I ha mi jetz wider vo minä Ferie erhout und ha mi wider im Arbeitsläbä iigwöhnt... jojo das brucht haut amä äs Wiili;-) so nach 3 Wuchä nüt machä... die 3 letschtä Ferie Tag hei mi so richtig schön aagschissä, natürelch wiu die letschti Wuchä uf dä Perhentians so toll isch gsi. Bi jedä Tag go touchä, nach däm i dr Divemaster drvo überzügt ha, dasi würklech kei Refresher bruchä (wiui eifach totau überzügt bi vo mir und die chlini Zicke usäghänkt ha), het är mi de tatsächlech eifach so mit gno und nachdäm er sech drvo überzügt het dasi mi ou tatsächlech cha Fortbewegä und keni Panikattackä schiebä, hei mer de würklech mega kuuli Sachä gmacht. Si ungerfäusä und dür Höhlinä dürä gschwummä (das isch sooo kuul gsi, i bi sicher öpä 3mou blibä steckä und ha mer huerä d Bei verchratzt a dä Fäusä, aber äs het mega Spass gmacht) und när si mer no äs Wrack go aaluägä... das darfmä wigentelch numä mitem Advanced aber das Wrack isch äbä numä uf 18 m und het grossi Frachtrüm wo mä inä cha, drum hei si üs ou mitgno. Leider hanis ou dört wider gschafft mi öpä 3 mou am Riff z schnidä... isch haut no schwirig wenn dä au die Fischä muesch beobachtä und glichziitg wirsch vor Strömig wägtribä und merksch nid wie noch am Riff das dä bisch... has auso ou gschafft vou inä Seeigu inä z längä... Stachu steckt gloub geng no i mim Finger. När hei mer no ä chlinä "unfau" gha... auso mir si jo z viert gsi. Ig und dr Stuart si Buddys gsi und Nadia und dr Divemaster... mir si am Wrack entlang toucht und uf z mou isch d Nadia vor Strömig ufä übers Schiff wäg zogä wordä... Si isch auerings guet gägä d Strömig acho und isch gad wider zrugg gschwummä, ungerdessä het ärä aber dr Stu wöuä go häufä und isch säuber id Strömig cho und isch so erschrockä das är sech am Wrack het fescht ghautä. Ganz schlächt wiu mi sött jo nüt alängä wius dört tötlechi Skorpionfischä git wo mä fasch nid gseht... drum isch üsä Divemaster churzum fasch dürä drähit und het dr Stu versuecht vom Schiff wägz zieh... när hei si fasch chli zämä kämpft ungerwasser, dr Stu het plötzlech sis Gwicht verlorä und de si die 2 natürelch zämä ufwärts... und Nadia und ig si geng no dunger gsi... i has auso nid würklech tschegget, was dört abgangä isch... zum Glück si mer denn scho uf 7m gsi, und dr Divemaster het üs dütet mir söuä ou ufä cho... dä isch würklech fasch dürädräit... jetz hani auso ou scho mis erscht Notufstig gmacht. Und äs het ou niemerem öpis gmacht usser das dr Stu sini Finger verschnitte het, vom Riff..
D Heireis hani de ganz schrecklech gfungä... mou abgseh drvo dases mi natürlech augemein aagschissä het hei zgo, isches ou no ewig gangä. Bi über Nacht vo Kota Bharu nach Singapur gfahrä, när dr ganz Tag ir Stadt umägrennt und när wider über Nacht zrugg id Schwiz gflogä... die erschti Nacht im Bus bini fasch iigfrorä und die 2 Nacht im Flugzüg het mer scho aues so weh to, dasi nüm ha chönnä schlofä... so hani de haut dr ganz Sunnti verpennet u bi am Mänti am Morgä topfit und motiviert go schaffä... hahaha...
