Nadja's Polterabend, 23.07.12 - ohne Kommentar

Noahs Toufi

Isch scho wider cheibä lang här, am 15.07.12 isch äm Noah Janic Narracci sini Toufi gsi, und i bi jetz ganz offiziell Gotti:-)!

Toufi isch schön gsi, ou wenn chli speziell, mir hei aui nid genau gwüsst wie das si wird abloufä, aber dr Pfarrer hets nid schlächt gmacht!

Mi Schätzu isch Fotograf gsi, u dr Robi het d Turtä säuber gmacht. Jammi!

U dr Noah isch auso ou ganz ä Liebä gsi:-D!

Uf dä Aupä...

Guet, i bi mer nid sicher öb dä Titu gramatikalisch korrekt isch, aber mir si würklech uf dä Aupä gsi... und zwar am 1. Ouguscht uf dr Menigwaldalp, go Brunchä mit Mup u Chrigi u Jérome und wie gewohnt si mer ou wider zum Füür ufägloffä... das Johr het zwar s Chrigi verseit, drfür isch dr Reto mit cho:-)! Wie geohnt hets viu Zmorgä inkl. Röschti und Spieguei, und zum Abschluss no ä Mehrtrübelichuächä gäh! Mäm.

U letschts Weekend si mer de zum Abschluss vo üsnä Ferie no uf dr Glütschaup gsi, Singers Fründins Isländer go bsuechä! Ufägloffä, wetti no erwähnä:-)!

Annemarie auf Reisen...

annemarieworldaround.blogspot.ch

Geschafft!!!

Jetz isches nid numä verbi, sondern ou gschafft! Jo genau, totau entgägä aunä erwartigä, hani jetz das Diplömli ir Täschä. Vöuig unspektakulär, hani scho letschtä Mittwuch dr Brief im Büro im Poschtigang gha. S Korkäknauä isch auso bis jetz no usblibä... D Erliechterig dasi nüm id Schueu mues isch gloub fasch grösser aus Fröid drüber, dasi jetz dä eifgenössisch Fötzu ha;-)!

Vorbei...

So, mini Prüäfigä si ändgültig dürä und i bi sooooo froh:-D!
Jetz hani ändelch wider Ziit für Wichtigers! Jaja mini Prioritätä si scho geng klar verteilet gsi;-), aber s het mi jetz auso doch cheibä gstresst, die Prüäfigä! D mündlech Prüäfigä letschtä Donnschti si gloub nid schlächt gloffä... Ha bir Präsentation uf Bärndütsch afp schnurä u z viu Ziit brucht, u äs Vorsteuigsgspräch füährä... na ja, das hani haut nonie gmacht u vorä gschichtete Stichprob hani no nie ghört... aber schüsch isches gloubs nid schlächt gangä! Jetz chunnt no chli drufah, was si mit dr Verchoufsplanigs-Prüäfig wei machä...
Jetz heissts abwartä, aber immerhin hani wider chli meh Ziit für mi u mini Liebschtä;-)!



Träumen...

Äs isch wider typisch: äs sisch schönschtä Wätter (kei Angscht hockä ufem Baukon) u i sött lerä, mini Präsentation vorbereitä besser gseit... aber irgendwie chunnt mer iiiiimmmer öpis drzwüschä, woni cha machä statt letä;-)! Föteli vo Oustraliä postä zum Bispiu;-)! Hei doch MuP bim puffnä Spicherchartä vo mirä Schwe gfungä mit Föteli vo üserä Reis... do chani fasch nid angers aus die mit öich teilä:-):

Jawoll, Vanarasi. I hamers dänkt, Datum 4.1.2008... wiui mer aber glich nid bi sicher gsi, hani müässä go nochäläsä... das dönt de so:

"Nacherä zimlech aasträngendä Nacht (Sleeper Class: wärdä nid mou Dechinä verteilet het numä Mannä u i üsnä Bett isch scho öper glägä, hei sä vertibä, heis Gepäck zu üs ufs Bett gno, hei chli Angscht gha äs wärdi klauet u dürfür hei mir när kei Platz gha) simer de auso z Varanasi acho. Natürlech wiedermou mit 2 - 3 Stung Verspötig! Ufem Gleis hei mer de uf Cosima und Fabian gwartet und ab denn si mer gad zämä witer! Hei natürlech wider mou äs huerä Ghetto gha mit dä Riksha-Fahrer, aber nachdäm mer no 15 Minutä dür ganz schmali Gässli gwanderet si , si mer de bim gwünschtä Hotel acho. Leider isches de vou gsi, aber äs wär würklech äs kuuls gsi, direkt am Ganges. Hei de äs Hotel aagluegt wo üsi Chauffeurä vorgschlagä hei, chotzchotz, u si de z letscht Glich im nä LP-Hotel glandet! Zimmer ohni WC 250 Rupiä."

I wott nech jetz nüm witer längwilä, dr Räscht vom Tag hei mer schiinbar mit ässä, schlofä und Bier us Teetassli trinkä verbrocht;-)....

S nöchschtä Foto isch när scho vou Australia, im Apriu 2008:

Fraser Island!

Oh my God, was isch mit derä Friiissuuuuur???

U do isch mini Schwe scho öpä chli bsoffä gsi;-)!

Das isch Great Keppler Island

Vom Chrigi gits haut hie nid so viu Föteli, wiu sisch jo ihrä Föteler gsi, minä isch mer jo z Saigon klauet wordä:-(!

Heit dir mini Fingernegu gseh???

Und i dä Blue Mountains...

U scho am Ändi vo mirä Reis: Tioman Island, Malaysia

Fernweh...

LAS VEGAS ohni mi:-(

Vor 10 Minutä isch dr Retu abgfahrä id "Ferie" uf Las Vegas... 4 Herrä gö go pouterä, si Kolleg dr Michu hürotet. Wär Hangover gseh het, cha sech vorstöuä wie ig mi fröiä das si das machä!;-) Nenei haub so schlimm, houptsach si nä keni Roofies und si hei jo kei Alan drbi... bi natürlech glich chlei truurig mues ig do blibä, aber i bi jo scho letscht Summer (ou ohni Reto) z LV gsi! Guet Mädels, dir wüsset was das bedütet: fausi mou hürotä (no gad nid i absehbarer Ziit) de gö MIR uf BANKOK (Hangover 2?) und mir müässä üs nid mou um d Ladyboys Sorgä machä;-)!
So auso jetz woni äs paar Tag äleini bi, git mir das natürlech wunderbar d Glägäheit zum Lerä! Oder Blog z schribä...

Pfingschtä u so...

Ar Pfingschtä bini mit Narraccis und dr Sarah im Goufpark go brunchä! I ha das supi gfungä, s het Röschti u Rüährei, Würschtli u Späck, Honigbrötli u Lachs gäh, auso quasi aues wo mi Härz begehrt zum Zmorgä, usser d Avocado het gfäut. Avocado gits haut exklusiv numä bi üs zum Zmorgä:-)! Mitem aaschliessendä Sünnälä am Bieler See isch leider nüt wordä, wiu leider si am Nomi Wuhuchä ufzogä, u äs isch nüm so warm gsi… si de haut när hei und hei äs Nüki gno;-)!
Am Mänti si mer de z Prés-d’Orvin im Seilpark gsi. Mini Motivation het sech starch i Gränzä ghautä, bi nid so guet gluunet gsi, und das die angerä aui unabhängig vo nang ä Stung verspötig hei gha, het mi ou nid so Cheibä gfröit… weni de scho mou pünktlech bi… bi de när zerscht mit mirä Schwesä und dr Kim u när spöter no mit dr Diana und em Reto umäklätteret. Het zwar Spass gmacht ;-), aber s het mi de nid eso gforderet mini Fründä. Viu zweni Adrenalin für mi (bi haut äs Chautbluet).
Am Zischti het dr Schätzu Geburi gha und mir si is Schwöuämätteli go ässä. Isch zwar schön gsi, aber s Schweinsgehackte ar Chili-Sauce het mi fasch abem Stüähli ghouä… has nid so chönnä gniessä… zum Glück hets när im Tramdepot no äs chüäus Bier gäh:-), dört isch ganz schön gsi! Und jetz hani ou ändlech dr nöi Bäräpark und die härzigä Bärinä gseh:-)!

Soooodeli i sött no chli lerä…

Feschtli...

Liebi Fründä, äs isch so wiit:


Nach scho gli ämnä haubä Johr hei mer ändlech ä Termin gfunngä, u das nid numä fürs Zügu-Häuferässä sondern ou no für d WOHNIGSIIWEIHIG!

Dä EVENT wo dir unbedingt söttet wahrnäh, faus dr üsi Wohnig mou in ächt und nid numä ufem Blog weit gseh, findet am 21. Juli 2012 statt.

Mir machä das ir Form vom nä „Tag der offenen Tür“, dir dörft auso öpä ab dä Vieri (bis spät in die Nacht) eifach cho verbi luegä:-)! S git öpä äs Häppchen z ässä und ä Schluck z drinkä ligt ou drinn. Auso:

Abend der offenen Tür, ab dä Vierä am Samschti, 21. Juli 2012 in Far Far Away;-)!

Faul sein...

So i ha mi doch haubwägs vo dä Prüäfigä erhout, u ha mi jetz die letschtä paar Wuchä intensiv mit Fuulänzä beschäftiget:-). Mir si ar Bea gsi u hei ä Grill (und ä huufä Wii) poschtet. Drzue hei mer natürlech no ä Tisch brucht, plus ä huufä Grüänzügs und Dekokram für ufä Baukon, und somit isch d Grill-Baukon-Saison eröffnet:-). Ah när hei mer no Muettertag gfiiret und äs Tiramisu häräzouberet, und vermuetlech hani am Muettertag s eschtä mou i mim Läbä ä Drachä lo flügä (oder abstürzä). Mini Euterä hei auso ou fröid gha drann, numä är Kim isches chli längwillig gsi (si het haut leider ou nie dr Drachä dörfä/chönnä ha).


Ar Uffahrt hei de mini Euterä ändlech wider mou s Piry chönnä cho bsuechä im nöiiä Stau, und si hei beschlossä äs gfaut ärä, aber s Mami het natürlech gad sofort gmerkt, das s Piry abgno het, und das das natürlech drann mues ligä, das si zweni Bananä berchunnt;-)!

Tja was no?
D Celä isch mit em BerlinTeam z NY gsi, und wiu i nid ha mit dörfäwöuächönnä hei si mi mit AE Chleider ideckt…
I cha jetz ou feins Härdöpfu Gratin… (nach Rezäpt und mit Ungerstützig vom Schnügu)
Mi Göttibueb isch so en Schnüsel:-D!
Dänu het mi Roller i Stang gsetzt (auso Batterie gladä) u jetz muesi nä numä no loswärdä… het öper inträssä?
D Martina chunnt scho gli hei:-)!!!
Äm Piry geits super:-D und i suechä mer wider öper wo sä ritet, de chani chli meh Ziit mit am See ligä u so verbringä:-D!
Morn gö mer i Goufpark go brunchä:-)
U am Mänti gö mer i Seilpark go umächlätterä (mues äuä no go Schue poschtä)!

Voilà. Und jetz chumi de scho langsam wider i Stress mit lerä. Ha no 5 Büecher zum Läsä und 1 Präsentation zum Vorbereitä… hmpf, u när wotti gad sofort is Ferie!

schriftlechi Prüäfigä...

So auso i füählä mi ganz locker früsch befreit und beschwingt und motiviert, jetz wo ändlech mini schriftlächi Prüäfig dürä isch! Jawoll, i ha jetz ou wider Ziit für i UsgangJ! Säubschtverständlech, die mündlechä Prüäfigä stöh jo no ah, aber jetz machi fang ä chli Pousä u fo de 3 Tag vorhär wider afo leräJ! Ok, gibes zue, das isch vilech no gad ä chlei übertribä. 4 Täg vorhär sötti de vilech scho afo, mues jo de no d Präsentation vorbereitä;-)! Hihi… nei i ha zum Glück geng no jedä Zischti Nomi frei (schaffä 90) u de sötti gnue Ziit ha zum lerä. Guet, i chönnt jo zwar eh uf hörä lerä, wiu so wies usgseht, bini dürä gheit… (auso i ha d Hoffnig nonid uf gäh, dases vilech vilech viiilech glich glängt het).

Auso Distribution hani chönnä (Gloub)…

Marketing hani ou chönnä (Gloub), aber ir Ziit hets mer nid ganz glängt…

Verkoufsförderig hani chli Spez gfungä, het nid so viu Bezug zum Fach gha hets mi dünkt (oder hanis numä nid gmerkt?)…

RW isch guet gangä (erstunlercherwiis… oder hani ächt aues fausch gmacht???)…

Statistik isch schwirig gsi, ha ei ganzi Ufgab (17 Punkt vo 100) nid glöst (Regressionskoeffizient?)…

Jo und zum Fach Verchouf (KERNKOMPETENZ) mani gar nüt sägä…L

Uf jedä Fau hani nid s Gfüäu i sig dürä gheit. Usser weni im Verchouf ungeremnä 3 ha. U das hani. Usser wenn si d Notä lüpfä… Hmpf...

Bin noch da...

Natürlich. Am Lernen. Wo soll ich auch sonst sein?

Zum Glück werde ich ganz lieb verwöhnt... mal so...                 oder mal so:      :-D

Und auch das Piry kommt nicht zu Kurz:

Mini 2 Schätzeli!

So nöchscht Wuchä stöh die eidgenössischä Prüäfigä ah, die Internä si scho mou nid sooooo schlächt gsi, mit Vorschlagsnotä hets äs 4.8 gäh, s Feusi-Diplom chani auso scho mou rahmä und ufhänkä;-)!

ärgerlich

morn hani mini internä... i cha nüt. macht jo nüt. zöut jo nid. trotzdäm: ärgerlich. mi geliebt het mi us fürwehrtechnischä gründ tämporär äleiglo. sehr ärgerlich. d brotäsaucä woni für ihn ha wöuä fertig machä gseht us wienä mäusuppä, und schmöckt de ou no wienä mäusuppä:-( (fazit: äs isch ä mäusuppä). sehr sehr sehr ärgerlich.
zum glück gits nüt, wo schoggi nid wider cha guet machä:-)! und es bier.

Schule aus

Endlich! Das isch jo jetz ewigs gangä und i ha nach dä erschtä 3 Schueunomitäg scho beschlossä gha dasi nach derä Schuäu NIÄ NIÄ NIÄ meh irgend ä Schuäu machä. Jä nei, mini Opportunitätschoschtä si do viiiiiuuuu z höch. Wasi i derä Ziit aues hätt chönnä machä… 100% schaffä und 100% Lohn kassierä zum Bispiu. Ä negativi Bilanz het si mer nämlech ou no gä die Schueu u mi Marktwärt het si schiinbar ou nid gsteigeret… guet für das müässti natürlech zersch no sonä Eidgenössichä Fötzu i dä Finger ha, u dä steit jo im Moment no gad uf dr Kippi. Mir hei jo am Zischti fang zletscht mou Schueu gha. D Prüäfigä stöh no vor dr Türä. U i ha scho jetzä s Chnöischlotterä… Jä nu was söus, houptsach i cha jetz die 3-stufigi Erfougsrächnig und dr DB III (Nettoerlös – variabli Choschte - fixi Choschte – Gemeinfixchoschtä = tatatataaaaaa) berächnä, i weis wiemä äs Mässä-/Verchoufs-/Distributions-/Marketing-/Deguschtations-/Event-/Verchoufsförderigskonzept und ä Verchoufsstufäplan ufsteut und dr Break-Even-Point chani im Schlof berächnä… numä für was bruchi das eigentelch? Tja i würd sägä wenn mou öper äs Feschtli planet, chömet zu mir i machä nech äs Konzeptli, inkl. Budget, Termin, Verantworig und Kontrouä!


So fertig, i mues jetz no chlei lerä… :-(

Piros neues Zuhause

So nachdäm i mi super iigläbt ha i mim nöiiä Deheimä (i ha die nöchschti Mayonaiseversorgigsstöu gfungä), hei mir letschtä Sunnti ou no s Piry züglet! I bi schier fasch närvöser gsi aus s Piry und bi mit Schritttämpo umä Kreisu gfahrä (wiu us Gründ wo mer nid witer wei erlüterä het mi Privatchauffeur nid chönnä fahrä) mitem Ahänger u das ohni s Piry drinnä.

Nachdäm de s Py ou nach äs par chlinerä Widersetzigä nätterwiis i Ahänger iigstigä isch, si mer de ou zimlech schnäu im nöiä Stau gsi (weder s Py no dr Reto hei müässä chötzlä), hei usgladä, iigruumt, s Piry lo die angerä Ross begrüässä u när si mer de ou scho gli mou go s Outo umäbringä, hei zum beruähigä vo minä armä närvä äs Bierli trunkä, Zmorgä gässä u när hei mer äs Nuki gno…

Ungerdessä het si sech gloubs ou scho guet iigläbt, aber si duet zwüschä dürä geng no chli närvös, isch haut immer no aues Nöi...