Delhi - Agra

Auso d christine isch ungerdeßä ou acho, bi sä am 28igscht, widermou nacherä aasträngendä zugfahrt vo goa nach delhi (dasmou numä 26h), am flugi go abholä! Het aues super klappet u samschti, sunnti hei mer delhi sightseeing gmacht: chandni chowk(märit), red fort, jama masjid(moschee), india gate, humayun's tomb, nizamudim shrine(photo) und connaught place! Mir hei s hotel bim pahar ganj, äm main bazaar gha, das isch ganz gmüätlech, mit viu cafe u restaurant und lädäli, aber schüsch gfaut mer delhi nach wie vor nid so guät! Viu z viu lüt und verchehr! Mega hektisch!
Äbä hüt am morgä(am 7ni!) isch de üsä zug nach agra gfahrä, u jetz hockä mer do imnä roof top restaurant mit sicht uf ä taj mahal, wo mer jetz de gad gö go besichtigä!

Schöni Wiehnachtä!

I bi auso zur zit geng no z goa am strand, i gnießes vou, bi aber glich froh chani gli witer zieh! Am 27igscht hani mi zug zrugg nach delhi u de gangi de scho gli mis schwöschti am flughafä go abholä! Fröiä mi scho!
Geschter hei mer ou chli gfiiret hei z füft z nacht gäßä u si när gmüätlech am strand ums füürli ghocket! Mi cha auso hie är wiehnacht ou nid usem wäg go, sisch aues dekoriert und ghörsch überau wiehnachts musig und sit ca 1 wuchä hets samichlöus, minimum 4 am obä, wo am strand vo beiz zu beiz gö und jingle bells singä!
Ir letschtä wuchä hets jetz ou no massähaft touris gäh! Vorhär ischs scho viu ruäiger u gmüätlecher gsi, aber drfür louft jetz am obä amä chli meh;-)!
Wünschä öich aunä wunderschöni wiehnachtä!

Anjuna

Geschter si mer d s anjuna ufem märit gsi, d monse und ig! Dr märit isch mega groß und eifach houptsächlech für touris, het huerä viu lüt gha! Mä cha schmuck, chleider, schuäh, briuä choufä, eh jo, so wie bi üs ufem märit! U jetz steuet nech vor, i ha gar nüt kouft! Ha geng numä für d monse gmärtet, die het ikouft wie wiud!
Auso i ha no ganz viu z verzöuä, aber irgendwie mani nid nochä mit schribä! Voila d churzfassig:
Einisch ir nacht si mer ufgwacht wiu mer ä hung im zimmer hei gha. Het sech aber de när usägsteut dases ä bsoffnä typ isch gsi wo sech i üses cocohut verirrt het! Ha widermou ä haubä härzinfarkt gha...
När hei mer mou ä roller gmietet. Hätt jo söuä wüßä das das nid guät chunt, ig und ä roller... Zersch hei mer ä buäß brcho wiu mer ohni heum gfahrä si. Muäs jo nid erwähnä das hie niemer ä höum an het... U när hei mer doch tatsächlech no ä pannä gha! Hei de öpä nach eirä stung äs 'garage' gfungä u hei de ändlech chönnä witerfahrä! D reparatur het üs dr vermieter sogar zrugg zaut, usser närvä hets üs auso gar nüt koschtet.
Und när het mi doch zmitzt ir nacht no ä risä tusigfüäßler i rüggä gstochä/bissä! I mim bett! Ha auso gad nüm chönnä schlofä:-(! Jetz düä mer äuä de vom hut ines zimmer wächslä...

Benaulim zum zwöitä...

Am obä si de mir 2 am strand entlang nach colva, s nöchschtä kaff, gloffä! Unglücklecherwiis isches dunku gsi wo mer zrugg glofä si u irgendwie hei mer üses hotel verpaßt u si 1 stung zwit, bis nach varca gloffä, aues am strand entlang. Hei de z varca z nacht gäßä u hei när s taxi hei gno! Läck isch dr juan sauer gsi wo mer si heicho! Die 2, monse u dr juan hei secg agschrouä wie numä öpis! Guät, äs isch jo verständlech är het sech sorgä gmacht, aber mir heis jo nid würklech absichtlech gmacht! Ußerdäm hei säch juan und d annalisa dr ganz tag im zimmer verchrochä und hei sech nid groß drum kümmeret was mir machä, und am obä hei si üs de plötzlech gsuächt... Tss, isch jo nid mi brüätsch, zum glück! Auso das isch vor 3 täg gsi, u si redä geng no nid würklech zämä...
Mir hei de spöter no usägfungä das si a üsem strand ä stromusfau hei gha... Drum hei mer üses hotel nüm gfungä! Am nöchschtä tag si mer de am strand blibä u hei üs vo üsem längä spaziergang erhout!

Benaulim Beach, Goa

Das wär auso mis gägäwärtigä domiziu, bi jetz de scho fasch sit eirä wuchä hie!
Am erschtä tag hani ä 60jährigi änglischi damä kennäglehrt u ha de am nöchschtä tag ä goa-tour gmacht. Si auso mitem taxi losgfahrä nach colem u si vo dört us mitem jeep i dschungu zum nä wasserfau (widermou ä wasserfau:-) gfahrä! S letschtä stück hei mer müäßä loufä, u ungerwägs hättä mer chönnä affä füättärä, wenn si hättä hunger gha. S het leider so viu tourischtä gha, die armä äffli si scho totau vou gstopft gsi! Sisch aber glich schön gsi u dr schwumm im deich het guät to! U das mou ischs auso ou ä richtig schönä wasserfau gsi und nid numä sonäs bechli!
Aus nöchschts si mer ä spice farm go aaluägä, hei äs cashew-schnapps und zmittag bercho u hei när ä spaziergang dür d plantagä gmacht! I weis jetz auso wie muskat, curry und zimt usgseht und weli heilchräft weles pflänzli het... Nei, i has natürlech aues scho wider vergäßä!
När si mer widermou ä tämpu go aluägä und när si mer no dür old goa gfahrä u hei dört ä chiuchä agluägt! U steuet nech vor si hei doch tatsächlech gad äs hochzit gha! Goa isch auso vom nä portugies 'entdeckt' wordä, drum hets fasch me chiuchä aus tämplä hie!
Am nöchschtä tag si de d spanier ou uf goa cho, si si jo no z agra gsi...
Ha 2 öschtricher kennäglehrt u die hei de d monse u mi zu rä delphin-boot-tour iigladä, aber äs isch jo widermou typisch, delphinä hei mer natürlech keni gseh...

Im Zug...

Sooo, sit geschter am nomi am 3i hocki i däm zug und jetz isch 8i am nöchschtä tag... Sit 29 stung! Never ending! Gemäß är tourist info söttis jo nur 30 stung go u gemäß em lonely numä 26! Ha aber usägfungä das mer erscht morn am morgä am 7ni achömä! Ha äuä dr bummler verwütscht:-(!
D lüt si jo au sehr gsprächig, numä verstohni sä leider glich fasch nid, si redä zwar änglisch, aber mit so starchä akzentä... Isch auso nid eifach u die meischti zit verbringi mit schlofä! Cha nid mou usäluägä wiu diä chlinä fänschter wos het, si mit blauer oder gäuber plastikfoliä zuäkläbt! Zum glück sid igangstürä offä und döumou verwütschi dört ä platz zum härä stoh und usäluägä:-)! Die meischti ziit bini auerdings am schlofä, hihi, ha sicher scho mindeschtens 20 stung pennet... Eh jo, duät ou guät:-)!
Jetz hani gad zum 2 mou znacht übercho... Het scho wider s glichä gä, ris, chapati (das isch so fladäbrot), dahl (linsä) u äs gmüäsmüäsli! S äßä isch jo scho fein, aber haut eifach aues uhuerä scharf! Muäs äuä demnächscht mou äs mäc uf suächä;-)! Nenei s git auso ou viunä ortä pommes hie und zum usglich zum scharfä gits meischtens yogurt oder miuchris drzuä... Das isch aber nid so fein!
U nachem äßä berchunsch amä zucker und anis, oder so öpis ähnlechs, aus mouthrefreshener!
Vo mäßer u gablä hautä si gloubs nid so viu, si ässä vo hang u bruchä s chabati aus schuflä;-)! Mi isst auso grundsätzlech mit rächts u brucht links wemä huäschtet oder so... U ußerdäm schmatzä si bim äßä, so luschtig;-)!

Gar nid äso gfährlech...

So jetz si mer gad vom flughafä heicho, si em juan sini bibä go abholä! Sisch auso äs blonds tschingeli, aber si schint ganz nätt tsi! U jetz chani no chli italiänisch üäbä;-)!
Sorry übrigens, mini iträg chömä chli düränang, aber döumou chanis nid schickä mitem natel!
Auso das ufem foto isch d stroß, bezirk karol bagh. Das isch auso ou dört woni ir erschtä nacht äs hotel gsuächt ha und monse und juan troffä ha, wo mer när gfungä hei die stroß sig viu z düschter und z dräckig, so chli beängschtigend! Auso, wie mä ufem photo gseht, dürä tag gsehts ömu ganz angers us, het mega viu lüt und lädä und äßensstäng, si si a jedäm eggä öpis am spruzlä u s meischtä isch vegi, u mega luti punjabi musig über d lutsprächer... Isch auso gar nid gfährlech! Und d inder si zwar sehr neugierig aber eigentlech nid unagnähm oder ufdringlech u si wei dr ou nüt böses, si versuächä di eifach abzzockä wos numä geit!

Back to Delhi

Do si mer gad uf äm nä kamelusritt gsi! Isch auso nid so dr wahnsinn gsi, bi fasch igschlofä uf däm viech obä, isch so langsam gsi! S het nid würklech wöuä...
Jetz si mer auso schowider z delhi. Nach jaipur si mer nach rathambhore, dört si mer ufänä tiger safari, isch auso sehr schön gsi, hei ä huufä hirschä u reh u antilopä u aus so viecher gseh! Und ä leopard! Aber natürlech kei einzigä tiger:-(! Jetz muäsi de haut nomou ä safari machä...
Am nöchschtä tag si mer witer uf pushkar, das isch ä heiligi stadt am nä seeli, dört gits kei aukohou u kei fleisch, drfür hets ä huufä hangäblibni hippies, und jedä wot dr gras verchoufä! Si widermou ä tämpu go aaluägä, viu ufem märit gsi(ha auso no gar nüt kouft) und si äbä när go kameuritä id 'wüäschti'! S het auso genau 2 dünä gha;-)!
Jetz si mer auso wider z delhi u machä chli sightseeing! Vo tämpu zu tämpu;-)!
Am morgä si mer ir tourist information gsi, mir hei eigentlech no ä tour nach agra u chli witer i oschtä wöuä buächä! Ha aber när gfungä, sigi chli tür u i machi de das äuä eh mit mim schwöschti, fouglech i wöu nid mit uf die tour! När isch s theater los gangä, zwüschä monse u juan;-)! Är het umbedingt die tour wöuä machä (wiu ärs sirä fründin wo hüt do härä chunt gseit het, mir machä das) und d monse würd morn lieber gad mit mir uf goa cho! D monse het natürlech gwunnä, isch jo klar;-)! Si gö jetz 2 tag uf agra, dr taj mahal go aaluägä u chömä när vo agra uf goa, de bini auso de nid so lang älei...

Märit in Jaipur

Das isch z jaipur ufem märit, und weni mers richtig überlegä, de isch das erscht vorgeschter gsi! Chunt mer vor aus wäri scho sit mindeschtens 3 mönet hie... Ha mi auerdings glich nonid a aues chönnä gwöhnä, z b dr verchehr isch dr horror! Outo, bußä, laschtwägä, töffä, riter, fuäsgänger, roß-, kameu- u ochsägspann, hüng u chüäh u velo aues chrüz u quer düränang u das im nä höllä tämpo! Mir drü armä turischtä si sicher öpä 10 minutä am stroßärand gstangä bis mer üs ändlech überä trout hei... Na ja für mönschä hautä si nid, aber wenn de mou ä chuäh überä wott, oder ä hung oder äs söili, de steit de gad dr ganz vercher stiu;-)...

Jaipur, Rajasthan

Mir si auso ungerdeßä z rajasthan, ds jaipur genau! Mir hei üs vorgeschter z delhi uf d suächi nachemnä beßerä hotel begäh, hei aber när gad ä 5-tägigi rundreis buächet! De isches de ou gad los gangä, mit ärä 6 stündigä fahrt u am obä si mer äbä de z jaipur acho! Dört hei mer scho gad mou anes hochzit dörfä, isch sehr schön, aber gar nid so idrücklech wienis erwartet ha! Ha säubschverständlech ou aui indischä spezialitätä usprobiert! U mim magä geits geng no guät;-)! S äßä isch auso gar nid schlächt u nid mou so scharf! Geschter hani auerdings äs chicken curry gha, i bi mer nid sicher öps ächt würklech äs chicken isch gsi! S het zwar gschmöckt, aber äs het so komisch chnöchä drin gha! Bäh:-(!
Hüt hei mer no chli Jaipur aagluägt u machä jetz äs nickerchen! So sightseeing isch haut scho aasträngend;-)! Am obä si mer no einisch zum hochziit igladä, zum glichä, die gö hie öpä ä wuchä...

Juan & Monse

Dr flug vo paris nach delhi isch super gsi, s gepäck hani ou wider gfungä u gli druf abä bini ou scho im taxi (totau kriminellä fahrstiu, auso wenn d amplä rot wird fahrt mä trotzdäm dürä, mi wird höchschtens chli längsämer) ufem wäg zum nä hotel ghocket! Sisch mer auso scho nid so mulmig gsi, mir si do dür viertu gfahrä, uiuiui, überau ghüder u boustöuä, wiudi hüng u chüäh u schlofendi gstautä a jedem eggä! Spöter hani när chegget dases äuä ir ganzä stadt i jedem viertu so usgseht... Uf jedä fau wo de mis taxi i äs ganzes düschters gäßli inä fahrt u dört tatsächlech ou no ahautet, dört isch mer auso mis härz totau id hosä grütscht! Mir si aber de doch vorem nä hotel gstangä u nid vo gängschter umgäbä gsi;-)! Tapfer wieni bi bini i das hotel inä, ha eis vo dä häßlechschtä zimmer agluägt woni je gseh ha(u i ha scho viu gseh) u ha äm chauffeur gseit i chönn mer für 40 $ ou säuber id chapä schißä! Ha de när dr lonely planet fürä gno u ha im taxi gseit woni härä wott... S nöchschtä hotel isch de öpä genau so schlimm gsi, aber dört hani när äbä die spanischä gschwüschterti atroffä u när bini mit ihnä witer go suächä und bis z letscht si mer am 5i am morgä irgendwo, kei ahnig wo z delhi genau, z 3 im nä doppubett glägä!

Los geits!

Sooo, hüt am Morgä si mer am 4i z längnou abgfahrä! Wie dr gseht bini auso vor ganzä family begleitet wordä, ufem föteli si mer am flughafä bim zmorgä mit kafi und gipfeli! Dr Air france flug nach paris isch solala gsi... Bi mer chli vorcho wie ir cesna überem grand canyon vor 3 johr: äs uhuärä munzigs flugi und ä pilot wo äuä nid 1 monet eutär aus 21 isch! Sehr vertrouens erweckend! Entgägä aunä erwartigä und dä bereits usgstangnä todesängscht;-) (s het ä chli ghouperet) hocki jetz glich z paris am flughafä, inmittä vo französisch sprächendä inder, höcklä ar sunnä u wartä ufä flug, wo ou bereits ä stung verspötig agmäudet het!
Auso wünschä nomou aunä ä schönä winter, tuet mer leid dasi mi nid vo aunä verabschidet ha, bi äbä chli gstreßt gsi, und i chumä jo wider, vorussichtlech;-)!
Häbet ä guäti zit...

Samschti Obä

So das wärä auso no äs paar Föteli vom Samschti Obä. Beschtä Dank a mini flissigä Häufer!
D Melä und dr Robi si scho mit mer cho poschtä und mini Schwoscht und d Martina si de ou scho chli früächer cho und hei ghuufä Gemüse schnippeln fürä Wok. Röbeli het Apero-Häppchen gmacht und... steuet nech vor, är het gstoubsugeret;-)! Super!
Nid z vergässä, die 2 angerä Herrä wo sech do no ir Chuchi tummlet hei, dr Mirco und dr Dänu, die hei auso flissig abgwäschä, abtrochnet und ufgrumt und bim Chochä hei si ou no d Nasä id Pfannä gha! Auso merci nomou aunä, i ha nämlech dr ganz Obä nid viu z tüä gha :-)!

Nachem ässä si mer de no aui, bis uf d Celä und Sabä, is Blue Note gangä und dört si de no d Celine und d Sarah zu üs gstossä... sisch de genau so luschtig witergangä wies aagfangä het und so um die 3 umä si de ou die letschtä mou heitorklet. Und am Sunnti hei mir (auso zumindescht ig) laaaang usgschlofä:-)!

Samschti im Stau

Simönchen mit ihrem Pferdchen...

Und Nadja mitem Tiger Teddy...

Dressurprüäfig im NPZ Bern

Voilà s Video wo dr Robi gmacht het. I has leider nid chönnä bearbeitä, drum isch haut dr Afang ou no druffä... aber immerhin äs Fiumli;-)!

Guät bini auso nid würklech gsi, bi 27igscht wordä vo 32. Aber immerhin, oder, für das i numä einisch güäbt ha! Und bim nöchschtä mou, machä mer de das besser;-)!

Konkurrenz fürs Piry: Super sexy Tiger Teddy Rebel

Am Friti hani mini erschti Dressurprüäfig gha... wiu mis armä chlinä Piro ä Chrüzschlag het gha, hani mi de am Mittwuch spontan drzuä entschidä mitem Teddy mit z machä!
Mir hei zwar nid viu güäbt, aber drfür hei mer spitzä mässig usgseh;-)!


Tiger Teddy het sogar äm Piry ihri nöii Dechi dörfä aalegä!
Sisch auso ou ä super Service gsi vor Nadja, wiu bis ufs Zöimli putzä u dr Sattu abstoubä hani gar nüt müässä machä, woni am Donnschti Obä bi i Stau cho, isch dr Teddy scho schön suber und züpflet gsi u het u scho s Tiger Pyjama annä gha... und dank däm, hani de ou am nöchschtä Morgä nid so viu ztüä gha!

Martina am letschtä Sunnti...

Im Büro...

Sooooo, do hani die Zwöi grad inflagranti verwütscht!!! Caro lächlet ganz unschuuldig und dr Fanky het grad wöuä abhouä;-)! I finges äbä scho langsam chli verdächtig was die 2 geng zämä machä....
Nenei, i wott do auso keni Grücht id Wäut setzä, s louft de auso nüt, so wiit wie ig weis! I muäs sä numä geng höch nä, und usserdäm muäsi doch eifach no chli Sabag verewigä, ha jo numäno 2 Wuchä Ziit... ;-)!

Super sexy Piry!

Hüt hets Piry ihri nöii Dechi übercho! Isch doch härzauerliebscht, oder;-)?


Äm Teddy gfaut si ou, dä luägt nämlech ganz iiversüchtig!
Piro muäs aber no chli wartä, im Moment isch es gad no chli zchaut für die schöni Nöii Dechi, i ha numä fangs wöuä luägä öb si rä geit!
Bir Uswau vor Farb het mer de übrigens d Celina, mini Riterä, ghufä;-)!

Blondäli am Panetone ässä!

Das isch mini Büronachbarin am Panetone ässä;-)! Die hei mer letscht Friti am Morgä vom Amigo übercho und hei sä natürlech am Nomitag gad killet! S Foto hei mer aus Bewiis gmacht, Caroline het nämlech die ganzi Panetonä äleini gässä! Hihi, nenei natürelch nid;-), hei numä Diana, wo am Friti Nomi frei het, wöuä iiversüchtig machä! Si het aber de am Mänti ou no äs Stück bercho....
Mmmh isch daaas feeein gsi...

Celä und Sabä

Und no äs Föteli vom Häuferässä vom 1to1-cine-happening z Lyss...

Sabag-Wyber-Obä

Halloween

Am 20igscht hei d Celine und ig nüt angers ztüä gha, und drum hei mir üs mit Chürbis schnitzä betätiget... isch auso sutä luschtig so öpis;-)! Vorauem s usweidä!
Die 2 ir miti si mini... und drzue hei mer scho wider Putsin gfrässä und Supertalent gluägt!

19. Oktober... Diplomfiir vom Chrigi

Dr Papi verpasst sech ir Töifgarage no dr letscht Schliff... S Mami u d Chrigä lönä säuber lo chnblä mit dr Cravattä!
Das isch eini vo dä Fahnä wo d Klassä am 1. Tag z Magglingä gmacht gei...
D Simonetta Sommaruga het ä Red ghautä...
Bir Diplomübergab...
Und d Monika und mini Schwe bim ässä...

13. Oktober ...

No äs par Föteli vom Geburi-Fescht vor Andrea und mirä Schwoscht...

Nomou äs paar Föteli vom Turnier