juengschtae gsi, aber sisch no witzug gsi, s het Oestricher, Franzosae und Kanadier gha, und mir hei haut aui verstangae, hihihi! Ues het aber niemer verstangae:-)!
Si de ou no go ae Whisky-Fabrik aaluaegae: aes Strohhuettli mit aes paar roschtigae Tonnae wo umaestoeh... und i denae Tonnae isch Riis am vorsech haerae gaehrae... sehr interessant obwou doch irgendwie chli Zwifuhaft... doert macht schiinbar jedae si eiget Schnapps! Hei de natuerlech probiert, Lao Lao nennt mae das Gsoeff. Ghoert auso mitem Winelao (schmoeckt wie Brusetabletae und isch Pinkig) nid zu minae Lieblingsgetraenk... drfuer hets Beerlao s zimlech hoech uf d Lischte gschafft, het auso zimlech rassig, s indischae Kingfisher Bier ueberhout:-)!

Phonsavan isch schuesch nid wuerklech spezieu... s het ae huufae Geschthueser und aes paar chlini Beizli. Uffaeuig isch, das ueberau Bombae, entscherfti oder detonierti umae stoeh...
UXO (Unexploded ordenance) si Bombae wo ueber Laos si abgworfae wordae und nonid explodiert si... i ha jo gwuesst dases Landmienae git z Indochina... aber i ha nid gwuesst dases soooo viu si!!! Aes isch mega krass und aes macht mi huerae truurig und sauer. Z Laos staerbae im Monet durchschnittlech 26 Personae, houptsaechlech Ching, a Explosionae... Zwueschae 1960 und 70 isch waehrend 9 Johr au 8 Minutae ae Flugzueg-Ladig Bombae (Shutterbombs: ae Riisae Bombae wo sech ir Luft oeffnet und hunderti vo chlinae Minae ueberem Land verstreut) ueber Laos abgworfae wordae... einisch waege dr Unabhaengigkeit vo Laos und s 2 mou im Vietnamchrieg, wo Laos nid mou gross isch drannae beteiliget gsi und beidi mou vo dae USA! 30% vo denae Bombies, wie si gnennt waerdae, si nonid detoniert!
S tragischae isch no die Bombae waerdae immer no iigsetzt, im Kosovo...
Waers genauer wott wuessae: http://www.mag.org.uk

Mekong und Baguette

Chiang Mai simer zletscht gsi... Si auso vo Ayuthaya mitem Zug 12 Stung nach Chiang Mai gfahrae, ir Nacht, aber mit schlofae isch glich nuet gsi, sisch die ganz Nacht s Liecht broennt und mir hei aebae numae Sitzae gha und keni Bett. Aber irgendwie isch ou die Nacht duerae gangae. Hm, hei doert widermou viu Sightseeing gmacht, ah jo und am Obae hei mer ae Nachtsafari gmacht. Na ja, aes isch haut chli laecherlech gsi, wuerklech ae Safari isches jo nid gsi, haut eifach ae Zoo. Aber ou das isch no kuul gsi, bi jo scho ewigs nuem im Zoo gsi, und jo, das ganzae ir Nacht isch haut no spezieu gsi.
Naer si mer mitem Bus witer nach Chiang Rai, doert hei mer de gar nid sooo viu gmacht (das heisst, mir hei numae 1 Taempu aagluaegt:-), houptsaechlech hei mer uesi Ziit i Beizae und ufem Maerit verbrocht. D Schwoscht het sech aes Roeckli kouft und i ha mer lo us dae Haeng laesae... hani doch scho lang mou woeuae!
S het auso de no ueberraschend guaet gstummae! Ok, si het eifach Sachae verzeut wo aeuae uf jedae zuaetraeffae, oder wo jedae gaern ghoert! Wie zB i wirdae eines Tages Saeubschtschtaendig si, mit eigenem Business und so, oder i seu nid geng so stressae, i seu mer chli meh Ziit zum relaxe naeh... Auso, i wiu nech jetz mini Zuekunft verrotae: ig wirdae auso zwueschae 26 und 28gi mi Troummaa fingae, und dae isch saeubschtverstaendlech seeeehr riich (has jo scho geng gseit i weu a riichae Maa;-), und usserdaem wirdi 1-2 Ching ha, und i wirdae mindeschtens 90 jaehrig. 28gi wird auso mis Spitzae Johr si! Hm, usserdaem bini stur und ig reisae gaern (wow, ae huerae Offaebahrig, wie isch si aecht uf das cho?).
Aebae jo, s meischtae isch eifach chli us dr Luft gno, aber i gloubae jetz eifach wasi wott!
Eis stimmt natuerlech, isch auso sehr wichtig: i chumae vo guaetae Euterae:-)! Das het si uebrigens bi mirae Schwee ougseit, wo sech het lo d Chartae legae...
Am noechschtae Tag hei mer de ae Tour buechet, Mae Sai, Golden Triangle (Burma-, Laos-, Thailand-Graenzae oders Opiumgebiet), Chiang Saen und Chiang Khong. Si de gad z Chiang Khong blibae und am noechschtae Tag ueberae Mekong nach Laos iigwanderet... Naer si mer mitem nae Slowboat, mit massaehaft Tourischtae und huerae schmalae unbequemae Baenkli dr Mekong abaegfahrae, mitemnae Uebernachtigs-Zwueschaestop z Pakbeng, und geschter am Obae si mer auso hie, z Luang Prabang, Laos acho...
D Flussfahrt isch auso sehr schoen gsi, dr Mekong isch mega brun, raecht breit und aes het auso riiiisae Catfish drinnae... hei zwar keni gseh! D Landschaft isch geng chli glich gsi, d Ufer entweder faeusig oder sandig und aes geit immer gad steil s Bord uf, u direkt i Waud oder i chlini haerzigi Doerfli... auso i has mega schoen gfungae!
Luang Prabang isch ae raecht grossi Stadt aber mega ruhig, auso eigentlech gar nid wienae Stadt;-)! S het haut z Laos nid aeso viu Ortae womae cha go aaluaegae, drum hets hie eifach ou mega viu Tourischtae. Zu uesserae Freud gits hie ueberau Baguette und Crepes, sisch auso liecht franzosisch aguechet....

Bangkok - Ayuthaya - Kanchanaburi

Auso, wie dir gseht hei mers tatsaechlech gschafft, mit hei d Melae u dr Robi z Bangkok troffae:-)! Jetz simer wider ufem neuschtae Stang was d Schwiiz betrifft und si hei ues ou mit Mayonnaise und Schoggi versorgt, jetz geits mir auso wider guaet:-), mini Infektion am Bei isch auso ou verschwundae! Na guaet, vilech ligt s am Antibiotika und nid am Schoggi, aber dae het sicher ou ghufae... ach das hani jo no gar nid gschribae, i ha auso uf dae Andamanae no Fieber (und dir kennet mi, i ha schuesch NIE Fieber) gha und d Chrigae het scho daenkt i heig sicher Malaria oder mindeschtens Dengue Fieber... Si de z Port Plair zun Dokter u die het aebae gmeint aes ligi a derae Riisae Buelae woni am Schiinbei ha gha, das isch auso ae Muggaestich-Infektion gsi! Bloedi Viecher! Aber aebae, jetz isch wider guaet u s Bei isch no drannae!

Aebae jo, am noechschtae Tag si mer de leider gad witer, si scho viu z lang z Bangkok blibae, hei jo nid so viu Ziit! Si de witer nach Ayuthaya (Das isch vor laaaanger laanger Ziit mou d Houptstadt gsi) go Ruinae aaluaegae u wider aes paar Taemplae u Buddhas u am noechschtae Tag witer nach Kanchanaburi. Doert si mer de grad sofort zum Tiger Temple go Tiger strichlae!

Das isch auso mega kuul gsi, sisch huerae schoen gsi denae Tier so noch z cho! Aber leider isches eifach mega schnaeu gangae, sisch haut eifach vou d Massaeabfertigung gsi... aber glich huerae kuul!

Doert bi dae Tiger hei mer no dr Markus usem Schwarzwaud ufgablet u si de naer no mit daem go Velofahrae... wider mou zu dae Taemplae und so... Am noechschtae Tag hei de Chrigi und ig wider ae Roller gmietet. Hei ei Taempu gsuaecht und dae hei ner prompt nid gfungae... ersch oepae nach 2 Stung, drbi waers numae 10 Minutae gangae! Na ja, hei ues drfuer beidi schoen verbroennt und hei jetz ae wunderschoeni Tomataefarb!

Naer si mer de no 65 km zum nae Nationaupark (Erawan Waterfalls) gfreset, si erscht am 4i acho, u dr Park macht natuerlech am 5i zuaeh... aber schoen waers gsi, und i Pool bim Wasserfau si mr natuerlech glich no dri gumpet;-)! Und Celine, doert hets meeega grossi Fischae gha u die si a eim cho knabberae! Ha das auso gar nid toll gfungae, aber i ha gad a di muaessae daenkae u dini Fischphobie;-)!

Ehm jo, was no? Auso huet am Morgae si mer wider zrugg nach Ayuthaya u huet Obae goe mer mitem Nachtzug nach Chiang Mai... und jetzae si mer aebae gad chli am umaehaengae... Taemplae hie hei mer jo scho aui gseh... und usserdaem isches eh viu z heiss fuer oepis z machae!!!