Puerto Galera, oder Sabang, isch doch verglichae mit Manila chli einsam... hie hets ae Tonnae Russae und Duetschi (auti Mannae) wo am Obae vou Party machae und Filipinas abschleppae (jo ganz ehrlech, das wideret mi ah), auso definitiv nid mis Vouk... zum Glueck hani mer aes kuuls Diving Center usgwaeut mit ganz naettae Luet, mit dr Shirley u dr Bunny vo China, u mit de Filipinos vom Touchcenter bini jetz die letschtae 2 Taeg umaeghanget. S Touchae isch kuul gsi (fuer die wo mi Blog scho lang kennae, jetz fougt d Schwaermerei ueber d Ungerwasserwaeut und d Feststeuig dasi soett Meeresbiologin waerdae), d Sicht isch zwar nid so klar gsi wie zum Bispiu z Sharm el Sheik, aber aes het mega viu Korallae gha, mit so Vichli druffae woni wuerd schwoerae dases ae Pflanzae isch wenn si nid ou zwueschaeduerae saeubschtstaendig wuerdae umaeschwuemmae, i aunae Farbae u naer ganz ae huufae u luechtigi Nudibranches, die komischae Schnaeggli-Dings ohni Huesli, mou abgseh vo aunae Fischae und i bi 100% ueberzuegt das die violettae Anemone ir Nacht luechtae! Auso uf jedae Fau bini 3 mou go touchae, ha mi jetz aber drzue entschidae witer zgo, obwou s touchae schiins rund um Puerto Galera am beschtae sig. Ah jo, geschter am Nomi hani jo no ae Dschungelspaziergang gmacht... ha mi auso numae einisch verirrt... na ja, irgendeinisch het mer auerdings dr Bon Jovi Bed of Roses entgaegae gsungae u de hani daenkt muesi ufem richtigae Waeg si. Bini natuerlech nid gsi (Bon Jovi het mi vou verarscht), bi de eifach widermou bim nae Huesli glandet u die naettae (wuerklech sehr naettae u hiufsbereitae und nid hingerhaeutigae) Filipinos hei mer immer wider ghulfae. Isch auso no intressant wie die Laebae so Zmitzt im Waud, aber glich mit Strom u Wasser. Eh ja nu, 127 Muggaestichae spoeter hanis oemu de ou wider i mis Kaff gschafft:-).
Im Moment steckeni jetz gad in Roxas (uf Mindoro, wiu i gloubae uf jeder Inslae hets es Roxas) fescht und wartae uf d Faehrae... bi am Morgae mitem Jeepney (vo denae lisst mae geng u weis nid wases isch, bis mes mou gseht: sisch eifach ae verlengerete Jeep) nach Puerto Galera doert bini i noechscht Jeepney gschubst wordae und 2 Stung er Kueschtae entlang nach Calapan kesslet... dr LP seit jo, aes sig ae sehr schoeni Strecki: leider hani nid usaegseh wiu das Teil so mit Luet vougstopft isch gsi und i no mitem Rueggae zum Meer bi ghocket und Stross saeuber het mi liecht ad Outobahn im Aargau erinneret. Bi de doch froh gsi hani z Calapan i einigermasse bequem, obwou natuerlech ou wider vou gstopft Minivan ha choennae umstigae... immerhin isches so bequem gsi dasi ha choennae schlofae. Saeubschtverstaendlech hani ou oepis vo dae Doerfli, gruenae Riisfaeuder, Chiuchaenae und sehr saeutsamae Friedhoef mit bercho (jo irgendeinisch gits de o Foto). Und jetz 4 Stung spoeter bini aebae z Roxas u ha feschtgsteut, das 4i-Faehrae spontan zur 8ti-Faehrae isch wordae, wius keni Luet het... und das heisst de, dasi erscht am 12i z Caticlan achumae und fouglech aeuae erscht am noechschtae Tag uf Boracay cha. Wenigschtens hani hie aes par Franzosae gfungae wo ou fescht steckae, de hani oemu chli Ungerhautig.
Jo und was gits schuesch no? Mues jo no 3 Stung ueberbrueggae (mini noeiae Reisegenossae hei mer versprochae si choemae mi cho holae, faus es doch no ae Fahrae chli frueaecher gaeb)... Auso Tourischtae hets nid wuerklech viu, oder oemu keni wo dr Land- und Wasserwaeg waelae. I gseh natuerlech nid wuerklech was dr Sinn vom Reise isch wemae numae per Flugi reist. Mou abgseh drvo dases schneuer geit mitem Flugzueg, isches so o viu guenschtiger mit dae Local-Busae. Jo aebae u naer hets haut eifach wuerklech sehr viu wiisi Mannae hie... Frouae hets fasch keni. Z Sabang hets 2 Typae Tourischtae gha, d Toucher wo am Morgae fruaeh goe go touchae... und die angerae wo numae ir Nacht usae goe go Suufae und so. S git auso hie ou San Miquel Bier, u s Logo gseht zwar glich us, aber aes isch Philippinischs Bier. Na ja aes isch gniessbar. S Waetter isch Semi-guet, vori hets gad gschiffet. Und es isch eigentlech ou hie, wie z Manila meischtens bewoeukt, aber raegnae tuets geng numae ganz churz u saeutae. Brun wordae bini aber nonid richtig... ha aebae bis jetz ou meischtens ae laengi Wetsuit annae gha... Das waer jetz aebae de s Ziu z Boracay, mou chli brun waerdae:-)!
Jo und sowiit gfauts mer eigentlech super. Aes isch wuerkelch aues super easy, jedae cha aenglisch, die meischtae si eifach numae naett u versuechae di nid z verarschae (bis jetz) und ou s aessae isch einigermassae gniessbar;-)! I gibes zue es isch eher saeutsam, s meischtae isch eifach sueess, auso d Fleischgricht, Gmueaess aessae si fasch nuet und a dae Porkchops hets meh Fett aus Schinkae. Aber mou abgseh vo ihrnae eigetae Fastfoodchoettinae (Jollibee), hets ou huerae viu MacDonalds, Starbucks, TGI Fridays, auso quasi aues wos brucht fuer mi zum ueberlaebae:-). S Watter isch ok (immerhin besser aus deheim) und es isch immer warm. Und d Landschaft isch natuerlech ou nid z verglichae mit deheimae. Aber i bi mer sicher em Mami u em Papi gfauts hie, ou we nid aues, de sicher s eintae oder s angerae Plaetzli...
Keine Kommentare:
Kommentar veröffentlichen