Taj Mahal + Keoladeo + Marudhar Express

Am 1. am morgä si mer früäh uf und dr taj mahal go aaluägä! Dr taj isch auso sit em 2007 eis vo dä 7 wäutwunder, und d inder si wahnsinnig stouz druf! Är isch natürlech mega schön und äs isch kuul das mer dr taj mahal in ächt gseh hei. Aber bis z letscht isches eifach wider ä tämpu meh;-)! Sisch natürlech spezieu wiu är ganz wiis isch und wäg dä steiilagä wos het, momou isch scho schön! Am nomi hei mer de dr bus gno u si 2 stung nach bharatpur, rajasthan gfahrä. Busfahrä isch auso ou widermou spezieu gsi, das heißt, kamikaze-fahrstiu kombiniert mitemnä mit hektischä inder vougstungetä bus wo nid mou richtig stoppet für d lüt inä u usä zlo! S erschtunt mi auso geng wemä problemlos vo a nach b chunnt! Vor busstation si mer de mit ärä veloriksha zu üsärä bleibe, ä family wo äs par zimmer vermietet, gfahrä! Dört isches de ganz gmüätlech gsi, s het heißes waßer, warmi dechinä und feins z äßä gäh!
Am morgä hei mer de velo gmietet und si i keoladeo national park go radlä! Hei mou öpis angers wöuä machä aus go tämplä aaluägä...
Am obä si mer de scho wider zrugg uf agra, si gad a bh u hei de eigentlech gad witer uf varanasi wöuä! S het natürlech kei platz meh gha! Hei drfür äs billet fürä nöchscht obä bercho, u jetz hockä mer äbä geng no im zug... Hei wider mou verspötig, jetz isch de gli 12i u eigentlech hättä mer scho am 9i söuä acho! Isch normau...
Im zug hei mer numä no sleeper class billet bercho, das ischs biuigschtä, 15.- für 13h;-)! Wär eigentlech ok gsi, aber leider hei si hie keni dechinä verteilet u i ha mer vou a arsch gfrorä! Ha auso nid so viu gschlofä u i bi de froh wemer im hotel si!