Sooo, nachdaem d Martina und ig ues scho hei gseh die noechschti Foug vo "The Terminal" draeiae hets de glich no klappet und i ha nae Flug gfungae, mit Turkish Airways ueber Istanbul nach Singapur. Klar isch dae nid ganz so biuig gsi wienis i mis Budget i plannet ha, aber wider mitem Zug heizfahrae haett natuerlech mi stur Chopf nid woeuae. Dr Flug isch super aagnaehm gsi, keni schreiendae Ching und kei z fescht ufdraehiti Klima-Aalag und gschlofae hani wunderbar, drum bini jetzae, am 12i ir Nacht und nach mehrerae Stung Shopping, immer no topfit. Singapur darf mi ungerdessae scho zum 4 mou beherbaergae und drum hani ou ke Problem gha, s Fragrance Backpackers in Little India wider z fingae. Nach aerae agnaehmae Duschi, hani mi de mou aus erschts is ION Shopping Center ar Orchard Street ufgmacht... Schwoooscht? I gloub das hei mer letscht mou nonid gseh... laeck hani mi veriirt dert inae... bi sicher oepae 3 Stung drinn umaegwanderet! Mis Ziu si eigentlech churzi Hosae gsi, wiu irgendwie hani mini Koffer doch eher fuer i Richtig Amerika oder Kanada packt (und aes isch uuuhuuuuerae heiss), aber jetz hani haut laengi Hosae und due de die abschnidae... wiu mou abgseh vo Summer Chleider hani auso aus drbi: vo WC-Papier, ueber ae Schaeri bis zu dae abglofnae Malaria-Tablettae vor letschtae Reis. Naer hani de no ae Reisefuerer kouft und ha oepis iiheimischs (auso i nimes mou ah aes isch iiheimisch gsi, wiu i has nid so genau choennae definierae) z Nacht gaessae.
So, und vori hani no aes Bierli drunkae, das het auerdings 10S$ koschtet, und drum hets numae eis gaeh und aebae, eigentlech waer jo scho lang Ziit fuer is Bett...
